ប្រទេសឥណ្ឌូណេស៊ី កំពុងតែត្រៀមសំណើបញ្ចេញកញ្ចប់អនុគ្រោះដើម្បីទាក់ទាញការវិនិយោគទៅក្នុងគម្រោងរដ្ឋធានីថ្មី Nusantara ដោយសង្ឃឹមថា នឹងធ្វើឱ្យមានភាពប្រាកដប្រជាចំពោះផែនការសំខាន់ក្នុងកម្មវិធីនយោបាយសេដ្ឋកិច្ចរបស់ប្រធានាធិបតី Joko Widodo។
មហាគម្រោងដែលមានតម្លៃ ៣២ ពាន់លានដុល្លារនេះ កំណត់គោលដៅរើរដ្ឋធានីរបស់ខឿនសេដ្ឋកិច្ចធំជាងគេនៅ អាស៊ីអាគ្នេយ៍ ពី ហ្សាការតា ដែលកំពុងជួបបញ្ហាកកស្ទះចរាចរណ៍ខ្លាំង ទៅកាន់តំបន់ដែលមិនទាន់មានការអភិវឌ្ឍ នៅលើកោះ Borneo។ កាលពីប៉ុន្មានខែកន្លង ឥណ្ឌូណេស៊ី បានសម្ពោធបើកការដ្ឋានសាងសង់សម្រាប់មហាគម្រោងនេះ។
សារព័ត៌មាន Reuters បានឱ្យដឹងថា លោក Bambang Susantono អភិបាលរដ្ឋធានីថ្មី (IKN) បង្ហើបឱ្យដឹងថា រដ្ឋាភិបាលឥណ្ឌណេស៊ី កំពុងកសាងច្បាប់ថ្មីមួយដែលលើកឡើងអំពីគោលនយោបាយមួយចំនួនដើម្បីជំរុញហិរញ្ញវត្ថុ និងមិនមែនហិរញ្ញវត្ថុសម្រាប់ការបង្កើតក្រុមហ៊ុន សហគ្រាស អាជីវកម្មនៅ Nusantara។
មុននោះ យោងតាមផែនការ រដ្ឋាភិបាលឥណ្ឌូណេស៊ី នឹងទទួលខុសត្រូវ ១/៥ នៃការចំណាយសម្រាប់ការស្ថាបនារដ្ឋធានីថ្មី ហើយអ្នកវិនិយោគនឹងរួមចំណែកផ្នែកដែលនៅសល់។ ធនាគារអភិវឌ្ឍអាស៊ី បានឱ្យដឹងថា ពួកគេនឹងជួយដល់ ឥណ្ឌូណេស៊ី ក្នុងការប្រមូលទុនសម្រាប់គម្រោងខាងលើ។
លោក Bambang បន្ថែមថា ប្រធានាធិបតីឥណ្ឌូណេស៊ី ឆាប់ៗនេះនឹងដឹកនាំយុទ្ធនាការជំរុញការវិនិយោគ និងពិភាក្សាអំពីទស្សនវិស័យពាណិជ្ជកម្មជាមួយនឹងក្រុមអ្នកវិនិយោគដែលមានសក្ដានុពល។
ឧបសគ្គមួយក្នុងចំណោមបញ្ហាលំបាកធំៗដែល រដ្ឋាភិបាលឥណ្ឌូណេស៊ី ត្រូវប្រឈម និងដោះស្រាយក្នុងការកសាងរដ្ឋធានីថ្មី គឺការលុបបំបាត់រាល់មន្ទិលដែលកំពុងកើតមានចំពោះលទ្ធភាពរបស់គម្រោងនេះ។
លទ្ធផលនៃការស្ទង់មតិមួយកាលពីខែមិថុនារបស់ មជ្ឈមណ្ឌលស្រាវជ្រាវយុទ្ធសាស្ត្រ និងអន្តរជាតិឥណ្ឌូណេស៊ី បានបង្ហាញថា ៥៩% ក្នុងចំណោមអ្នកជំនាញចំនួន ១៧០ នាក់ ដែលត្រូវបានសម្ភាស បានបង្ហាញការសង្ស័យចំពោះការអះអាងថា គម្រោង Nusantara នឹងក្លាយជាការពិត ក្រោមមូលហេតុថា «មិនប្រាកដប្រជាអំពីប្រភពទុន និងការគ្រប់គ្រង»៕
