ស្ថាប័នទទួលបន្ទុកអភិវឌ្ឍហេដ្ឋារចនាសម្ព័ន្ធរបស់រដ្ឋធានីថ្មី Nusantara នៃ ប្រទេសឥណ្ឌូណេស៊ី កាលពីម្សិលមិញ បានឱ្យដឹងថា រដ្ឋធានីថ្មីរបស់ប្រទេសនេះនឹងអភិវឌ្ឍប្រព័ន្ធគន្លងផ្លូវដែលអាចបញ្ចូលថាមពលដោយស្វ័យប្រវត្តទៅឱ្យរថយន្តអគ្គិសនីពេលកំពុងបើកបរ។
បច្ចុប្បន្ននេះ នៅពេលត្រូវការបញ្ចូលថាមពលសម្រាប់រថយន្តអគ្គិសនី អ្នកបើកបរមានជម្រើសតែ ២ គត់ គឺបញ្ចូលថាមពលនៅឯផ្ទះ ឬនៅតាមស្ថានីយនៅក្បែរផ្លូវ។
បច្ចេកវិទ្យាថ្មីដែលត្រូវបានលើកឡើងដោយ ឥណ្ឌូណេស៊ី នេះ នឹងដំណើរការដូចទៅនឹងវិធីបញ្ចូលថាមពលគ្មានខ្សែរបស់ឧបករណ៍មួយចំនួន ដោយប្រើប្រាស់បច្ចេកវិទ្យាអាំងឌុចស្យុងអេឡិចត្រូម៉ាញេទិច។ ខ្សែភ្លើងនឹងត្រូវបានបង្កប់ក្រោមផ្លូវល្បឿនលឿន និងបង្កើតដែនអេឡិចត្រូម៉ាញ៉េទិច ដែលអាចភ្ជាប់ដោយមិនប្រើខ្សែជាមួយនឹងឧបករណ៍ពិសេសនៅក្នុងរថយន្តអគ្គិសនី ដើម្បីបំប្លែងវាទៅជាអគ្គិសនី ជួយបញ្ចូលថាមពលទៅក្នុងថ្មរបស់រថយន្តអគ្គិសនី។ ខាងក្រោមដងផ្លូវនេះក៏ត្រូវបានដំឡើងប្រព័ន្ធទំនាក់ទំនង ដូច្នេះ អាចដឹងបានថា រថយន្តណាកំពុងស្ថិតនៅលើគន្លងផ្លូវនេះ ដើម្បីចាប់ផ្ដើមដំណើរការបញ្ចូលថាមពល។
យោងតាមស្ថាប័នទទួលបន្ទុកអភិវឌ្ឍហេដ្ឋារចនាសម្ព័ន្ធនៅរដ្ឋធានីថ្មី Nusantara ប្រព័ន្ធគន្លងផ្លូវបញ្ចូលថាមពលដូចខាងលើនេះ ត្រូវបានប្រើប្រាស់នៅក្នុងប្រទេសមួយចំនួន ហើយកំពុងប្រើប្រាស់សាកល្បងនៅក្នុងប្រទេសមួយចំនួនផ្សេងទៀត។ រដ្ឋាភិបាលឥណ្ឌូណេស៊ី ពិនិត្យលើជម្រើសនេះក៏ព្រោះតែរដ្ឋធានីថ្មីរបស់ប្រទេសនេះនឹងអនុញ្ញាតឱ្យមានតែយានយន្តអគ្គិសនី ឬយានយន្តដំណើរការស្វ័យប្រវត្តដែលល្អសម្រាប់បរិស្ថានប៉ុណ្ណោះ។
ក្រៅពីគន្លងផ្លូវបង្កប់បច្ចេកវិទ្យាខាងលើ រដ្ឋធានីថ្មី Nusantara របស់ ឥណ្ឌូណេស៊ី ក៏នឹងមានហេដ្ឋារចនាសម្ព័ន្ធឆ្លាតវៃ និងស្ថិរភាពជាច្រើនទៀតផងដែរ។
កន្លងមក ប្រធានាធិបតីឥណ្ឌូណេស៊ី លោក Joko Widodo បានប្រកាសថា អ្នកដែលចូលចិត្តជិះរថយន្តប្រើប្រាស់ម៉ាស៊ីនចំហេះក្នុង មិនគួររើទៅនៅរដ្ឋធានីថ្មីឡើយ៕
