ក្រសួងដឹកជញ្ជូនវៀតណាម ទើបតែបានប្រកាសអំពីការវិនិយោគលើការសាងសង់អាកាសយានដ្ឋាន Lai Chau ក្នុងនោះ ក្រសួងនេះបានគាំទ្រ និងណែនាំឱ្យការស្ថាបនាព្រលានយន្តហោះថ្មីនេះ អាចឆ្លើយតបនឹងតម្រូវការដឹកជញ្ជូនទាំងវិស័យស៊ីវិល និងទាំងវិស័យការពារជាតិ។
«ស្នើឱ្យរដ្ឋបាលខេត្ត Lai Chau ដឹកនាំការសិក្សាលើការវិនិយោគព្រលានយន្តហោះ Lai Chau។ ក្រសួងដឹកជញ្ជូននឹងសហការជាមួយខេត្ត Lai Chau ក្នុងការអនុវត្ត» ប្រកាសរបស់ក្រសួងដឹកជញ្ជូនវៀតណាម ឱ្យដឹងដូច្នេះ។
កាលពីថ្ងៃទី ៣០ សីហា ការិយាល័យរដ្ឋាភិបាលវៀតណាម បានចេញលិខិតមួយស្ដីអំពីការបញ្ជូនយោបល់ និងការណែនាំរបស់ ឧបនាយករដ្ឋមន្ត្រី Le Van Thanh ទាក់ទងនឹងការវិនិយោគ ស្ថាបនាអាកាសយានដ្ឋានក្នុងខេត្ត Lai Chau នៅភាគខាងជើងប្រទេសនេះ ជាប់នឹងព្រំដែនចិន។
ក្រោយការពិនិត្យសំណើរបស់រដ្ឋបាលខេត្ត Lai Chau ដែលបានស្នើឱ្យមានការវិនិយោគ ស្ថាបនាព្រលានយន្តហោះ Lai Chau ទៅតាមរូបមន្ត PPP (ភាពជាដៃគូរវាងរដ្ឋ និងឯកជន) និងស្នើឱ្យប្រគល់គម្រោងនេះឱ្យខេត្ត Lai Chau គ្រប់គ្រងការអនុវត្តគម្រោងនេះ ឧបនាយករដ្ឋមន្ត្រី Le Van Thanh ក៏បានស្នើឱ្យបញ្ជូនសំណើនេះឡើងទៅកាន់នាយករដ្ឋមន្ត្រី ដើម្បីពិនិត្យសម្រេច។
យោងតាមអាជ្ញាធរខេត្ត Lai Chau ព្រលានយន្តហោះ Lai Chau ត្រូវបាននាយរដ្ឋមន្ត្រីវៀតណាម កំណត់ជាគោលដៅអភិវឌ្ឍ កាលពីខែកុម្ភៈ ២០១៨ ដោយកំណត់ថា ព្រលានយន្តហោះនេះនឹងត្រូវបានស្ថាបនាលើផ្ទៃដី ១៦៧ ហិកតា ជាមួយនឹងទុនវិនិយោគប្រមាណ ៨ ទ្រីលានដុង (ប្រហែល ៣៤០ លានដុល្លារអាម៉េរិក)។
មុននោះ សារព័ត៌មានវៀតណាម ដែលបានចេញផ្សាយនាពេលថ្មីៗនេះ បានឱ្យដឹងថា តាមផែនការ គម្រោងអាកាសយានដ្ឋាន Lai Chau ដែលទើបត្រូវបានកែសម្រួលចុងក្រោយនេះ បង្ហាញថា នឹងអាចទទួលអ្នកដំណើរបានកន្លះលាននាក់/ឆ្នាំ ចាប់ពីឆ្នាំ ២០៣០ ដោយសាងសង់នៅលើផ្ទៃដីជាង ១១៧ ហិកតា។ គម្រោងដែលត្រូវបានគណនាឃើញថា ត្រូវការទុនវិនិយោគប្រហែល ៤.៣៥ ទ្រីលានដុង (ជាង ១៨៥ លានដុល្លារអាម៉េរិក) នេះ គ្រោងនឹងត្រូវស្ថាបនានៅក្នុងទីរួមស្រុក Tan Uyen នៃខេត្ត Lai Chau ក្បែរព្រំដែនចិនដីគោក ជាប់នឹងខេត្ត Yunnan៕
