ក្នុងកាលៈទេសៈដែល អង់គ្លេស កំពុងប្រឈមមុខនឹងឱនភាពសេដ្ឋកិច្ចអូសបន្លាយដោយសារតែការចំណាយរបស់គ្រួសារនីមួយៗបានកើនឡើងទ្វេដង នាយិការដ្ឋមន្ត្រីថ្មីរបស់ អង់គ្លេស បានប្រកាសថា នឹងធ្វើសកម្មភាពភ្លាមៗដើម្បីការពារអ្នកប្រើប្រាស់។
កាលពីថ្ងៃទី ០៨ កញ្ញា នាយិការដ្ឋមន្ត្រីថ្មីរបស់ អង់គ្លេស លោកស្រី Liz Truss បានប្រកាសកំណត់ពិតាននៃការចំណាយលើថាមពលសម្រាប់អ្នកប្រើប្រាស់ដែលបច្ចុប្បន្នកំពុងកើនឡើងខ្ពស់ និងជំរុញប្រភពថាមពលថ្មី ដោយប្រើប្រាស់កញ្ចប់ជំនួយបន្ថែមតម្លៃ ១០០ ពាន់លានផោន (១១៥ ពាន់លានដុល្លារអាម៉េរិក)។ កញ្ចប់ជំនួយថ្មីនេះ ត្រូវបានលើកឡើងថា ដើម្បីជួយកាត់បន្ថយផលប៉ះពាល់នៃសេដ្ឋកិច្ចដែលកើតឡើងដោយសារសង្គ្រាមរវាង រុស្ស៊ី និង អ៊ុយក្រែន។
នាយិការដ្ឋមន្ត្រីថ្មីរបស់ អង់គ្លេស បានប្រកាសថា នឹងធ្វើសកម្មភាពភ្លាមៗដើម្បីការពារអ្នកប្រើប្រាស់ និងសហគ្រាសនានា ទន្ទឹមនឹងការដោះស្រាយបញ្ហាឱ្យដល់ឫសគល់។
លោកស្រី Liz Truss ក៏គ្រោងនឹងអនុញ្ញាតឱ្យមានសកម្មភាពរុករកប្រភពធនធានរ៉ែប្រេង និងឧស្ម័ននៅលើសមុទ្រខាងជើង ព្រមទាំងលុបចោលបទបញ្ជាហាម «កាប់ឆ្ការ» ឆ្នាំ ២០១៩ ដែលត្រូវបានប្រើប្រាស់ក្នុងការរុករករ៉ែ បើសិនសហគមន៍ក្នុងតំបន់ឯកភាព។
ក៏ប៉ុន្តែ មានមតិជាច្រើនយល់ថា វិធានការខាងលើនឹងមិនអាចជួយដោះស្រាយបញ្ហាក្នុងរយៈពេលខ្លីបានឡើយ ព្រោះថា ជាធម្មតា ការផលិតប្រេង ឬឧស្ម័ននឹងត្រូវចំណាយពេលពី ៥ ដល់ ១០ ឆ្នាំ៕