ប្រេងនៅ អាស៊ី បានឡើងថ្លៃជាង ២ ដុល្លារក្នុង ១ ធុង នៅក្នុងការជួញដូរនាល្ងាចថ្ងៃទី ០៥ កញ្ញា នៅពេលអ្នកវិនិយោគកំពុងផ្ដោតការយកចិត្តទុកដាក់លើឥរិយាបថរបស់អង្គការនៃក្រុមប្រទេសនាំចេញប្រេងរ៉ែ (OPEC) និងក្រុមប្រទេសជាដៃគូ (OPEC+) ដោយសង្ឃឹមថា នឹងមានការកាត់បន្ថយបរិមាណដើម្បីជួយលើកកម្ពស់តម្លៃប្រេង។
ក្នុងការជួញដូរល្ងាចនេះ តម្លៃប្រេង Brent ប្រគល់មានកាលកំណត់ បានឡើងថ្លៃ ២.៤២ ដុល្លារ ប្រហែល ២.៦% ដោយលក់ក្នុងតម្លៃ ៩៥.៤៤ ដុល្លារ/ធុង បន្ទាប់ពីបានឡើងថ្លៃ ០.៧% កាលពីចុងសប្ដាហ៍កន្លង។ តម្លៃប្រេង WTI របស់ សហរដ្ឋអាម៉េរិក គឺ ៨៨.៩២ ដុល្លារ/ធុង កើន ២.០៥ ដុល្លារ ប្រហែល ២.៤% ក្រោយពីឡើងថ្លៃ ០.៣% ក្នុងការជួញដូរមុននោះ។
តម្លៃប្រេងបានថយចុះក្នុងរយៈពេល ៣ ខែជាប់ៗគ្នាកន្លងទៅ បន្ទាប់ពីបានឡើងខ្ពស់បំផុតក្នុងអំឡុងច្រើនឆ្នាំកាលពីខែមីនាឆ្នាំនេះ ព្រោះតែមានការបារម្ភអំពីការដំឡើងការប្រាក់ និងវិធានការទាក់ទងនឹងកូវីដ-១៩ នៅក្នុងតំបន់មួយចំនួនរបស់ ប្រទេសចិន ដែលជាអ្នកនាំចូលប្រេងឆៅលំដាប់កំពូលរបស់ពិភពលោក ដែលអាចធ្វើឱ្យកំណើនសេដ្ឋកិច្ចពិភពលោកត្រូវយឺតយ៉ាវ ហើយកាត់បន្ថយការប្រើប្រាស់ថាមពល។
ក៏ប៉ុន្តែ វិធានការទាក់ទងនឹងបញ្ហាកូវីដ-១៩ នៅ ប្រទេសចិន ពិសេសគឺនៅតំបន់ Shenzhen ដែលជាមជ្ឈមណ្ឌលបច្ចេកវិទ្យាដ៏ធំមួយរបស់ពិភពលោក ត្រូវបានបន្ធូរបន្ថយនៅថ្ងៃនេះ នៅពេលតួលេខនៃករណីវិជ្ជមាននឹងកូវីដ-១៩ មានសញ្ញាប្រសើរឡើងវិញ៕
