នៅថ្ងៃទី5 ខែតុលា ឆ្នាំ2017 ម្សិលមិញនេះ ជាទិវាគ្រូបង្រៀនដែលក្រសួងអប់រំ យុវជន និងកីឡា បានប្រារព្ធឡើងក្រោមប្រធានបទ «គ្រូបង្រៀនជាវិស្វករព្រលឹងនៃយុវជនជំនាន់ក្រោយ» ដែលទិវានេះជាទិវាដ៏មានសារៈសំខាន់ក្នុងការលើកតម្លៃគ្រូបង្រៀននៅកម្ពុជា។
ដើម្បីត្រៀមសម្រាប់ទិវាដ៏មានសារៈសំខាន់នេះ ក្រសួងអប់រំ យុវជន និងកីឡា បានធ្វើយុទ្ធនាការជាច្រើនដូចជា ការប្រកួតសូត្រកំណាព្យថ្នាក់ជាតិ និងការប្រកួតតែងនិពន្ធលើប្រធានបទទាក់ទងនឹងគ្រូបង្រៀនជាដើម។ ហើយសម្រាប់កម្មវិធីនៅថ្ងៃនេះវិញ ក្រសួងអប់រំ បានប្រារព្ធឡើងនៅវិទ្យាស្ថានជាតិអប់រំ ដែលមានការចូលរួមពីសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងមន្ត្រីក្នុងវិស័យអប់រំប្រមាណជាជាងមួយពាន់នាក់។
នៅក្នុងពិធីនោះ សម្តេចនាយករដ្ឋមន្ត្រីបានប្រកាសថា រាជរដ្ឋាភិបាលនឹងដំឡើងប្រាក់ខែអប្បបរមាពីប្រាក់ខែ 95ម៉ឺនរៀលនៅឆ្នាំនេះ ទៅដល់ជាងមួយលានរៀលនៅឆ្នាំ 2018 ខាងមុខនេះ។
សម្តេចតជោ ហ៊ុន សែន បានលើកឡើងថា ទិវាគ្រូបង្រៀននេះពិតជាមានតម្លៃយ៉ាងខ្លាំងចំពោះលោកគ្រូ-អ្នកគ្រូទូទាំងប្រទេស ដើម្បីរំឭកដល់គុណសម្បត្តិដ៏ថ្លៃថ្លារបស់គ្រូបង្រៀនដែលបានផ្តល់នូវចំណេះដឹងដល់អ្នកជំនាន់ក្រោយ។ ហើយតាមប្រធានបទនេះ គឺពិតជាមានតម្លៃសម្រាប់ គ្រូបង្រៀនដែលជាមនុស្សដ៏សំខាន់ ជាព្រលឹងមនុស្សជំនាន់ក្រោយ។ រាជរដ្ឋាភិបាលកំពុងយកចិត្តទុកដាក់ផ្តោតសំខាន់ទៅលើវិស័យអប់រំ គឺរួមទាំងស្ថាប័នរដ្ឋ និងស្ថាប័នឯកជន ដែលបានបង្កើតសាលារៀនរាប់ពាន់ដែលកំពុងបម្រើលើវិស័យនេះនៅទូទាំងប្រទេស ហើយកំពុងបណ្តុះបណ្តាលបុត្រាបុត្រីខ្មែរប្រមាណជាង 3លាននាក់។
សម្តេចនាយករដ្ឋមន្ត្រីក៏បានបញ្ជាក់ផងដែរថា គ្រូបង្រៀនទាំងអស់ដែលត្រូវចូលនិវត្តន៍នៅអាយុ 60ឆ្នាំ អាចនឹងត្រូវពន្យារពេលចូលនិវត្តន៍នៅអាយុ 65ឆ្នាំវិញ ព្រោះស្ថានភាពសុខភាពរបស់លោកគ្រូ-អ្នកគ្រូជាច្រើននាពេលបច្ចុប្បន្នមានលក្ខណៈល្អប្រសើរ ពោលគឺពួកគាត់នៅមានថាមពលខ្លាំងដែលអាចបន្តជួយបណ្តុះបណ្តាលធនធានមនុស្សរបស់កម្ពុជាបានក្នុងរយៈពេលវែង៕
