រថយន្តអគ្គិសនីបាន និងកំពុងគ្រប់គ្រងទីផ្សារទាំងក្នុងប្រភេទប្រណិត ទាំងក្នុងប្រភេទតម្លៃទាប នៅក្នុងប្រទេសដែលមានប្រជាជនជាងពាន់លាននាក់មួយនេះ។
នៅពេលរថយន្តអគ្គិសនីកាន់តែពេញនិយមនៅលើពិភពលោក ការប្រកួតប្រជែងរវាងអ្នកផលិតក៏កាន់តែកើនឡើងខ្ពស់។ នៅក្នុងប្រទេសមួយចំនួន បណ្ដាក្រុមហ៊ុននាំគ្នាប្រជែងតែក្នុងប្រភេទរថយន្តប្រណិត តម្លៃថ្លៃ និងកំពុងរកវិធីដើម្បីមានប្រៀបលើគ្នាក្នុងតម្លៃ ខណៈដែលអ្នកផលិតផ្សេងទៀត បែរជាវាយលុកទាំងនៅក្នុងប្រភេទប្រណិត ទាំងក្នុងប្រភេទតម្លៃទាប។
នៅលោកខាងលិច បណ្ដាក្រុមហ៊ុនផលិតរថយន្តអគ្គិសនី (នាំមុខដោយ Tesla) សុទ្ធតែបានទទួលជោគជ័យនៅ សហរដ្ឋអាម៉េរិក ដោយការបញ្ចេញរថយន្តប្រភេទប្រណិតទៅក្នុងទីផ្សារ និងពង្រីកបន្តិចម្ដងៗ ទៅកាន់ប្រភេទតម្លៃទាបដែលមានបរិមាណច្រើន។ ឆ្នាំ ២០១៩ រថយន្តប្រភេទ Hybrid (ប្រើប្រាស់ម៉ាស៊ីចំហេះក្នុងមួយគ្រឿង និងម៉ូទ័រអគ្គិសនីមួយគ្រឿង) ត្រូវបានដាក់លក់នៅ សហរដ្ឋអាម៉េរិក។ យោងតាម Bloomberg ឆ្នាំ ២០២២ តួលេខនេះនឹងកើនឡើងដល់ ១.៤ លានគ្រឿង។
នៅឯ ប្រទេសចិន វិញ រថយន្តអគ្គិសនីបាន និងកំពុងគ្រប់គ្រងទីផ្សារយ៉ាងពេញទំហឹង ទាំងក្នុងប្រភេទប្រណិត ទាំងក្នុងប្រភេទតម្លៃទាប។ រថយន្ត Hybrid ប្រមាណ ៥៦៧,០០០ គ្រឿង ត្រូវបានលក់ចេញនៅក្នុងខែកក្កដាកន្លងទៅ កើន ១២០% ធៀបនឹងមួយខែមុននោះ។ Bloomberg ព្យាករថា រថយន្តអគ្គិសនីសរុប ៦ លានគ្រឿងនឹងត្រូវបានប្រគល់ដល់ដៃអតិថិជននៅក្នុងឆ្នាំនេះ។
តម្រូវការទីផ្សាររបស់រថយន្តអគ្គិសនីអាចកើនឡើងខ្ពស់ជាងនេះបន្តទៀត នាពេលខាងមុខ នៅពេលអ្នកប្រើប្រាស់មានចំណាប់អារម្មណ៍កាន់តែខ្លាំង។ ប្រការនេះនឹងធ្វើឱ្យបរិមាណរថយន្តដើរដោយប្រេងសាំង ត្រូវថយចុះយ៉ាងឆាប់រហ័ស។
Bloomberg បានវាយតម្លៃថា ក្រុមអ្នកផលិតរថយន្តអគ្គិសនី បាន និងកំពុងទទួលជោគជ័យក្នុងប្រភេទរថយន្តអគ្គិសនីខ្នាតធំ និង SUV នៅ ប្រទេសចិន។ ភាពជោគជ័យបន្ទាប់អាចជាប្រភេទរថយន្តអគ្គិសនីខ្នាតតូច និងមធ្យម។ ការប្រកួតប្រជែងក្នុងវិស័យរថយន្តអគ្គិសនីនៅ ប្រទេសចិន សហរដ្ឋអាម៉េរិក និងបណ្ដាប្រទេសក្នុងពិភពលោក នឹងកាន់តែ «សាហាវ» ថែមទៀត នាពេលដ៏ខ្លីខាងមុខ៕
