ក្រុមបាល់ទាត់ជម្រើសជាតិនីហ្សេរីយ៉ា ទុយនីស៊ី និងអេហ្ស៊ីប អាចនឹងដណ្តើមយកកៅអី 3 ក្នុងចំណោមកៅអីចំនួន 5 ដែលនឹងត្រូវផ្តល់ឲ្យសម្រាប់ការប្រកួតជម្រុះនៅតំបន់អាហ្វ្រិក នៅត្រឹមចុងសប្តាហ៍នេះ នៅពេលពួកគេធ្វើការប្រកួតជម្រុះ នៅចុងសប្តាហ៍នេះ ដើម្បីប្រជែងយកកៅអីទៅកាន់ប្រទេសរុស្ស៊ី នៅឆ្នាំក្រោយ។
ក្រុមបាល់ទាត់ជម្រើសជាតិនីហ្សេរីយ៉ា នឹងឈ្នះសិទ្ធិដើម្បីបង្ហាញខ្លួនជាលើកទី 6 របស់ពួកគេក្នុងយុទ្ធនាការកីឡាបាល់ទាត់ពិភពលោកមួយនេះ តាមរយៈការដណ្តើមបានជ័យជម្នះក្នុងទីក្រុង Uyo ពេលធ្វើជាម្ចាស់ផ្ទះទទួលក្រុមជម្រើសជាតិហ្សំប៊ី ក្នុងការប្រកួតពូល B។
ដោយឡែក ក្រុមជម្រើសជាតិទុយនីស៊ី នឹងត្រូវធ្វើដំណើរទៅកាន់ទឹកដីក្រុមហ្គីណេ និងត្រូវតែរកលទ្ធផលឲ្យបានល្អប្រសើរជាងក្រុមឈរលេខ2 គឺសាធារណរដ្ឋប្រជាធិបតេយ្យកុងហ្គោ ដែលនឹងត្រូវប៉ះជាមួយលីប៊ី ដើម្បីឈ្នះសិទ្ធិពីការប្រកួតក្នុងពូល A។ ក្រុមជម្រើសជាតិអេហ្ស៊ីប អាចនឹងបញ្ចប់ការរង់ចាំរយៈពេល28ឆ្នាំក្នុង World Cup តាមរយៈការដណ្តើមបានជ័យជម្នះលើទឹកដីខ្លួនឯងពេលជួបក្រុមកុងហ្គោប្រាហ្សាវីល៍ ប្រសិនបើអ៊ូហ្គង់ដា មិនអាចដណ្តើមបាន 3 ពិន្ទុពេញពេលប៉ះជាមួយនឹងក្រុមហ្គាណា។
ស្របពេលជាមួយគ្នានេះ ការប្រកួតក្នុងពូលផ្សេងទៀត ដែលកំពុងនាំមុខដោយក្រុមជម្រើសជាតិកូតឌីវ័រ និងបួគីណាហ្វាសូ មិនទាន់អាចកាត់សេចក្តីបានឡើយ បន្ទាប់ពីការប្រកួតនៅថ្ងៃស្អែកនេះ ទោះបីស្ថិតក្នុងលទ្ធផលបែបណាក៏ដោយ។ ក្រោយពីឈ្នះ 2-1 លើទឹកដីក្រុមហ្សំប៊ី កាលពីឆ្នាំមុន នីហ្សេរីយ៉ា ពិតជាមានសុទិដ្ឋិនិយម ជាពិសេសក្រោយពីបានបង្ហាញពីទម្រង់លេងយ៉ាងល្អទាំងក្នុង និងក្រៅទឹកដី ពេលប្រកួតជាមួយនឹងក្រុមម្ចាស់ជើងឯកទ្វីបអាហ្វ្រិក កាមេរូន កាលពីខែមុន។ ក្រោមជំនួយដ៏ធំពីសំណាក់ខ្សែបម្រើឆ្នើម Victor Moses និង John Mikel Obi នីហ្សេរីយ៉ា បានយកឈ្នះ 4-0 ក្នុងទីក្រុង Uyo និងស្មើ 1-1 ក្នុងទីក្រុង Yaounde ដើម្បីបញ្ចប់ការប្រជែងរបស់កាមេរូន តែម្តង។
លោក Gernot Rohr គ្រូបង្វឹករបស់នីហ្សេរីយ៉ា មិនរំពឹងថា នឹងអាចរកគ្រាប់បាល់បាន 4គ្រាប់ផ្សេងទៀតពេលប្រកួតជាមួយនឹងក្រុមជម្រើសជាតិហ្សំប៊ីឡើយ។ លោក Rohr បានប្រាប់អ្នកយកព័ត៌មានថា៖ «ខ្ញុំពិតជាមិនជឿថា ការដណ្តើមបានជ័យជម្នះដោយការរកគ្រាប់បាល់បាន 4គ្រាប់ នឹងកើតឡើងឡើយ ការឈ្នះដោយគ្រាប់បាល់1 ឬ2 ប្រហែលជាអាចទៅរួច»៕
កម្មវិធីប្រកួតចុងសប្តាហ៍
ថ្ងៃសុក្រ ទី6 ខែតុលា
ម៉ាលី v កូតឌីវ័រ ម៉ោង 2 ទៀបភ្លឺ
ថ្ងៃសៅរ៍ ទី7 ខែតុលា
អាហ្វ្រិកខាងត្បូង v បួគីណាហ្វាសូ ម៉ោង 8 យប់
អ៊ូហ្គង់ដា v ហ្គាណា ម៉ោង 8 យប់
កាមេរូន v អាល់ហ្សេរី ម៉ោង 11 យប់
នីហ្សេរីយ៉ា v ហ្សំប៊ី ម៉ោង 11 យប់
ហ្គីណេ v ទុយនីស៊ី ម៉ោង 12 យប់
លីប៊ី v កុងហ្គោ ម៉ោង 12 យប់
កាប់វែរ v សេណេហ្គាល់ ម៉ោង-12:30 យប់
ម៉ារ៉ុក v ហ្គាបុង ម៉ោង 2 ទៀបភ្លឺ
ថ្ងៃអាទិត្យ ទី8 ខែតុលា
អេហ្ស៊ីប v កុងហ្គ្រោ ម៉ោង 12 យប់
ប្រភពពី៖ Supersport.com
