ភ្នំពេញ៖ អបអរសាទរ! ប្រជាពលរដ្ឋដែលធ្វើដំណើរតាមស្ពានលីយ៉ុងផាត់(ព្រែកព្នៅ) នឹងលែងត្រូវបង់លុយដូចមុនទៀតហើយ ចាប់ពីថ្ងៃទី15 ខែតុលាខាងមុខនេះតទៅ ខណៈដែលរដ្ឋាភិបាលបានប្រកាសទិញស្ពាននេះពីលោកឧកញ៉ា លី យ៉ុងផាត់ យកមកគ្រប់គ្រងដោយរដ្ឋវិញ។
នៅលើទំព័រហេ្វសប៊ុកផ្ទាល់របស់សម្តេចនាយករដ្ឋមន្ត្រីនៅព្រឹកថ្ងៃទី5 ខែតុលានេះ បានឱ្យដឹងថា «ដើម្បីដោះស្រាយនូវការលំបាក និងជួយលើកកម្ពស់ជីវភាពប្រជាជន ពិសេសសម្រួលដល់ការធ្វើដំណើរទៅ-មករបស់ប្រជាពលរដ្ឋ ចាប់ពីម៉ោង00.00នាទី ថ្ងៃទី15 ខែតុលា ឆ្នាំ2017ខាងមុខនេះតទៅ ស្ពាន និងផ្លូវតភ្ជាប់ពីផ្លូវជាតិលេខ6A ទៅផ្លូវជាតិលេខ5 (ស្ពាន និងផ្លូវលី យ៉ុងផាត់ ព្រែកព្នៅ) នឹងត្រូវធ្វើដំណើរទៅ-មកដោយមិនបាច់បង់ថ្លៃឆ្លងកាត់ទៀតទេ រាជរដ្ឋាភិបាលនឹងទិញយកមកគ្រប់គ្រងវិញ»។
សម្តេចតេជោ ហ៊ុន សែន បានមានប្រសាសន៍បន្តទៀតថា ក្រសួងសេដ្ឋកិច្ច និងហិរញ្ញវត្ថុ ក្រសួងសាធារណការ និងដឹកជញ្ជូន សាលារាជធានីភ្នំពេញ និងស្ថាប័នពាក់ព័ន្ធត្រូវពិភាក្សាជាមួយក្រុមហ៊ុនដើម្បីពិនិត្យដោះស្រាយបញ្ហាមួយចំនួនដែលនៅសេសសល់។ សង្ឃឹមថា ប្រជាពលរដ្ឋយើងនឹងទទួលបានផលប្រយោជន៍ពីការសម្រេចនេះ។
គួររំឭកថា ស្ពានលី យ៉ុងផាត់ បានដាក់សម្ពោធឱ្យប្រើប្រាស់កាលពីថ្ងៃទី20 ខែកញ្ញា ឆ្នាំ2010 ដែលវិនិយោគ និងសាងសង់ដោយក្រុមហ៊ុនLYP Group ដោយចំណាយទឹកប្រាក់សរុបចំនួន 43លានដុល្លារអាមេរិក។ ស្ពាននេះមានបណ្តោយ996ម៉ែត្រ និងទទឹង14ម៉ែត្រ តភ្ជាប់ពីផ្លូវកប់ស្រូវ (ត្រើយខាងលិចបឹងទន្លេសាប) ទៅចំណុចស្ពានទី6 ផ្លូវជាតិលេខ6A (ត្រើយខាងកើតបឹងទនេ្លសាប) ដែលតម្រូវឱ្យមានការសាងសង់ផ្លូវបេតុងប្រវែង8,170ម៉ែត្រ ភ្ជាប់ពីគល់ស្ពានត្រើយខាងកើត ទៅផ្លូវជាតិលេខ6A។
សូមបញ្ជាក់ផងដែរថា ការផ្តល់កាដូថ្មីសម្រាប់ប្រជាពលរដ្ឋនេះ គឺធ្វើឡើងស្របពេលដែលសាលារាជធានីភ្នំពេញ និងក្រសួងសាធារណការ និងដឹកជញ្ជូន បានប្រកាសផ្អាកដំណើរការ មិនឱ្យប្រជាពលរដ្ឋធ្វើដំណើរលើស្ពានជ្រោយចង្វារចាស់ចាប់តាំងពីថ្ងៃទី1 ខែតុលាកន្លងមកដើម្បីធ្វើការជួសជុលរហូតដល់ចប់សព្វគ្រប់ ក្នុងរយៈពេលប្រមាណជា2ឆ្នាំខាងមុខ៕