ស្ថិតនៅក្នុងគោលបំណងនៃការពង្រឹងកិច្ចសហប្រតិបត្តិការនៅលើវិស័យពាណិជ្ជកម្មទ្វេភាគីរវាងកម្ពុជា-ថៃ ឱ្យកាន់តែមានភាពល្អប្រសើរ និងទទួលបានជោគជ័យបំផុតនោះ នាយកដ្ឋានជំរុញពាណិជ្ជកម្មក្រៅប្រទេសរបស់ថៃ បានរៀបចំវេទិការដ៏អស្ចារ្យលើកដំបូង BUSINESS MATCHING ដែលជាព្រឹត្តិការណ៍នៃការជួបគ្នារវាងបណ្តាពាណិជ្ជករថៃ ជាមួយនឹងអ្នកជំនួញមានសក្ដានុពលនៅកម្ពុជា ដើម្បីបានស្វែងយល់បន្ថែមពីទិដ្ឋភាពនៃការវិនិយោគរួម ក៏ដូចជាការបង្ហាញពីវិសាលភាពដែលបានមកពីកិច្ចសការវិនិយោគភាពជាដៃគូ។
នៅក្នុងព្រឹត្តិការណ៍ដែលរៀបចំឡើងដោយនាយកដ្ឋានជំរុញពាណិជ្ជកម្មក្រៅប្រទេសរបស់ថៃ ដោយមានការចូលរួមពីបណ្តាក្រុមហ៊ុននានាសរុបប្រមាណជិត100ក្រុមហ៊ុន ដែលមានបំណងស្វែងរកទីផ្សាររបស់ខ្លួននៅកម្ពុជានោះ លោកស្រី ជីរ៉ាណាន់ វង្សមង្គល ដែលជាទីប្រឹក្សាជាន់ខ្ពស់របស់នាយកដ្ឋានជំរុញពាណិជ្ជកម្មក្រៅប្រទេសរបស់ថៃប្រចាំនៅកម្ពុជា បានលើកឡើងថា សម្រាប់គោលបំណងរបស់កម្មវិធីនៃកិច្ចជំនួបគ្នារវាងពាណិជ្ជករទាំង 2 ប្រទេសនេះ គឺធ្វើឡើងដើម្បីជំរុញ និងលើកទឹកចិត្តដល់ពាណិជ្ជករថៃក្នុងការចាប់ដៃគូស្វែងរកទីផ្សារដ៏ល្អនៅកម្ពុជា។
លោកស្រីបានបញ្ជាក់ថា ៖ «បច្ចុប្បន្ននេះ ប្រជាជនកម្ពុជាភាគច្រើនកំពុងតែចាប់អារម្មណ៍ និងជឿទុកចិត្តខ្ពស់ជាមួយផលិតផលនានារបស់ថៃ ហើយក៏កំពុងតែទទួលប្រើប្រាស់យ៉ាងទូលាយផងដែរ ដែលក្នុងនោះរួមមានដូចជាផ្នែកចំណីអាហារ សម្លៀកបំពាក់ គ្រឿងសម្អាង គ្រឿងសំណង់ ក៏ដូចជាសម្ភារៈប្រើប្រាស់ប្រចាំថ្ងៃជាច្រើនទៀត »។ លោកស្រីបានបន្តទៀតថា ៖ ការផ្តល់ទំនុកចិត្តមកលើផលិតផលរបស់ថៃពីសំណាក់ជនជាតិកម្ពុជានេះ ក៏ព្រោះតែភាគច្រើនរបៀបរបបនៃការរស់នៅរបស់ជនជាតិទាំង2មានលក្ខណៈប្រហាក់ប្រហែលគ្នា ដែលក្នុងនោះរាប់ទាំងវប្បធម៌ និងអរិយធម៌ផងដែរ»។ ជាមួយគ្នានេះ លោកស្រីក៏បានបញ្ជាក់ប្រាប់ដល់បណ្តាពាណិជ្ជករដែលមានវត្តមាននៅក្នុងកម្មវិធីផងដែរ ពេលនេះវាគឺជាឱកាសដល់ប្រសើរបំផុតសម្រាប់អ្នកដែលមានបំណងពង្រីកទីផ្សារមកកាន់កម្ពុជា ខណៈពេលដែលមានបណ្តាអ្នកវិនិយោគបរទេសជាច្រើនទៀតក៏កំពុងសម្លឹងមកកាន់ទីផ្សារកម្ពុជាផងដែរនោះ ។
លោកឧកញ៉ា ចិត្រ សេរីសុភ័ក្ត្រ ជាសហគ្រិនដ៏ជោគជ័យវ័យក្មេង និងជាម្ចាស់ក្រុមហ៊ុនចំនួន5 នៅក្នុងដៃនោះ ក្នុងនាមជាពាណិជ្ជករកិត្តិយសនៅក្នុងព្រឹត្តិការណ៍ ដែលត្រូវបានអញ្ជើញដោយនាយកដ្ឋានជំរុញពាណិជ្ជកម្មក្រៅប្រទេសរបស់ថៃ និងជាអ្នកតំណាងពាណិជ្ជករកម្ពុជាបានថ្លែងថា ៖ «បច្ចុប្បន្ននេះ ប្រទេសកម្ពុជាត្រូវបានបណ្តាអ្នកវិនិយោគបរទេសជាច្រើនចាត់ទុកថា ជាកូនក្រមុំដ៏ស្រស់ស្អាត ដែលគ្រប់គ្នាប្រាថ្នាចង់បាន ហើយក៏ចង់សហការវិនិយោគជាមួយ ដែលក្នុងនោះរួមមានដូចជា ចិន កូរ៉េ ជប៉ុន វៀតណាម ក៏ដូចជាវិនិយោគិននៅតាមបណ្តាប្រទេសផ្សេងៗទៀត ។ ដោយឡែកសម្រាប់ប្រទេសថៃបច្ចុប្បន្ន ក៏បានក្លាយជាដៃគូវិនិយោគដ៏ជិតស្និទ្ធជាបណ្តើរៗជាមួយកម្ពុជាផងដែរ បើទោះបីជាមិនទាន់ឈានដល់ចំណុចកំពូលក៏ដោយ»។
នៅចំពោះមុខបណ្តាពាណិជ្ជករថៃ ដែលបានចូលរួមក្នុងព្រឹត្តិការណ៍ BUSINESS MATCHING កាលពីថ្ងៃទី03 ខែតុលា ឆ្នាំ2017 ក្នុងមជ្ឈមណ្ឌលពាណិជ្ជកម្ម Centra នាទីក្រុងបាងកក ប្រទេសថៃ លោកឧកញ៉ា ចិត្រ សេរីសុភ័ក្ត្រ ក៏បានបញ្ជាក់ប្រាប់ពីបទពិសោធន៍ និងភាពជោគជ័យរបស់លោកក្នុងកិច្ចសហការនាំយកផលិតផលពីប្រទេសថៃមកចែកចាយបន្តនៅលើទីផ្សារកម្ពុជាទៀតថា ៖ « សព្វថ្ងៃនេះ ខ្ញុំមានក្រុមហ៊ុនចំនួន5 រួមមានក្រុមហ៊ុន អចលនទ្រព្យ CSS Real Estate LLC , ហាងបញ្ចាំមហាសេរី Pawn shop, ក្រុមហ៊ុនទទួលផលិត ផលិតផលសម្ភស្ស និងក្រុមហ៊ុន Monsne Café Cambodia ដែលក្រុមហ៊ុនទាំងនេះស្ថិតនៅក្រោមការគ្រប់គ្រងរបស់ក្រុមហ៊ុនមេដ៏ធំមួយមានឈ្មោះថា Luxury Smile ។
ជាមួយនឹងដំណើរការយ៉ាងរលូនរបស់ក្រុមហ៊ុនទាំងអស់នេះ ខ្ញុំក៏ចាប់ដៃគូជាមួយក្រុមហ៊ុននៅប្រទេសថៃចំនួន 36 ក្រុមហ៊ុន ដើម្បីនាំយកផលិតផលពីប្រទេសថៃទៅលក់នៅលើកម្ពុជាប្រកបដោយភាពវិជ្ជមានគួរជាទីមោទនៈ ខណៈដែលក្នុងពេលដ៏ខ្លីខាងមុខនេះ ខ្ញុំនឹងពង្រីកកិច្ចសហការជាដៃគូរហូតដល់ 300ក្រុមហ៊ុន ក្នុងការនាំយកផលិតផលនានាពីប្រទេសថៃទៅផ្គត់ផ្គង់នៅលើទីផ្សារកម្ពុជាបន្ថែមទៀត»។
យ៉ាងណាក៏ដោយ ជាមួយនឹងព្រឹត្តិការណ៍ នៃកិច្ចជំនួបលើកដំបូងរវាងពាណិជ្ជករកម្ពុជា-ថៃ កាលពីពេលកន្លងទៅនេះ នាយកដ្ឋានជំរុញពាណិជ្ជកម្មក្រៅប្រទេសរបស់ថៃ បានរំពឹង និងសង្ឃឹមជឿជាក់ថា អាចជួយរឹតបណ្តឹងចំណងសហប្រតិបត្តិការធ្វើជំនួញកាន់តែស្អិតល្មួតទ្វេដង ជាពិសេស វាជាការបើកឱកាសកាន់តែងាយស្រួលសម្រាប់ពាណិជ្ជករទាំង2ប្រទេសផងដែរ ៕
