ឯកអគ្គរដ្ឋទូតចិន ប្រចាំ ប្រទេសរុស្ស៊ី Zhang Hanhui បានឱ្យដឹងថា លំហូរពាណិជ្ជកម្មរវាង ប្រទេសរុស្ស៊ី និង ប្រទេសចិន បានកើន ២៩% ក្នុងអំឡុងពីខែមករា ដល់ខែកក្កដា ឆ្នាំ ២០២២។
កាលពីថ្ងៃទី ១១ សីហា លោក Zhang Hanhui ដែលឯកអគ្គរដ្ឋទូតចិន ប្រចាំ ប្រទេសរុស្ស៊ី បានឱ្យដឹងថា កិច្ចសហការផ្នែកសេដ្ឋកិច្ចរវាងប្រទេសនេះ ជាមួយនឹង សហព័ន្ធរុស្ស៊ី កំពុងមានការរីកចម្រើន ហើយថា ការដោះដូរពាណិជ្ជកម្មអាចសម្រេចបានកំណត់ត្រាថ្មីនៅក្នុងឆ្នាំ ២០២២។ លោក Zhang Hanhui បញ្ជាក់ថា លំហូរពាណិជ្ជកម្មរវាងប្រទេសទាំងពីរ បានកើន ២៩% នៅក្នុងដំណាក់កាលពីខែមករា ដល់ខែកក្កដា ឆ្នាំនេះ។
«ខ្ញុំជឿថា (ការដោះដូរ) ពាណិជ្ជកម្មទ្វេភាគីនឹងកើនឡើងដល់កម្រិតខ្ពស់បំផុតថ្មីនៅចុងឆ្នាំនេះ ហើយវានឹងមានភាពរឹងមាំ ឆ្ពោះទៅកាន់គោលដៅ ២០០ ពាន់លានដុល្លារអាម៉េរិក ដែលបានកំណត់ដោយមេដឹកនាំប្រទេសរបស់យើង» ឯកអគ្គរដ្ឋទូតចិន ប្រចាំ ប្រទេសរុស្ស៊ី Zhang Hanhui បានអះអាងដូច្នេះ៕
