យន្តហោះដែលមានលេខសម្គាល់ AX-2129 បានហោះឡើងពីអាកាសយានដ្ឋាន Husein Sastranegara នៅខេត្តជ្វាខាងលិច ទៅចុះចតនៅលើមូលដ្ឋានទ័ពអាកាស Nakhon Sawan របស់ ប្រទេសថៃ ទៅតាមកិច្ចសន្យា។
ក្រុមហ៊ុនអាកាសចរណ៍អវកាស PT Dirgantara Indonesia (PTDI) ដែលជាកម្មសិទ្ធិរបស់ រដ្ឋឥណ្ឌូណេស៊ី ទើបតែបានប្រគល់យន្តហោះ NC212i ទៅឱ្យ នាយកដ្ឋានអាកាសចរណ៍កសិកម្ម និងបង្កើតភ្លៀងសិប្បនិម្មិតនៃព្រះរាជាណាចក្រថៃ (DRRAA)។
Wildan Arief ប្រធានផ្នែកហិរញ្ញវត្ថុ គ្រប់គ្រងហានិភ័យ និងធនធានមនុស្សរបស់ PTDI ឱ្យដឹងថា យន្តហោះ ដែលមានលេខសម្គាល់ AX-2129 បានហោះឡើងពីអាកាសយានដ្ឋាន Husein Sastranegara នៅខេត្តជ្វាខាងលិច ទៅចុះចតនៅលើមូលដ្ឋានទ័ពអាកាស Nakhon Sawan របស់ ប្រទេសថៃ កាលពីសប្ដាហ៍កន្លង។
លោក Arief និយាយថា NC212i គឺជាយន្តហោះពហុមុខងារ ហើយយន្តហោះ ១ គ្រឿងដែលទើបតែត្រូវបានប្រគល់ឱ្យ ប្រទេសថៃ នេះ គឺជាប្រភេទសម្រាប់ដឹកជញ្ជូនផ្នែកយោធា និងអាចកែច្នៃឱ្យទៅជាយន្តហោះសម្រាប់បាចសារធាតុបង្កើតភ្លៀងសិប្បនិម្មិត។
យោងតាមលោក Arief យន្តហោះ NC212i ១ គ្រឿងផ្សេងទៀតនឹងត្រូវបាន ឥណ្ឌូណេស៊ី ប្រគល់ឱ្យ ប្រទេសថៃ នៅចុងខែធ្នូខាងមុខ។
គិតមកដល់បច្ចុប្បន្ន PTDI បានប្រគល់យន្តហោះ និងឧទ្ធម្ភាគចក្រសរុប ៤៦៦ គ្រឿងរួចហើយ ទៅឱ្យអតិថិជននៅក្នុង និងក្រៅប្រទេស ក្នុងនោះក៏មានយន្តហោះ NC212i ផងដែរ។ NC212i គឺជាយន្តហោះជំនាន់ថ្មីបំផុតរបស់ត្រកូលយន្តហោះពហុមុខងារ NC212 និងអាចដឹកមនុស្សបាន ២៨ នាក់៕