ភ្នំពេញ- ស្របតាមគោលនយោបាយរបស់រាជរដ្ឋាភិបាល ក្រសួងទេសចរណ៍តែងតែជំរុញ និងលើកទឹកចិត្តដល់ម្ចាស់អាជីវកម្មទេសចរណ៍ ដូចជាសណ្ឋាគារ ភោជនីយដ្ឋាន រមណីយដ្ឋានទេសចរណ៍នានា ឱ្យចូលរួមប្រើប្រាស់ផលិតផល និងសម្ភារបរិក្ខារផលិតនៅក្នុងស្រុក និងចូលរួមបណ្ដុះបណ្ដាលវិជ្ជាជីវៈបុគ្គលិកជាពលរដ្ឋខ្មែរ ពិសេសត្រូវអនុវត្តតាមស្ដង់ដារបច្ចេកទេស ធ្វើយ៉ាងណាដើម្បីបង្កើតទីផ្សារការងារសម្រាប់ប្រជាជនខ្មែរដូចគ្នា។
ឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍បានលើកឡើងថា ការវិនិយោគដោយផ្ទាល់ក្នុងវិស័យទេសចរណ៍ ក៏ដូចជាជួយលើកតម្កើង និងគាំទ្រប្រើប្រាស់ផលិតផលក្នុងស្រុក ដូចជាតាមរយៈការបង្ហាញផ្ទះបាយប្រពៃណី និងគ្រឿងបរិក្ខារកសិកម្ម ដែលប្រជាពលរដ្ឋខ្មែរនៅតាមជនបទប្រើប្រាស់សម្រាប់ធ្វើការបង្កបង្កើនផលជាដើមនោះ បានបង្កើនឱកាសការងារដល់ប្រជាពលរដ្ឋខ្មែរយ៉ាងច្រើន។
ឯកឧត្តមបានបន្តថា ផ្ដើមចេញពីគោលនយោបាយឈ្នះ-ឈ្នះ របស់រាជរដ្ឋាភិបាលកម្ពុជាដែលមានសុខសន្តិភាពពេញលេញ និងមានការអភិវឌ្ឍរីកចម្រើនលើគ្រប់វិស័យ ក្នុងនោះវិស័យទេសចរណ៍កម្ពុជាដែលមានទេសចរណ៍វប្បធម៌ និងធម្មជាតិ ត្រូវបានរាជរដ្ឋាភិបាលចាត់ទុកថា ជាមាសបៃតង ដោយបាននិងកំពុងបោះជំហានរីកចម្រើនឡើងជាលំដាប់ ដោយរក្សាបាននូវកំណើនជារៀងរាល់ឆ្នាំ រួមចំណែកប្រមាណ 12% នៃផលិតផលក្នុងស្រុកសរុប និងផ្តល់ការងារដោយផ្ទាល់ប្រមាណជាង62ម៉ឺននាក់ និងដោយប្រយោលជាច្រើនម៉ឺននាក់ទៀត។
ក្នុងឆ្នាំ2016 កម្ពុជាទទួលបានទេសចរអន្តរជាតិជាង 5លាននាក់ ក្នុងកំណើន 5% ក្នុងនោះទេសចរអន្ដរជាតិមានចំនួនប្រមាណ 2.6លាននាក់ ក្នុងកំណើន12.5% ក្នុងរយៈពេល6ខែ ឆ្នាំ2017នេះ។ តាមការព្យាករ កម្ពុជានឹងទទួលបានទេសចរអន្តរជាតិប្រមាណ 5.4លាននាក់ នៅឆ្នាំ2017 និងប្រមាណ7លាននាក់ នៅឆ្នាំ2020៕
