វីយែន (រដ្ឋធានីរបស់ អូទ្រីស) ដែលជាទីក្រុងល្បីឈ្មោះខ្លាំងទាក់ទងនឹងតំបន់ផ្សារណូអែល និងកម្មវិធីប្រគំតន្ត្រីអបអរឆ្នាំថ្មីយ៉ាងគគ្រឹកគគ្រេង នឹងបិទប្រព័ន្ធអំពូលភ្លើងសាធារណៈមួយចំនួន ដោយសារតែតម្លៃថាមពលកើនឡើងខ្ពស់ខ្លាំង។
អ្នកនាំពាក្យរបស់ អាជ្ញាធររដ្ឋធានីវីយែន បានឱ្យដឹងថា យោងតាមផែនការសន្សំសំចៃថាមពល ឆ្នាំនេះនឹងមិនមាន «ពន្លឺណូអែល» នៅលើមហាវិថី Ring ដែលជាផ្លូវល្បីឈ្មោះមួយព័ទ្ធជុំវិញរដ្ឋធានីរបស់ អូទ្រីស។ ប្រភេទអំពូលភ្លើងទាំងឡាយក្នុងទីតាំងផ្សារណូអែល នៅទីលានខាងមុខអគារក្រុមប្រឹក្សាភិបាលរដ្ឋធានី នឹងត្រូវបានបើកតែនៅពេលយប់ប៉ុណ្ណោះ ពោលគឺមិនបើកចាប់ពីក្បាលព្រលប់ដូចឆ្នាំមុនៗឡើយ។
ក្រុមមន្ត្រីនៅ រដ្ឋធានីវីយែន បញ្ជាក់ថា ពួកគេមិនទាន់គណនាដឹងច្បាស់ថា នឹងសំច័យថាមពលបានប៉ុន្មាននៅឡើយ ប៉ុន្តែគម្រោងនេះត្រូវបានអនុវត្តបន្ទាប់ពីតម្លៃថាមពលកើនឡើងខ្ពស់ ដោយសារតែផលប៉ះពាល់ពីទណ្ឌកម្មរបស់ សហភាពអឺរ៉ុប ដែលបានដាក់ទៅលើ រុស្ស៊ី ព្រោះតែបានចូលឈ្លានពានលើ អ៊ុយក្រែន។
អូទ្រីស ជាប្រទេសដែលមានប្រជាជន ៩ លាននាក់ ពឹងផ្អែកភាគច្រើនទៅលើវិសទេសចរណ៍ ហើយរដូវបុណ្យនៅចុងឆ្នាំ គឺជាប្រភពចំណូលសំខាន់សម្រាប់សេដ្ឋកិច្ចប្រទេសនេះ។