ភ្នំពេញ៖ គ្រឿងសម្អាងក្លែងក្លាយដែលធ្វើឱ្យប៉ះពាល់ដល់សុខភាពអ្នកប្រើប្រាស់ ប្រមាណជាជិត100 តោន គិតជាទឹកប្រាក់ប្រមាណជាជិត 6លានដុល្លារអាមេរិក ត្រូវបានអាជ្ញាធរកម្ទេចចោលដើម្បីចៀសវាងកុំឱ្យប៉ះពាល់ដល់សុខភាពប្រជាពលរដ្ឋដែលជាអ្នកប្រើប្រាស់ និងខាតបង់ចំណូលពន្ធជូនរដ្ឋ។
ការដុតកម្ទេចចោលនេះបានធ្វើឡើងនៅព្រឹកថ្ងៃទី3 ខែតុលានេះនៅទីលានចាក់សំរាមនៅសង្កាត់ជើងឯក ខណ្ឌដង្កោ ដឹកនាំដោយសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងក៏មានការចូលរួមពីតំណាងស្ថានទូត ស្ថាប័នតុលាការ រួមទាំងអាជ្ញាធរមានសមត្ថកិច្ចពាក់ព័ន្ធជាច្រើនទៀតផងដែរ។
សម្តេចក្រឡាហោម ស ខេង បានលើកឡើងថា គ្រឿងសម្អាងទាំងនេះគឺសុទ្ធតែធ្វើឲ្យប៉ះពាល់យ៉ាងខ្លាំងដល់សុខភាពចំពោះអ្នកប្រើប្រាស់ ដូច្នេះសមត្ថកិច្ចត្រូវតែរឹតបន្តឹងបន្ថែមទៀតក្នុងការទប់ស្កាត់ហើយត្រូវតែស្វែងរកជនដែលប្រព្រឹត្តខុសមកផ្តន្ទាទោស។ សម្តេចបានមានប្រសាសន៍ដូច្នេះថា «អ្នកលក់គិតតែពីលុយ ប៉ុន្តែអ្នកប្រើប្រាស់គឺមានបញ្ហាសុខភាព ដូច្នេះសមត្ថកិច្ច មានវិធានការទប់ស្កាត់ការចរាចរលក់ដូរផលិតផលក្លែងក្លាយទាំងនេះឱ្យអស់ពីទីផ្សារ ក្នុងប្រទេសកម្ពុជា»។
ជាមួយគ្នានេះដែរ ឯកឧត្តម មាជ សុផាណា អនុរដ្ឋលេខាធិការក្រសួងមហាផ្ទៃបានលើកឡើងថា ផលិតផលក្លែងក្លាយទាំងនេះ គឺភាគច្រើនផលិតនៅប្រទេសថៃ អាមេរិក ស្វ៊ីស ចិន និងជប៉ុនជាច្រើន ហើយការដុតកម្ទេចនៅថ្ងៃនេះគឺមានចំនួនជាង80តោន បើគិតជាទឹកប្រាក់ប្រមាណជិត6លានដុល្លារអាមេរិក។ ឯកឧត្តមបញ្ជាក់ថា«ចំណែកជនល្មើសដែលសមត្ថកិច្ចឃាត់ខ្លួនបាននោះ ខ្លះត្រូវបានផ្តន្ទាទោស ខ្លះកំពុងគេចខ្លួនផងដែរ ហើយសមត្ថកិច្ចជំនាញ កំពុងបន្តនីតិវិធីស៊ើបអង្កេតតាមចាប់ជនល្មើសទាំងនោះ ក៍ដូចជាបោសសម្អាតគ្រឿងសម្អាងក្លែងក្លាយឱ្យអស់ពីក្នុងទីផ្សារប្រទេសកម្ពុជាផងដែរ»។
អ្នកជំនាញផ្នែកសុខភាពបាននិយាយថា ផលិតផលគ្រឿងសម្អាងក្លែងក្លាយទាំងនេះ ត្រូវបានគេរកឃើញថា បង្កផលប៉ះពាល់យ៉ាងខ្លាំងទៅដល់អ្នកប្រើប្រាស់ដែលភាគច្រើនជាស្ត្រី ដូចជាធ្វើឱ្យកើតមានប្រតិកម្មចាញ់នៅលើស្បែក មហារីកស្បែក ហើយអាចធ្វើឱ្យសារធាតុគីមីពុលទាំងនោះជ្រាបចូលទៅក្នុងខ្លួនមនុស្សនាំឱ្យប៉ះពាល់សុខភាពយ៉ាងធ្ងន់ធ្ងរ ជួនកាលមានទាំងករណីពុលស្លាប់ទៀតផង៕
