កាលពីរាត្រីថ្ងៃសៅរ៍ ទី30 កញ្ញា ឆ្នាំ 2017 កន្លងទៅនេះ បេក្ខនារីម្នាក់ ដែលបានចូលរួមប្រឡងនៅក្នុងវិធីចម្រៀង «សំនៀងឯក» របស់ទូរទស្សន៍បាយ័ន ដែលមកពីខេត្តសៀមរាបឈ្មោះ សុខ វិសាល បានទទួលនូវការបញ្ចេញមតិបន្ថែមពីគណៈកម្មការតារាចម្រៀងជើងចាស់គឺអ្នកស្រី ហ៊ឹម ស៊ីវន ថា ច្រៀងដូចកូនក្មេងច្រៀងលេង។ បេក្ខនារីមួយរូបនេះ បានបកស្រាយនូវបទចម្រៀងមួយបទក្រោមចំណងជើងថា «រាត្រីសេកុង» ជាបទមរតកដើម តែដោយហេតុថា នាងចម្រៀងមិនដល់តុងសំឡេង និងមានសមត្ថភាពមិនទាន់គ្រប់គ្រាន់ ទើបបណ្ដាលឱ្យគណៈកម្មការឱ្យដំបូន្មានយ៉ាងចាស់ដៃ។ ក្រោយមកទៀតក៏បានផ្ទុះការរិះគន់ពីសំណាក់មហាជនទៅកាន់អ្នកស្រី ហ៊ឹម ស៊ីវន ថា ជាការមើលងាយបេក្ខនារីម្នាក់នោះទៅវិញ។
ដោយឡែកគណៈកម្មការមួយរូបទៀត គឺអ្នកនាង ម៉េង កែវពេជ្ជតា បានបញ្ចេញមតិវែងអន្លាយមួយ នៅលើបណ្តាញសង្គមFacebook ចេញមុខបកស្រាយជំនួស អ្នកស្រី ហ៊ឹម ស៊ីវន ដោយបានអះអាងដូចខាងក្រោមនេះ៖
ជំរាបសួរបងប្អូនទស្សនិកជន និងមិត្តសម្លាញ់ទាំងអស់ !
ជាដំបូង ខ្ញុំសូមអភ័យទោសទុកជាមុន បើការនិយាយរបស់ខ្ញុំមានខុសឆ្គងត្រង់ចំណុចណាមួយ។ ប៉ុន្មានថ្ងៃនេះ ក្នុងបណ្តាញព័ត៌មានមួយចំនួនហាក់គ្របសង្កត់ទៅលើអ្នកបង ហ៊ឹម ស៊ីវនខ្លាំងណាស់ ។ ក្នុងនាមនាងខ្ញុំជាអ្នករួមការងារ នាងខ្ញុំសូមចិត្តបងប្អូន កុំរិះគន់ និងកុំមើលគាត់ក្នុងផ្លូវអាក្រក់អី គាត់មិនមានបំណងមាក់ងាយដល់បេក្ខនារីណាម្នាក់ដូចការមើលឃើញនោះទេ ។ សូមចាត់ទុកថា បងស្រីគាត់និយាយត្រង់ពេកទៅចុះ តែក៍ជាបទពិសោធមួយសម្រាប់អ្នកប្រឡងដែរ ។
ពាក្យចាស់ពោលថា ពុតគ្រូកុំត្រាប់ ច្បាប់គ្រូឱ្យយក ។ កោកៗ សឹកតែមាត់ត្រដោក ឆ្អែតពោះក្របី ។ អ្នកដែលត្រង់ រមែងរងរបួសច្រើនជាងអ្នកក្រឡិចក្រឡុច។ ការដែលអាចទទួលយកបាននូវគ្រប់រសជាតិ ក៍ជាភាពរឹងមាំមួយសម្រាប់ខ្លួនឯងដែរ ។ គ្មានការបង្រៀនណាដែលត្រជាក់ស្រេងរហូតនោះទ តែឥឡូវសូមផ្អាករឿងនេះមួយភ្លែតសិន យើងនាំគ្នាងាកមកមើលអត្ថបទដែលសរសេរដោយសារព័ត៌មានមួយនេះម្តង ។ តើបងប្អូនយល់ទេថា គាត់ចង់សរសេរពីអ្វី ? តើគាត់សរសេរខុស ឬខ្ញុំមើលច្រឡំ ? ម៉េចក៍ច្របូកច្របល់អីម្ល៉េះ ? លេងសើចពេកហើយ ព័ត៌មានអ៊ីចឹងៗ ក៍ចេះតែលើកយកមកផ្សាយអោយខូចកិត្តិយសគេដែរ ។ តើនរណាបង្រៀនគាត់ឱ្យសរសេរបែបហ្នឹង ? ណ្ហើយកុំឱ្យហត់ភ្នែក ខ្ញុំសូមចាប់យកចំណុចមិនស្ថិតក្នុងរង្វង់ក្រហមមួយនេះមកពិចារណាវិញ ។ បងប្អូនទស្សនិកជនជាទីគោរព ! បើយើងនិយាយពីរឿងរិះគន់ក្នុងន័យស្ថាបនាពីមហាជនវិញ យើងខ្ញុំទទួលយកបានដោយរីករាយ ។ ប៉ុន្តែការរិះគន់របស់ម្នាក់នេះចូលលក្ខណៈលើសហើយ.. លើសខ្លាំងទៀតផង ។ ដែលលើសខ្លាំងនោះគឺ ទី១តើហេតុអីក៍ត្រូវរាលដាលដល់កម្មវិធីសំនៀងចែងចាំងដែរ ? ចង់ផ្លែផ្កាឱ្យនរណា? ឱ្យខ្ញុំ ? ? ទី២ តើហេតុអីក៍អ្នករិះគន់ម្នាក់ហ្នឹងព្យាយាមប្រៀបធៀបកម្មវិធីនេះ ជាមួយកម្មវិធីនោះម្ល៉េះទាំងដឹងថា សំនៀងឯក ជាកម្មវិធីជាតិបង្កើតឡើងដោយកូនខ្មែរ ? មានបំណងអី ? ស្អប់ខ្មែរ ? មិនចង់ឃើញខ្មែររីកចម្រើន ? សូមនិយាយដោយចិត្តបរិសុទ្ធ ទាំងខ្ញុំ ទាំងគេ សូមអបអរ ដែលទូរទស្សន៍ក្នុងស្រុកមានកម្មវិធីពីបរទេសមកផ្សព្វផ្សាយ ប៉ុន្តែក្នុងនាមជាម្ចាស់ប្រទេសទាំងមូលមិនបាច់ធ្វើអីទេ ចាំតែយកពីគេ ត្រាប់តាមគេរហូតទៅឬយ៉ាងម៉េច? ហើយក្រែងយើងហ្នឹងឬ ដែលចង់ឱ្យខ្មែរមានអ្វីដែលជារបស់ខ្មែរ មិនលួចចម្លងនោះអី រួចគិតឃើញយ៉ាងម៉េចមកដើរស្រែកជេរ ស្រែករិះគន់ទើសទាល់មិនសម្រាកដូច្នេះ ? ឬក៍យល់ថា ខ្លួនគាត់អស្ចារ្យណាស់ទៅឬដែលអង្គុយត្រេកត្រអាលជាមួយតែកម្មវិធីគេហើយភ្លេចកំណើតខ្លួននោះ?!។
តើហេតុអីក៍អ្នករិះគន់ម្នាក់ហ្នឹងចូលចិត្តយកមនុស្សមកប្រៀបធៀបគ្នាម្ល៉េះ ? ឬគាត់កំពុងព្យាយាមធ្វើឱ្យអ្នកសិល្បៈខាំគ្នាដោយសារផលប្រយោជន៍បន្តិចបន្តួចហ្នឹង ? ឬចង់ឱ្យតារា និងប៉ុស្តិ៍ទូរទស្សន៍មើលមុខគ្នាមិនចំ? ហើយហេតុអីក៍ដឹងថា ប៉ុស្តិ៍ទូរទស្សន៍ទាំងនោះមិនត្រូវការពេជ្ជតា ? មាត់អត់គម្រប បើមិនដឹងរឿង សូមកុំចេះតែមានប្រសាសន៍ទាន!! សូមជម្រាបថា ការប្រឡងចម្រៀងសំនៀងចែងចាំងមិនធ្វើការបន្ត គឺគ្មានពាក់ព័ន្ធអ្វីនឹងការដើរទិញអីវ៉ាន់នៅផ្សារថ្មីរបស់ពេជ្ជតាទេ ហើយកម្មវិធីទាន់សម័យកម្រិតពិភពលោកនៅក្នុងទូរទស្សន៍ដែលអ្នកកំពុងតែអួតនោះ ក៍ធ្លាប់បានអញ្ជើញពេជ្ជតាមិនដឹងជាប៉ុន្មានសិបដងហើយដែរ ប៉ុន្តែលក្ខខណ្ឌចំពេលពេជ្ជតាជាប់កិច្ចការមិនអាចទទួលបាន។
ហេតុអីក៍ត្រូវបន្ទោសពេជ្ជតាដែរ ? ខ្លួនគាត់កំពុងរិះគន់គេថា មិនចេះធ្វើការរិះគន់ឱ្យសមតួនាទីជាមេប្រយោគ ប៉ុន្តែខ្លួនគាត់បែរជាធ្វើការរិះគន់មកលើអ្នកដទៃទាំងលម្អៀង មើលងាយ ដោយគំនិតរាក់កំភែលទៅវិញ!! ការរិះគន់បែបនេះ គឺក្នុងបំណងចំអក សើចយំ និងបញ្ឈឺដើម្បីឱ្យសប្បាយចិត្តតែខ្លួនឯងប៉ុណ្ណោះ គ្មានចេតនាស្ថាបនាអ្វីទេ។
បើតែយ៉ាងនេះ ថ្ងៃណាទើបអ្នកចេះដឹងមានឱកាសបញ្ចេញស្នាដៃទៅ?! ហើយតើគុណភាពពិតនៅឯណា បើពួកគេចូលចិត្តផ្អែម បញ្ចើចបញ្ចើ បោកបន្លំ ហើយមិនហ៊ានទទួលយកការពិតផងនោះ?! ស្រែករករបស់ Original តែខ្លួនកំពុងតែឱបរបស់ Copy ឡើងបែកញើសដៃ មិនចេះខ្មាស់គេ សូមរំឭកផងថា គ្មានបរទេសណាគេមកធ្វើបាបខ្មែរទេ បើខ្មែរគ្នាឯងមិនធ្វើបាបគ្នា ហើយបើបរទេសឈ្នះ យើងនោះក៍មិនមែនដែរ ព្រោះតែបរទេសគេខ្លាំង គីមកពីខ្មែរខ្លួនឯងហ្នឹងខ្សោយ ។ ពាក្យពិតរែងស្លែង ។ ទោះជាយ៉ាងណា ពេជ្ជតានៅតែមិនខ្លាច ។ សូមអរគុណនូវការគាំទ្រ ការស្រឡាញ់ និងការជឿជាក់ពីសំណាក់បងប្អូនទស្សនិកជន ។ សូមអរគុណ ម៉ោង4ព្រឹក ថ្ងៃទី3 ខែតុលា 2017 ។ សរសេរទាល់តែចប់មិនចាំស្អែកទេ អរគុណសម្រាប់ការអាន៕
