ក្លិបតោខៀវ Chelsea បានជួបនូវការខកចិត្តដ៏ធំមួយ ក្រោយពីសហព័ន្ធកីឡាបាល់ទាត់អេស្ប៉ាញ បានបញ្ជាក់ថា ខ្សែប្រយុទ្ធ Alvaro Morata បានរងរបួសក្នុងសាច់ដុំសរសៃពួររបស់គេ ខណៈដែលការរងបួសនេះអាចនឹងធ្វើឲ្យរូបគេត្រូវអវត្តមានយូរជាងរយៈពេល1ខែ។
Morata ដែលបានស៊ុតបាល់បញ្ចូលទី6គ្រាប់ក្នុងការប្រកួត7លើកនៃក្របខ័ណ្ឌ Premier League សម្រាប់ក្លិបថ្មីរបស់គេនោះ ត្រូវបានប្តូរចេញនៅរយៈពេល10នាទីចុងក្រោយនៃតង់ទី1 ក្នុងពេលក្រុមរបស់គេបានរងបរាជ័យក្នុងលទ្ធផល 1-០ ក្រោមស្នាដៃក្រុម Manchester City នាកីឡដ្ឋាន Stamford Bridge កាលពីថ្ងៃសៅរ៍ ក្រោយពីបានជួបបញ្ហាឈឺចុកចាប់ត្រង់ម្ដុំភ្លៅនៃជើងឆ្វេងរបស់គេ។
លោក Antonio Conte បានបញ្ជាក់ថា ការដកខ្លួនរបស់ Morata ត្រូវបានធ្វើឡើងទាំងការប្រុងប្រយ័ត្នខ្ពស់ ហើយការប្តូររូបគេចេញនេះ គឺដើម្បីធានាថា មិនឱ្យរូបគេរងរបួសធ្ងន់ធ្ងរ។ គ្រូបង្វឹករូបនេះបានបញ្ជាក់បន្ទាប់ពីចប់ការប្រកួតថា លោកបានគិតថា Morata នឹងត្រូវលុបឈ្មោះចេញពីក្រុមជម្រើសជាតិអេស្ប៉ាញ ដើម្បីទទួលការព្យាបាលនៅឯទីលានហ្វឹកហាត់។
ក្រុមជម្រើសជាតិអេស្ប៉ាញ បានធ្វើតេស្តដោយខ្លួនឯងទៅលើខ្សែប្រយុទ្ធវ័យ 24ឆ្នាំរូបនេះ កាលពីថ្ងៃអាទិត្យនៅឯមន្ទីរពេទ្យនៃសាកលវិទ្យាល័យ Sanitas ក្នុងទីក្រុងម៉ាឌ្រីដ។ ខ្សែប្រយុទ្ធអន្តរជាតិបែលហ្ស៊ិក Michy Batshuayi បច្ចុប្បន្នគឺជាជម្រើសដ៏គួរឲ្យកត់សម្គាល់តែម្នាក់គត់នៅតំបន់ប្រយុទ្ធ មុនពេល Morata អាចវិលត្រឡប់មកចូលលេងវិញបាន។
បច្ចុប្បន្នអតីតតារាឆ្នើមរបស់ក្លិប Real Madrid និង Juventus អាចនឹងប្រឈមមុខនឹងការអវត្តមានក្នុងការប្រកួតដ៏សំខាន់ចំនួន4របស់ក្របខ័ណ្ឌកំពូលអង់គ្លេស។ ក្រុមតោខៀវ នឹងត្រូវអវត្តមាន Morata ដូចគ្នាដែរសម្រាប់ការប្រកួតជាមួយនឹងក្រុម Crystal Palace, Watford, Everton និង Bournemouth៕
ប្រភពពី៖ The Guardian
