ភ្នំពេញ- អ្នកណាខ្លះដែលចូលចិត្ដញ៉ាំផ្លែទុរេន ជាពិសេសទុរេនកំពត តើលោកអ្នកធ្លាប់មានការលំបាកក្នុងការជ្រើសរើសវាយកមកញ៉ាំដែរឬទេ? តែចាប់ពីពេលនេះទៅលោកអ្នកនឹងលែងបារម្ភមិនខាន ព្រោះមិនយូរប៉ុន្មានទៀតទេ លោកអ្នកនឹងលែងលំបាក ឬបារម្ភព្រោះខ្លាចថា ជ្រើសរើសចំទុរេនកំពតក្លែងក្លាយយកមកពិសាទៀតហើយ។
នេះបើតាមប្រសាសន៍លោកឧកញ៉ា ហាក់ សុវណ្ណា ប្រធានក្រុមប្រឹក្សាភិបាលសម្ព័ន្ធនាំចេញកសិផល និងផ្លែឈើកម្ពុជា និងជាប្រធានសភាពាណិជ្ជកម្មខេត្ដកំពត កែប និងតាកែវ ដែលបានលើកឡើងថា ដោយសារតែមើលឃើញពីតម្រូវការដ៏ច្រើនពីអ្នកនិយមពិសាទុរេនកំពត ប៉ុន្ដែអតិថិជនមានការលំបាកក្នុងការជ្រើសរើសទុរេនរបស់ខេត្តកំពតឱ្យបានសុទ្ធនោះ សភាពាណិជ្ជកម្មខេត្ដគ្រោងនឹងបង្កើតឱ្យមានសមាគមទុរេនកំពតក្នុងពេលឆាប់ៗខាងមុខដើម្បីជួយសម្រួលដល់កិច្ចការទាំងនេះ។ លោកបន្ដថា ក្រៅពីបង្កើតសមាគមដើម្បីធានាឱ្យបានការដាំដុះដំណាំទុរេនប្រកបដោយនិរន្ដរភាព និងបង្កើនសក្ដានុពលក្នុងការដាំដុះបន្ថែមហើយនោះ សមាគមនឹងជួយសម្រួលដល់អតិថិជនទាំងអស់ឱ្យធ្វើយ៉ាងណាត្រូវតែទទួលបានផ្លែទុរេនកំពតពិតប្រាកដយកទៅពិសាដោយពុំប៉ះចំទុរេនក្លែងបន្លំ។
ប្រធានក្រុមប្រឹក្សាភិបាលសម្ព័ន្ធនាំចេញកសិផល និងផ្លែឈើកម្ពុជាបានលើកឡើងបន្ដថា ដើម្បីធានាឱ្យបានតម្លាភាពនៃប្រតិបត្ដិការក្នុងការផ្ដល់សេវាកម្មជូនដល់អតិថិជន សមាគមនឹងពន្យល់ណែនាំទៅដល់សមាជិកទាំងអស់ឱ្យយល់ពីសារប្រយោជន៍នៃភាពស្មោះត្រង់ទៅកាន់អតិថិជន និងគ្រោងបង្កើតលក្ខន្ដិកៈផ្ទៃក្នុងមួយចំនួន ដើម្បីដាក់ពិន័យដល់សមាជិកណាដែលមានចេតនាក្លែងបន្លំទុរេនយកមកពីកន្លែងផ្សេង ឬរកស៊ីមិនស្មោះត្រង់ជាមួយអតិថិជន។
លោកឧកញ៉ា ហាក់ សុវណ្ណា បញ្ជាក់ថា៖ «ក្រោយពេលយើងបង្កើតសមាគមទុរេនកំពតហើយ យើងនឹងកំណត់ទីតាំងសម្រាប់ផ្ដល់សេវាកម្មលក់ជូនអតិថិជន។ ឧទាហរណ៍បងប្អូនមកពីភ្នំពេញ ឬទីណាក៏ដោយដែលមកកម្សាន្ដនៅខេត្ដកំពត ហើយចង់ពិសាទុរេនកំពតគ្រាន់តែមករកទិញនៅក្នុងទីតាំង ឬហាងលក់ផ្លែឈើរបស់យើងដែលបានលើកស្លាកសមាគមទុរេនកំពតហើយនោះ បងប្អូននឹងបានទិញទុរេនកំពតសុទ្ធយកទៅពិសាដោយពុំចាំបាច់មានការព្រួយបារម្ភថា ប៉ះរបស់ក្លែងក្លាយនោះទេ។ យើងក៏មានគម្រោងបង្កើតទីតាំងសម្រាប់លក់នៅក្នុងទីក្រុងភ្នំពេញផងដែរ ពិសេសយើងនឹងគិតគូរអំពីតម្លៃសម្រាប់លក់ជូនអតិថិជន គឺធ្វើយ៉ាងណាឱ្យមានតម្លៃសមរម្យ អាចទទួលយកបាន»។
សព្វថ្ងៃនេះគេសង្កេតឃើញថា ដំណាំទុរេននៅទូទាំងប្រទេស ដូចជាទុរេនកំពង់ចាម ប៉ៃលិន ពិសេសទុរេនកំពតជាដើម នៅមិនអាចទាន់បំពេញតម្រូវការក្នុងស្រុកបាននៅឡើយទេ ដូច្នេះហេតុអ្វីបានជាគេមិនបងើ្កនការដាំដុះ? តើបញ្ហានេះកើតឡើងដោយសារតែអ្វី? វាកើតឡើងដោយសារតែការខ្វះផ្ទៃដីដាំដុះ ឬកសិផលប្រភេទនេះដាំដុះច្រើនពេកពិបាករកទីផ្សារ?។
ប្រធានក្រុមប្រឹក្សាភិបាលសម្ព័ន្ធនាំចេញកសិផល និងផ្លែឈើកម្ពុជាបានបញ្ជាក់ថា ចំពោះការកសិផលទុរេនខ្មែរមកពីតំបន់ផ្សេងៗ ឬទុរេនកំពតបច្ចុប្បន្នពុំមានការព្រួយបារម្ភចំពោះទីផ្សារទេ ព្រោះតម្រូវការក្នុងស្រុកដែលមានការកើនឡើងនោះធ្វើឱ្យយើងផ្គត់ផ្គង់ក្នុងស្រុកស្ទើរតែមិនគ្រប់ផង។ ប៉ុន្ដែមួយរយៈមុន ទុរេនកំពតមានបញ្ហាជំងឺធ្ងន់ធ្ងរ ប៉ុន្ដែពេលនេះយើងបានសហការជាមួយមន្ទីរកសិកម្មដោះស្រាយលើបញ្ហានេះរួចហើយ។ ទៅអនាគតប្រជាជនក្នុងស្រុកនឹងបង្កើនការដាំដុះបន្ថែមទៀតតាមរយៈកាចុះពន្យល់ណែនាំអំពីបច្ចេកទេសដាំដុះឱ្យស្របតាមបទដ្ឋាន និងទទួលបានផលច្រើន។
ទោះជាយ៉ាងណា លោកឧកញ៉ា ហាក់ សុវណ្ណា បានបញ្ជាក់ថា នៅពេលមានការដាំដុះច្រើន ទុរេនយើងកាន់តែមានសក្ដានុពល ទីមួយ គឺយើងផ្គត់ផ្គង់ទីផ្សារក្នុងស្រុកឱ្យបានគ្រប់គ្រាន់ ពិសេសទីពីរ យើងបានដឹងថា ទុរេនកំពតយើងកំពុងតែមានប្រជាប្រិយភាពខ្លាំង និងមានការចាប់អារម្មណ៍ពីប្រទេសថៃ និងវៀតណាមថា ទុរេនកំពតយើងមានគុណភាព និងរសជាតិឆ្ងាញ់ជាប់ចិត្ដជាងទុរេនរបស់គេទៀតផង៕