ម៉ូដែលយន្តហោះពាណិជ្ជកម្ម C919 របស់ ប្រទេសចិន បានបញ្ចប់ដំណាក់កាលហោះហើរសាកល្បងដោយជោគជ័យ និងកំពុងរង់ចាំទទួលវិញ្ញាបនបត្រទទួលស្គាល់ការហោះហើរ។
ដកស្រង់អត្ថបទបង្ហោះលើទំព័របណ្ដាញសង្គមផ្លូវការរបស់ ក្រុមហ៊ុនផលិតយន្តហោះពាណិជ្ជកម្មចិន (COMAC) កាលពីថ្ងៃទី ២៣ កក្កដា ទីភ្នាក់ងារសារព័ត៌មាន Reuters បានចុះផ្សាយថា យន្តហោះពាណិជ្ជកម្មដំបូងដែលអភិវឌ្ឍដោយ ប្រទេសចិន បានបញ្ចប់ការហោះហើរ ៦ លើកដោយជោគជ័យ និងកំពុងរង់ចាំនាយកដ្ឋានអាកាសចរណ៍ស៊ីវិលចិន ផ្ដល់វិញ្ញាបនបត្រទទួលស្គាល់ ដើម្បីដំណើរការជាផ្លូវការ។
ទីក្រុងប៉េកាំង បានចាប់ផ្ដើមកម្មវិធីផលិតយន្តហោះ C919 តាំងពីឆ្នាំ ២០០៨ ប៉ុន្តែ បានជួបបញ្ហាជាច្រើនទាក់ទិននឹងការកំណត់ និងបច្ចេកទេស ក្នុងនោះមានទាំងការគ្រប់គ្រងការនាំចេញរបស់ សហរដ្ឋអាម៉េរិក ផងដែរ។
បើទោះជាត្រូវបានដំឡើងនៅ ប្រទេសចិន ប៉ុន្តែ ផ្នែកសំខាន់ៗជាច្រើនរបស់យន្តហោះ C919 ដូចជាប្រព័ន្ធបញ្ជា ឬម៉ាស៊ីនជាដើម ត្រូវបានផ្គត់ផ្គង់ពីបណ្ដាប្រទេសលោកខាងលិច។ ដំណាក់កាលអភិវឌ្ឍជាផ្លូវការបានចាប់ផ្ដើមពីឆ្នាំ ២០១១ ហើយយន្តហោះដំបូងត្រូវបានដំឡើងពេញលេញនៅក្នុងឆ្នាំ ២០១៥។
យន្តហោះ C919 ដំបូង គ្រោងនឹងត្រូវបានប្រគល់ឱ្យក្រុមហ៊ុនអាកាសចរណ៍ជាតិចិន Eastern Airlines នៅក្នុងខែសីហាខាងមុខ។ Eastern Airlines បានបញ្ជាទិញយន្តហោះ C919 ចំនួន ៥ គ្រឿង កាលពីខែមីនា ឆ្នាំ ២០២១។
យន្តហោះ C919 ត្រូវបានផលិតឡើងដើម្បីប្រកួតប្រជែងជាមួយនឹងយន្តហោះ 320neo របស់ក្រុមហ៊ុន Airbus និងយន្តហោះ Boeing 737 MAX របស់ សហរដ្ឋអាម៉េរិក។ ក៏ប៉ុន្តែ ទីផ្សារយន្តហោះនៅ ប្រទេសចិន នៅមានការនិយមប្រើប្រាស់យន្តហោះរបស់ សហរដ្ឋអាម៉េរិក នៅឡើយ ដូច្នេះ Eastern Airlines ទំនងជាត្រូវចំណាយពេលយូរទៀតទើបអាចមានសមត្ថភាពដណ្ដើមទីផ្សារបានច្រើន៕
