ការជួញដូរក្នុងថ្ងៃទី ១៩ កក្កដា តម្លៃប្រេង WTI របស់ សហរដ្ឋអាម៉េរិក ដែលប្រគល់ក្នុងខែសីហា កើន ១.៦% ខណៈដែលនៅ អង់គ្លេស តម្លៃប្រេង Brent ប្រគល់ក្នុងខែកញ្ញា កើន ១%។
តម្លៃប្រេងរ៉ែពិភពលោកក្នុងការជួញដូរថ្ងៃទី ១៩ កក្កដា បានកើនបន្តិច ក្នុងគ្រាដែលនៅមានការបារម្ភអំពីការរឹតបន្តឹងប្រភពផ្គត់ផ្គង់ ដែលជះឥទ្ធិពលដល់ទីផ្សារ។
ជាក់ស្ដែង តម្លៃប្រេង West Texas Intermediate (WTI) របស់ សហរដ្ឋអាម៉េរិក ប្រគល់ក្នុងខែសីហា បានកើន ១.៦២ ដុល្លារ (ស្មើនឹង ១.៦%) ដោយបញ្ចប់ការជួញដូរក្នុងតម្លៃ ១០៤.២២ ដុល្លារ/ធុង នៅក្នុងទីផ្សារ New York។ ចំណែកនៅ ទីក្រុងឡុងដ៍ (អង់គ្លេស) តម្លៃប្រេង Brent ប្រគល់ក្នុងខែកញ្ញា ក៏បានកើន ១.០៨ ដុល្លារ (ស្មើនឹង ១%) និងបញ្ចប់ការជួញដូរក្នុងតម្លៃ ១០៧.៣៥ ដុល្លារ/ធុង។
មុននោះ ក្នុងការជួញដូរថ្ងៃទី ១៨ កក្កដា ប្រេង WTI និង ប្រេង Brent សុទ្ធតែកើនលើសពី ៥%។ តម្លៃប្រេងបានងើបឡើងវិញទៀត នៅពេលការបារម្ភអំពីការរឹតបន្តឹងប្រភពផ្គត់ផ្គង់ ធំជាងការបារម្ភដែលថា តម្រូវការប្រើប្រាស់នឹងថយចុះនៅចំពោះមុខហានិភ័យកើតមានវិបត្តិសេដ្ឋកិច្ច។
ក្រុមអ្នកវិភាគរបស់ធនាគារ Goldman Sachs (សហរដ្ឋអាម៉េរិក) ថ្មីៗនេះយល់ថា ទីផ្សារប្រេងប្រគល់ភ្លាមៗកំពុងតែស្ថិតក្នុងស្ថានភាពត្រូវរឹតបន្តឹង ក្នុងនោះ តម្លៃប្រេង Brent ប្រគល់ភ្លាមៗខុសគ្នាឆ្ងាយធៀបនឹងតម្លៃប្រេងប្រគល់មានកាលកំណត់។
តម្លៃប្រេងក៏ទទួលបានអំណោយផល នៅពេលដែលប្រាក់ ដុល្លារអាម៉េរិក ធ្លាក់ថ្លៃ និងទំនុកចិត្តរបស់អ្នកវិនិយោគមានការកើនឡើង នេះបើតាមលោក Carsten Fritsch ដែលជាអ្នកវិភាគថាមពលប្រចាំក្រុមហ៊ុន Commerzbank Research (អាល្លឺម៉ង់)៕