ភ្នំពេញ៖ បច្ចុប្បន្នគេសង្កេតឃើញថា កម្ពុជាហាក់មានកង្វះខាតក្នុងការផ្តត់ផ្គង់គ្រឿងសមុទ្រ នៅលើទីផ្សាររបស់ខ្លូននៅឡើយ ពិសេសនៅរដូវបុណ្យទានម្តងៗ តម្លៃគ្រឿងសមុទ្រឡើងថ្លៃខ្ពស់ តែថ្មីៗនេះក្រសួងពាណិជ្ជកម្មកម្ពុជាបានបញ្ចេញរបាយការណ៍ដែលបង្ហាញថា កម្ពុជាអាចនាំគ្រឿងសមុទ្រទៅក្រៅប្រទេសរាប់សិបតោនក្នុងមួយឆ្នាំ។
យោងតាមរបាយការណ៍របស់ក្រសួងពាណិជ្ជកម្មបានឱ្យដឹងថា ជារៀងរាល់ឆ្នាំកម្ពុជាបាននាំចេញផលនេសាទសមុទ្រទៅកាន់ប្រទេសចិន សិង្ហបុរី ជប៉ុនកូរ៉េខាងត្បូងអូស្ត្រាលី សហរដ្ឋអាមេរិក ថៃឡង់ដ៏ និងវៀតណាមក្នុងចន្លោះពី 25តោន ទៅ30ពាន់តោន ហើយជប៉ុន គឺជាប្រទេសដែលនាំចូលពីកម្ពុជាធំជាងគេ។ យុទ្ធសាស្ត្រសមាហរណកម្មពាណិជ្ជកម្មកម្ពុជា CTIS ដែលធ្វើបច្ចុប្បន្នភាព ដោយរាជរដ្ឋាភិបាលកាលពីដើមឆ្នាំ 2014 វិស័យជលផលត្រូវបានចាត់ទុកជាផលិតផលអាទិភាព ដែលមានសក្តានុពលក្នុងការនាំចេញទៅកាន់ទីផ្សារពិភពលោក ខណៈដែលប្រទេសកម្ពុជាកំពុងមានតម្រូវការ និងនាំចូលពីប្រទេសជិតខាងទៀតផង។
ក្នុងយុទ្ធសាស្ត្រនាំចេញផលនេសាទនេះ កាលពីថ្ងៃទី29 ម្សិលមិញនេះ នៅក្នុងទីរួមខេត្តកំពតក្រសួងពាណិជ្ជកម្មបានបើកសម្ភោធផ្សាររួមដំបូងគេជាផ្លូវការរបស់សម្ព័ន្ធសមាគមជលផលសមុទ្រកម្ពុជា ដើម្បីបង្កើនចង្វាក់តម្លៃ និងពង្រីកការនាំចេញជលផលសមុទ្រកម្ពុជាទៅកាន់ទីផ្សារជាតិ និងអន្តរជាតិ។
ផ្សាររួមនេះ ត្រូវបានបង្កើតឡើងក្រោមហិរញ្ញប្បទានរបស់គម្រោងជលផលសមុទ្រ នៃកម្មវិធីពិពិធកម្ម និងពង្រីកការនាំចេញកម្ពុជា (CEDEP II) ដំណាក់កាលទី2 ក្នុងទំហំទឹកប្រាក់ 5,000ដុល្លារសហរដ្ឋអាមេរិក ដែលមាននាយកដ្ឋានសហប្រតិបត្តិការអន្តរជាតិនៃក្រសួងពាណិជ្ជកម្មជាអ្នកសម្របសម្រួល និងអនុវត្តដោយអភិវឌ្ឍន៍វិស័យឯកជន សហការជាមួយអង្គការសហប្រជាជាតិអភិវឌ្ឍន៍ឧស្សាហកម្ម (UNIDO)។
នៅក្នុងឱកាសនោះ ឯកឧត្តម ប៉ាន សូរស័ក្តិ បានគូសបញ្ជាក់ថា វិស័យជលផលគឺជានិមិត្តរូបតំណាងឱ្យប្រភពដ៏សំខាន់នៃរូបិយប័ណ្ណជាតិ ដែលបានផ្ដល់ផលចំណេញដល់ប្រជានេសាទ និងភាគីពាក់ព័ន្ធនៅក្នុងប្រទេសកម្ពុជា ប្រមាណជាង6លាននាក់។ ឯកឧត្តមបានបន្តទៀតថា ផ្សាររួមនេះនឹងដើរតួជាមជ្ឈមណ្ឌលសេវាកម្ម និងផ្តល់ព័ត៌មានរវាងអ្នកលក់ និងអ្នកទិញផលនេសាទសមុទ្រ ជាពិសេសផ្តល់ឱកាសជូនប្រជានេសាទ និងសមាជិកសម្ព័ន្ធសមាគមជលផលសមុទ្រកម្ពុជា ធ្វើការដាក់លក់ជលផលសមុទ្រ ដើម្បីបង្កើនប្រាក់ចំណូលសម្រាប់ទ្រទ្រង់សេដ្ឋកិច្ចគ្រួសារ “ខ្ញុំសូមជូនពរឲ្យដំណើរការលក់ក្នុងផ្សាររួមនេះ ប្រព្រឹត្តទៅដោយរលូន និងបានជាឧត្តមប្រយោជន៍សម្រាប់ប្រជានេសាទ និងសមាជិកសម្ព័ន្ធសមាគមជលផលសមុទ្រកម្ពុជា” ឯកឧត្តមរដ្ឋមន្ត្រី មានប្រសាសន៍។
ទន្ទឹមគ្នានេះ ឯកឧត្តម ចាន់ ជេស្តា ក៏បានសម្តែងការស្វាគមន៍ចំពោះវត្តមានរបស់ផ្សាររួមនៃសម្ព័ន្ធសមាគមជលផលសមុទ្រកម្ពុជា និងបានបង្ហាញជំនឿថា ផ្សាររួមនេះនឹងជួយបង្កើតការងារ និងប្រាក់ចំណូលបន្ថែមជូនប្រជាជន ព្រមទាំងបង្កើនសកម្មភាពពាណិជ្ជកម្មនៅក្នុងខេត្តកំពតផងដែរ។ ឯកឧត្តមអភិបាលខេត្ត ក៏បានថ្លែងអំណរគុណដល់ក្រសួងពាណិជ្ជកម្ម និងអង្គការ UNIDO ព្រមទាំងសម្ព័ន្ធសមាគមជលផលសមុទ្រកម្ពុជា ដែលបានសហការបង្កើតឲ្យមានផ្សាររួមនេះឡើង។
អ្នកសេដ្ឋកិច្ចនិយាយថា បច្ចុប្បន្នកម្ពុជាកំពុងមានតម្រូវការគ្រឿងសមុទ្រនៅលើទីផ្សារខ្លួន ដែលរដ្ឋាភិបាលគួរកាត់បន្ថយការនាំចេញ និងផ្គត់ផ្គង់នៅលើទីផ្សារក្នុងស្រុក ចែកចាយដល់ប្រជាពលរដ្ឋរបស់ខ្លួនឱ្យមានចំនួនច្រើនឡើងដើម្បីកាត់បន្ថយ ការនាំចូលគ្រឿងសមុទ្រពីក្រៅប្រទេស ដែលមួយចំនួនជាគ្រឿងសមុទ្រអសុវត្ថិភាពទៀតផង៕
