ក្នុងខែមិថុនា ២០២២ កូរ៉េខាងត្បូង មានអតិផរណាខ្ពស់បំផុតក្នុងអំឡុង ២៤ ឆ្នាំមកនេះ ដោយសារតែតម្លៃប្រេង ពន្ធលើឧស្ម័ន និងអគ្គិសនី ក៏ដូចជាតម្រូវការប្រើប្រាស់កើនឡើងខ្ពស់ ក្នុងគ្រាដែលវិធានការរក្សាគម្លាតសង្គមត្រូវបានបន្ធូរបន្ថយជាបន្តបន្ទាប់។
នៅ កូរ៉េខាងត្បូង សន្ទស្សន៍ថ្លៃទំនិញប្រើប្រាស់ (CPI) ក្នុងខែមិថុនាឆ្នាំនេះបានឡើងខ្ពស់ជាង ៦.០% ធៀបនឹងខែមិថុនាឆ្នាំកន្លង។ នេះក៏ជាកម្រិតអតិផរណាខ្ពស់បំផុតរាប់ចាប់តាំងពីឆ្នាំ ១៩៩៨។
ប្រាក់វ៉ុនកូរ៉េខាងត្បូង បានធ្លាក់ថ្លៃ ៤.៧% ធៀបនឹងប្រាក់ដុល្លារអាម៉េរិក នៅក្នុងខែមិថុនា និងក្លាយជារូបិយប័ណ្ណដែលធ្លាក់ថ្លៃជាងគេលំដាប់ទីពីរនៅ អាស៊ី បន្ទាប់ពី ប្រាក់យ៉េនជប៉ុន។
ធនាគារកណ្ដាលរបស់ កូរ៉េខាងត្បូង (BOK) កំពុងពិនិត្យលើការដំឡើងការប្រាក់ក្នុងសប្ដាហ៍ក្រោយ ដើម្បីទប់ទល់នឹងបញ្ហាទំនិញឡើងថ្លៃ។
ទេសាភិបាលធនាគារកណ្ដាលកូរ៉េខាងត្បូង Rhee Chang-yong និង រដ្ឋមន្ត្រីក្រសួងហិរញ្ញវត្ថុ Choo Kyung-ho កាលពីថ្ងៃទី ៤ កក្កដា បានឱ្យដឹងថា ពួកគេចង់ធ្វើសកម្មភាពឱ្យបានមុន ដើម្បីបញ្ចៀសហានិភ័យដល់សេដ្ឋកិច្ច នេះបើតាមទីភ្នាក់ងារសារព័ត៌មាន Bloomberg៕