ប្រេងឆៅរបស់ សហរដ្ឋអាម៉េរិក WTI ធ្លាក់ថ្លៃជិត ១០% មកនៅត្រឹមក្រោម ១០០ ដុល្លារ ក្នុង ១ ធុង ជាលើកដំបូង រាប់ចាប់ពីដើមខែឧសភា ២០២២។
បញ្ចប់ការជួញដូរក្នុងថ្ងៃទី ៥ កក្កដា តម្លៃប្រេង WTI ដាំក្បាលចុះ ៨% មកនៅត្រឹម ៩៩.៥ ដុល្លារ/ធុង។ ក្នុងការជួញដូរនាថ្ងៃទី ៥ កក្កដា មានពេលខ្លះប្រេងនេះ បានធ្លាក់ថ្លៃជិត ១០% នៅត្រឹម ៩៧.៤៣ ដុល្លារ/ធុង។ ចំណែកប្រេង Brent វិញ ក៏បាត់បង់តម្លៃជាង ១០% មកនៅត្រឹម ១០១.១ ដុល្លារ/ធុង ប៉ុន្តែ ក្រោយមកក៏បានងើបឡើងវិញ និងបញ្ចប់ការជួញដូរត្រឹម ១០២.៧ ដុល្លារ/ធុង។
នេះគឺជាលើកដំបូងហើយដែលប្រេង WTI ធ្លាក់ថ្លៃមកនៅក្រោម ១០០ ដុល្លារ រាប់ចាប់តាំងពីថ្ងៃទី ១១ ខែឧសភា។ ការព្រួយបារម្ភអំពីវិបត្តិសេដ្ឋកិច្ចគឺជាមូលហេតុសំខាន់ដែលបណ្ដាលឱ្យប្រេងឆៅត្រូវបានគេលក់ចោលកាលពីម្សិលមិញ នេះបើតាម Tom Kloza ប្រធានផ្នែកវិភាគថាមពលរបស់ក្រុមហ៊ុន OPIS។
កាលពីច្រើនសប្ដាហ៍កន្លងទៅ ការបារម្ភអំពីវិបត្តិសេដ្ឋកិច្ច ក៏បានធ្វើឱ្យប្រេងធ្លាក់ថ្លៃខ្លាំង។ កាលពី ១ ខែមុន ប្រេង Brent មានតម្លៃ ១២៣.៥ ដុល្លារ/ធុង ខណៈដែលប្រេង WTI មានតម្លៃ ១២២ ដុល្លារ។
តម្លៃប្រេងសាំងពិភពលោកបានកើនឡើងជាបន្តបន្ទាប់ នៅពេល បស្ចិមលោក ដាក់ទណ្ឌកម្មលើវិស័យថាមពលរបស់ រុស្ស៊ី ដោយសារប្រទេសនេះបានចូលឈ្លានពានលើ អ៊ុយក្រែន។ ក៏ប៉ុន្តែ បើសិនជាវិបត្តិសេដ្ឋកិច្ចសកលកើតឡើង តម្រូវការប្រើប្រាស់ប្រេងនឹងថយចុះ ធ្វើឱ្យតម្លៃប្រេងត្រូវធ្លាក់ថ្លៃ។ នៅពេលប្រជាជនបាត់បង់ការងារ សកម្មភាពធ្វើដំណើរទៅធ្វើការ ទៅទិញដូរ និងដើរទេសចរណ៍ជាដើម ក៏នឹងថយចុះជាក់ជាមិនខាន ហើយពេលនោះ តម្លៃប្រេងក៏នឹងកាន់តែចុះទាប៕