ដោយសារតែបច្ចេកវិទ្យានាពេលបច្ចុប្បន្នមានការរីកចម្រើនខ្លាំង ប្រជាជនគ្រប់គ្នាទាំងនៅទីក្រុង និងតំបន់ជនបទសុទ្ធតែមានឧបករណ៍អេឡិចត្រូនិកប្រើប្រាស់ ហើយក្នុងនោះចំនួនកុមារដែលចាប់ផ្តើមលេង Smartphone និង Tablet ជាដើមនោះ បានចាប់ផ្តើមកើនឡើង ដែលពេលខ្លះចរន្តនេះបានជះផលប៉ះពាល់ជាអវិជ្ជមានដល់ក្មេង។
ពាក់ព័ន្ធជាមួយនឹងបញ្ហានេះ គេហទំព័រអប់រំដ៏ល្បីល្បាញ Education World ធ្លាប់បានបង្ហាញពីគុណវិបត្តិនៃការញៀនល្បែងតាមអនឡាញ និងបញ្ហានានាដែលប្រទេសអភិវឌ្ឍន៍មួយចំនួនជួបប្រទះជាមួយដំណោះស្រាយមួយចំនួន ដោយក្នុងនោះការជំរុញឱ្យកុមារមានកន្លែងគ្រប់គ្រាន់ដើម្បីលេង និងលេងកីឡាអាចជំរុញឱ្យពួកគេក្លាយជាមនុស្សដែលមានស្ថានភាពផ្លូវចិត្តរឹងមាំ។
គេហទំព័រដដែលបានបង្ហាញផងដែរថា ការលេងកីឡាពិតប្រាកដ ខុសគ្នាដាច់ស្រឡះពីការលេងឧបករណ៍អេឡិចត្រូនិក ព្រោះថា ប្រសិនបើកុមារណាម្នាក់លេងបាល់ទាត់ដោយផ្ទាល់គាត់អាចទទួលបានទាំងការអភិវឌ្ឍផ្នែករាងកាយ ខួរក្បាល និងការទំនាក់ទំនងល្អ តែប្រសិនបើពួកគេលេងកីឡានៅក្នុងឧបករណ៍អេឡិចត្រូនិកវិញ វាក៏ផ្តល់ផលវិជ្ជមានដូចគ្នា គ្រាន់តែផលវិជ្ជមានទាំងអស់នោះមានតិចជាងការលេងដោយផ្ទាល់។ ការលេងឧបករណ៍អេឡិចត្រូនិក ថ្វីត្បិតតែអាចធ្វើឱ្យកុមាររីករាយ និងមិនគ្រោះថ្នាក់ផ្នែករាងកាយ មែន តែវាអាចធ្វើឱ្យកុមារញៀន និងបាត់បង់ភាពសកម្ម ព្រោះពួកគេអាចចូលចិត្តនៅមួយកន្លែងដើម្បីលេងកីឡាក្នុងកញ្ចក់អេក្រង់។
លើសពីនេះទៅទៀត ការដែលលេងកីឡា អាចធ្វើឱ្យកុមារបានឃើញពិភពខាងក្រៅច្រើន មានភាពរួសរាយ និងអាចធ្វើឱ្យគាត់មានភាពស្វាហាប់តាមរយៈការមើលឃើញនូវបរិស្ថានជាក់ស្តែងដែលអាចធ្វើឱ្យពួគគាត់យល់ពីជីវិតរស់នៅពិតប្រាកដ ខុសពីកុមារដែលលេងនៅក្នុងឧបករណ៍អេឡិចត្រូនិកដែលស្រួលៗ រហូតធ្វើឱ្យពួកគេគិតថា ធ្វើអ្វីមួយស្រួលៗ ហើយពិបាកទទួលបានជោគជ័យក្នុងជីវិត និងងាយបោះបង់ការតស៊ូនៅពេលដែលជួបឧបសគ្គជាក់ស្តែង៕
