ភ្នំពេញ៖ បន្ទាប់ពីបានចុះកិច្ចព្រមព្រៀងទិញអង្ករពីកម្ពុជាចំនួន 1លានតោន ក្នុងរយៈពេល5ឆ្នាំរួចមក នាយករដ្ឋមន្ត្រីនៃប្រទេសបង់ក្លាដែសលោកជំទាវ Sheikh Hasina នឹងធ្វើដំណើទស្សនកិច្ចជាផ្លូវការថ្មីមួយទៀត មកប្រទេសកម្ពុជានៅពេលឆាប់ៗខាងមុខដើម្បីពង្រឹងពាណិជ្ជកម្មទ្វេភាគីឱ្យកាន់តែមានភាពប្រសើរឡើង។
ក្នុងជំនួបទ្វេភាគីរវាងប្រតិភូកម្ពុជាដឹកនាំដោយឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មនៅឯក្រុងបាងកក ប្រទេសថៃកាលពីថ្ងៃទី27 កញ្ញាកន្លងទៅនេះ លោកស្រី SaidaMunaTasneem ឯកអគ្គរដ្ឋទូតបង់ក្លាដែសប្រចាំនៅព្រះរាជាណាចក្រកម្ពុជា និងថៃ ដែលមាននិវេសនដ្ឋាននៅទីក្រុងបាងកក ប្រទេសថៃ បានមានប្រសាសន៍ថា ក្នុងពេលឆាប់ខាងមុខនេះលោកជំទាវនាយករដ្ឋមន្ត្រីបង់ក្លាដែសនឹងធ្វើដំណើរទស្សនកិច្ចមកកម្ពុជាដើម្បីចុះអនុស្សារណៈយោគយល់គ្នាចំនួន 2 ទៀតជាមួយកម្ពុជា។
គម្រោងនៃការចុះហត្ថលេខាចំនួន 2 រវាងក្រសួងពាណិជ្ជកម្មនៃប្រទេសទាំងពីរដែលនឹងត្រូវធ្វើឡើងក្នុងអំឡុងពេលដំណើរទស្សនកិច្ចផ្លូវការរបស់លោកជំទាវ Sheikh Hasina នាយករដ្ឋមន្ត្រីបង់ក្លាដែសមកកាន់ប្រទេសកម្ពុជានាពេលខាងមុខនេះ រួមមាន៖
1.អនុស្សរណៈយោគយល់គ្នា ស្តីពីបែបបទសម្រាប់រៀបចំក្រុមប្រឹក្សាពាណិជ្ជកម្មរួម (MOU on the Modalities of the Joint Trade Council)
និង 2.បន្តសុពលភាពលើកិច្ចព្រមព្រមព្រៀងពាណិជ្ជកម្មទ្វេភាគីឆ្នាំ2006 ដែលបានផុតកំណត់កាលពីឆ្នាំ2016។
ទន្ទឹមនឹងនេះ លោកស្រីបានស្នើសុំឲ្យក្រសួងពាណិជ្ជកម្មជួយសម្របសម្រួលជាមួយនឹងសភាពាណិជ្ជកម្មកម្ពុជា ក្នុងការរៀបចំវេទិកា Business Dialogue ជាមួយសហព័ន្ធនៃសភាពាណិជ្ជកម្ម និងឧស្សាហកម្មបង់ក្លាដែសដើម្បីចាប់ដៃគូពាណិជ្ជកម្ម និងស្វែងរកឱកាសវិនិយោគ។ លើសពីនេះទៀតសភាពាណិជ្ជកម្មនៃប្រទេសទាំងពីរ មានបំណងចុះហត្ថលេខាលើកិច្ចព្រមព្រៀង ស្តីពីកិច្ចសហប្រតិបត្តិការនៅចំពោះមុខនាយករដ្ឋមន្ត្រីនៃប្រទេសទាំងពីរទៀតផង។
ឆ្លើយតបនឹងសំណើរបស់លោកស្រីឯកអគ្គរដ្ឋទូតបង់ក្លាដែស ឯកឧត្តមរដ្ឋមន្ត្រី បានសន្យាថា នឹងជួយសម្របសម្រួលជាមួយនឹងសភាពាណិជ្ជកម្មកម្ពុជាក្នុងការរៀបចំវេទិកា Business Dialogue ជាមួយសហព័ន្ធនៃសភាពាណិជ្ជកម្ម និងឧស្សាហកម្មបង់ក្លាដែស ដើម្បីចាប់ដៃគូពាណិជ្ជកម្ម និងស្វែងរកឱកាសវិនិយោគ។ ជាមួយគ្នានេះដែរ ឯកឧត្តមរដ្ឋមន្ត្រីក៏បានថ្លែងអំណរគុណដល់សាធារណរដ្ឋប្រជាមានិតបង់ក្លាដែសដែលយល់ព្រមទិញអង្ករកម្ពុជាចំនួន1លានតោន ក្នុងរយៈពេល5ឆ្នាំ ចាប់ពីឆ្នាំ2017-2022៕