ក្រោយពីមានការបង្ហើបប្រាប់ពីអតីតឯកអគ្គរាជទូតថៃប្រចាំនៅព្រះរាជាណាចក្រកម្ពុជាកាលពីពេលថ្មីៗជុំវិញរឿងដែលថា កម្ពុជា និងថៃគ្រោងនឹងបើកច្រកព្រំដែនអន្ដរជាតិចំនួន4បន្ថែមទៀតនោះ នៅថ្ងៃទី1 ខែតុលា ឆ្នាំ2017 ខាងមុខនេះ ច្រកអន្ដរជាតិភ្នំដីក្នុងខេត្ដបាត់ដំបងដែលនៅជាប់នឹងច្រកខៅឌីនខេត្ដស្រះកែវនឹងបើកដំណើរការជាផ្លូវការហើយ។
ឯកឧត្ដម Nuthavudh Photisaro បញ្ជាក់ថា ដោយសារតែកំណើនពាណិជ្ជកម្មនៃប្រទេសទាំងពីរមានការកើនឡើងជាបន្ដបន្ទាប់ និងដើម្បីជំរុញឱ្យទំហំពាណិជ្ជកម្មនៃប្រទេសទាំងពីរដើរទៅដល់គោលដៅផែនការ គឺ15,000 លានដុលា្លរអាមេរិកក្នុងឆ្នាំ2020ខាងមុខ ទើបធ្វើឱ្យមានការឈានទៅបើកច្រកព្រំដែនអន្ដរជាតិទាំង4នោះបន្ថែមទៀត ពិសេសច្រកថ្មីទាំងអស់នោះ វានឹងអាចជួយសម្រួលដល់កិច្ចការធ្វើពាណិជ្ជកម្មរវាងប្រទេសទាំងពីរឱ្យកាន់តែមានភាពល្អប្រសើរឡើង បន្ទាប់ពីមើលឃើញថា ច្រកព្រំដែនអន្ដរជាតិប៉ោយប៉ែតចាប់ផ្ដើមមានភាពមមាញឹក និងកកស្ទះខ្លាំង។
ច្រកព្រំដែនអន្ដរជាតិភ្នំដីមានទីតាំងនៅក្នុងភូមិគីឡូម៉ែត្រលេខ13 ឃុំសន្ដិភាព ស្រុកសំពៅលូនខេត្ដបាត់ដំបង ទល់នឹងច្រកអន្ដរជាតិខៅឌីនដែលស្ថិតក្នុងខេត្ដស្រះកែវរបស់ប្រទេសថៃ។ ក្រោយពីច្រកអន្ដរជាតិនេះដំណើរការ ភាគីទាំងពីរនឹងដាក់ឱ្យមានវត្ដមាននគរបាលអន្ដោប្រវេសន៍នៃប្រទេសទាំងពីរដើម្បីត្រួតពិនិត្យ និងចេញទិដ្ឋាការឆ្លងដែនជូនប្រជាពលរដ្ឋនៃប្រទេសទាំងពីរ ព្រមទាំងភ្ញៀវអន្ដរជាតិដែលបានធ្វើដំណើរឆ្លងកាត់ច្រកមួយនេះផងដែរ។ ច្រកភ្នំដីខេត្ដបាត់ដំបង ឬច្រកគីឡូម៉ែត្រលេខ13 គឺជាច្រកសម្រាប់ធ្វើការដោះដូរទំនិញរវាងស្រុកសំពៅលូនខេត្ដបាត់ដំបង និងស្រុកខ្លងហាត ខេត្ដស្រះកែវផងដែរ។
គួរបញ្ជាក់ផងដែរថា ខេត្ដបាត់ដំបងមានច្រកព្រំដែនអន្ដរជាតិចំនួន 2 គឺច្រកដូងស្ថិតនៅក្នុងស្រុកកំរៀង និងច្រកអន្ដរជាតិគីឡូម៉ែត្រលេខ13ដែលនឹងបើកដំណើរការនៅដើមខែតុលាខាងមុខនេះ៕
