ភ្នំពេញ៖ នៅក្នុងប្រទេសកម្ពុជាបច្ចុប្បន្ន កម្លាំងពលកម្មនៅក្នុងវិស័យវាយនភណ្ឌកាត់ដេរ ក៏ដូចជាវិស័យសំណង់ជាដើមដែរនោះ គេសង្កេតឃើញថា ភាគច្រើនគឺជាអ្នកប្រើកម្លាំងពលកម្មសុទ្ធសាធ ប៉ុន្តែទោះជាយ៉ាងដូច្នេះក្តី ទាំងអស់នេះត្រូវបានគេមើលឃើញថា នាពេលអនាគតកម្ពុជានឹងតម្រូវឱ្យកម្លាំងពលកម្មទាំងនោះក្លាយជាកម្លាំងពលកម្មជំនាញឱ្យបាននៅត្រឹមឆ្នាំ2025។
ទោះជាប្រទេសតូចមួយ មានប្រជាជនចំនួនប្រមាណតែជាង15លាននាក់មែន តែសេដ្ឋកិច្ចកម្ពុជាមានសម្ទុះរីកចម្រើនយ៉ាងគួរឲ្យកត់សម្គាល់ ដោយសារកម្ពុជាជាទីកន្លែងមួយដែលមានសុវត្ថិភាព និងមានភាពទាក់ទាញផ្នែកសេដ្ឋកិច្ចក្នុងអាស៊ីអាគ្នេយ៍ដែលជាមូលដ្ឋានដ៏ល្អសម្រាប់ធុរជន និងវិនិយោគិនចូលមកបណ្តាក់ទុនប្រកបដោយជំនឿទុកចិត្ត ដែលនេះជាប្រសាសន៍ របស់ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានថ្លែងក្នុងកិច្ចប្រជុំ “Round Table: South-East Asia Sourcing” ដែលមានការចូលរួមពីតំណាងអង្គទូតមួយចំនួនប្រចាំនៅទីក្រុងប៉ារីស អ្នកជំនាញការ អ្នកបញ្ជាទិញ (BUYER) អ្នកសារព័ត៌មាន និងអ្នកតំណាងពាក់ព័ន្ធនឹងឧស្សាហកម្មកាត់ដេរ និងសម្លៀកបំពាក់ដែលមកពីប្រទេសផ្សេងៗជាច្រើនរូបទៀត។
ឯកឧត្តមបញ្ជាក់ថា សេដ្ឋកិច្ចនៃប្រទេសកម្ពុជាមានកំណើនជាមធ្យម 7% ក្នុងរយៈពេល 10ឆ្នាំចុងក្រោយនេះ ក្នុងនោះរដ្ឋាភិបាលកម្ពុជាបានកំណត់នូវកម្លាំងចលករសំខាន់ចំនួន4 ដែលកំពុងតែជំរុញកំណើនសេដ្ឋកិច្ចរួមមាន:
ទី1. វិស័យកាត់ដេរសម្លៀកបំពាក់ វាយនភណ្ឌ និងស្បែកជើង
ទី2. វិស័យសំណង់
ទី3. វិស័យទេសចរណ៍
និងទី4. វិស័យកសិកម្ម។
ហើយដើម្បីជំរុញឱ្យវិស័យទាំង4នេះ កាន់តែមានការអភិវឌ្ឍរីកចម្រើនទៅមុខ នាពេលថ្មីៗនេះរដ្ឋាភិបាលកម្ពុជាបានប្រកាសឱ្យប្រើប្រាស់គោលនយោបាយអភិវឌ្ឍន៍ឧស្សាហកម្ម2015-2025 សំដៅរក្សាកំណើនសេដ្ឋកិច្ចប្រកបដោយចីរភាព និងមានការអភិវឌ្ឍកាន់តែខ្លាំងតាមរយៈការធ្វើពិពិធកម្មសេដ្ឋកិច្ច ការពង្រឹងការប្រកួតប្រជែង និងលើកកម្ពស់ផលិតភាព។ «ចក្ខុវិស័យរបស់រាជរដ្ឋាភិបាល គឺដើម្បីផ្លាស់ប្តូរ និងធ្វើទំនើបកម្មរចនាសម្ព័ន្ធឧស្សាហកម្មកម្ពុជា ពីឧស្សាហកម្មដែលពឹងផ្អែកលើកម្លាំងពលកម្មទៅជាឧស្សាហកម្មដែលពឹងផ្អែកលើជំនាញនៅត្រឹមឆ្នាំ 2025»។
ទាក់ទងនឹងវិស័យកាត់ដេរសម្លៀកបំពាក់ និងស្បែកជើងផងដែរ លោក វ៉ាន់ ស៊ូអៀង ប្រធានសមាគមកាត់ដេរ និងស្បែកជើងកម្ពុជាមានប្រសាសន៍ថា កម្ពុជាមានរោងចក្រកាត់ដេរជាង 500 និងមានកម្មករ-កម្មការិនីកាត់ដេរប្រមាណជា 8សែននាក់ ដែលជាកម្លាំងពលកម្មវ័យក្មេងបាននិងកំពុងផលិតសម្លៀកបំពាក់ឱ្យអ្នកបញ្ជាទិញធំៗ និងល្បីៗលើពិភពលោក ហើយបានកំពុងនាំចេញទៅបណ្តាប្រទេសជាច្រើន ជាពិសេសសហគមន៍អឺរ៉ុប អាមេរិក កាណាដា និងជប៉ុន៕