ភ្នំពេញ៖ ដើម្បីជួយសម្រួលការចំណាយប្រចាំថ្ងៃរបស់ប្រជាពលរដ្ឋ សិស្ស-និស្សិត មន្ត្រីរាជការ ក៍ដូចជាកម្មករ-កម្មការិនីដែរនោះ ក្រសួងពាក់ព័ន្ធធំៗចំនួន3 បានរៀបចំកិច្ចប្រជុំដ៍កម្រមួយឡើងដើម្បីកំណត់តម្លៃប្រេងសាំងនៅលើទីផ្សារឱ្យមានតម្លៃទាបជាងមុន។
កិច្ចប្រជុំនេះធ្វើឡើងនៅទីស្តីការក្រសួងពាណិជ្ជកម្ម កាលពីរសៀលថ្ងៃទី27 ខែកញ្ញា ឆ្នាំ2017ម្សិលមិញនេះ ដើម្បីធ្វើការកែសម្រួលតម្លៃសម្រាប់ការលក់ផលិតផលប្រេងឥន្ធនៈនៅកម្ពុជា ក្រោមអធិបតីភាព ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងមានការចូលរួមពីមន្ត្រីជាន់ខ្ពស់អន្តរក្រសួង ព្រមទាំងតំណាងក្រុមហ៊ុនចែកចាយ និងលក់រាយប្រេងឥន្ធនៈនៅកម្ពុជា ប្រមាណជាង 30នាក់។
ជាលទ្ធផលអង្គប្រជុំបានសម្រេចដាក់ឱ្យប្រើប្រាស់សេចក្តីប្រកាសរួម ស្តីពីតម្លៃលក់រាយប្រេងឥន្ធនៈថ្មី ដើម្បីជួយសម្រួលវិស័យឯកជន និងលើកទឹកចិត្តឲ្យមានការប្រកួតប្រជែងផ្នែកគុណភាពប្រេងសាំងស៊ុបពែរ ព្រមទាំងកាត់បន្ថយផលប៉ះពាល់អវិជ្ជមាន និងទាក់ទាញការគាំទ្រពីអ្នកប្រើប្រាស់គ្រប់មជ្ឈដ្ឋាន។
សេចក្តីប្រកាសអន្តរក្រសួងថ្មីនេះ ត្រូវបានចុះហត្ថលេខារួមគ្នាដោយរដ្ឋមន្ត្រី នៃស្ថាប័នសំខាន់ៗចំនួន3គឺ ក្រសួងសេដ្ឋកិច្ច និងហិរញ្ញវត្ថុ, ក្រសួងពាណិជ្ជកម្ម និងក្រសួងរ៉ែ និងថាមពល ដែលមានខ្លឹមសារផ្តោតសំខាន់លើការកំណត់តម្លៃសម្រាប់ការលក់ផលិតផលប្រេងសាំងស៊ុបពែរ (EA95), ប្រេងសាំងធម្មតា (EA92) និងប្រេងម៉ាស៊ូត ឲ្យមានលក្ខណៈប្រសើរជាងមុន។
សេចក្តីសម្រេចនេះបានកំណត់ឱ្យអនុវត្តចាប់តាំងពីថ្ងៃទី1 ខែតុលា ឆ្នាំ2017 ដោយការកំណត់តម្លៃ Premium សម្រាប់ប្រេងសាំងស៊ុបពែរ (EA95) នឹងពុំមានតទៅទៀតឡើយ។ ស្របគ្នានេះដែរ តម្លៃ Premium សម្រាប់ប្រេងសាំងធម្មតា (EA92) នឹងត្រូវបញ្ចុះពី 0,23 ដុល្លារ/លីត្រ មកនៅត្រឹម 0,22 ដុល្លារ/លីត្រ និងតម្លៃ Premium សម្រាប់ប្រេងម៉ាស៊ូត នឹងត្រូវបញ្ចុះពី 0,27 ដុល្លារ/លីត្រ មកនៅត្រឹម 0,25 ដុល្លារ/លីត្រ ផងដែរ៕
