កម្មករឥណ្ឌា ជាង ៧០០ នាក់ ធ្វើការទាំងយប់ទាំងថ្ងៃនៅក្នុងការស្ថាបនាផ្លូវល្បឿនលឿនប្រវែង ៧៥ គីឡូម៉ែត្រ ដោយប្រើពេលត្រឹមតែ ១០៥ ម៉ោង និង ៣៣ នាទី បង្កើតបានកំណត់ត្រាពិភពលោកថ្មី។
អាជ្ញាធរជាតិគ្រប់គ្រងផ្លូវល្បឿនលឿនរបស់ ឥណ្ឌា (NHAI) ផ្ដើមសាងសង់ផ្លូវបេតុងកៅស៊ូ ១ គន្លង ភ្ជាប់ Amravati ទៅនឹង Akola ចាប់ពីម៉ោង ៧ និង ២៧ នាទី ព្រឹកថ្ងៃទី ៣ មិថុនា និងសម្រេចជាស្ថាពរនៅវេលាម៉ោង ១៧ ថ្ងៃទី ៧ មិថុនា។ កំណត់ត្រាស្ដីពីល្បឿនមហាលឿននេះត្រូវបានទទួលស្គាល់ដោយអង្គការ Guinness។
កម្មករ ៧២០ នាក់ មកពីក្រុមហ៊ុនសាងសង់ឯកជន Raj Path Infracon និងក្រុមអ្នកជំនាញប្រឹក្សាយោបល់ឯករាជ្យ រួមនឹងក្រុមអ្នកតាមដានដំណើរការសាងសង់របស់ NHAI បានធ្វើការ ២៤/២៤ ម៉ោង ហើយសម្រេចជាស្ថាពរដោយប្រើពេលមិនដល់ ៥ ថ្ងៃ។
កំណាត់ផ្លូវល្បឿនលឿនភ្ជាប់ពីទីក្រុង Amravati ទៅកាន់ Akola គឺជាផ្នែកមួយនៃផ្លូវជាតិលេខ ៥៣ ដែលតភ្ជាប់បណ្ដាទីក្រុងសំខាន់ៗដូចជា Kolkata, Raipur, Nagpur និង Surat។
មុននោះ ឯតទគ្គកម្មខាងលើគឺជារបស់ស្ថាប័នគ្រប់គ្រងសំណង់សាធារណៈ (ASHGHAL) របស់ ប្រទេសកាតា បន្ទាប់ពីបានសាងសង់ផ្លូវប្រវែង ២៥.៣ គីឡូម៉ែត្រ នៅ រដ្ឋធានី ដូហា ដោយប្រើពេលតែ ១០ ថ្ងៃ។
