ក្លិបតោខៀវ Chelsea បានប្រកាសថា ពួកគេបានឈានដល់ការព្រមព្រៀងគ្នាមួយ ជាមួយនឹងក្លិប Atletico Madrid ជុំវិញការលក់ Diego Costa ខណៈដែលខ្សែប្រយុទ្ធអន្តរជាតិអេស្ប៉ាញរូបនេះ ត្រូវបានរំពឹងទុកថា នឹងបំពេញការវិលត្រឡប់របស់គេទៅកាន់ក្របខ័ណ្ឌ La Liga នៅពេលដែលលក្ខខណ្ឌផ្ទាល់ខ្លួន និងការត្រួតពិនិត្យសុខភាពត្រូវបានបំពេញជាផ្លូវការ។
ខ្សែប្រយុទ្ធវ័យ 28ឆ្នាំរូបនេះ មិនទាន់បានបង្ហាញខ្លួនក្នុងការប្រកួតក្របខ័ណ្ឌ Premier League ជាមួយនឹងក្រុម Chelsea នៅឡើយទេនារដូវកាលនេះ ក្រោយពីត្រូវបានបញ្ជាក់ប្រាប់ថា រូបគេមិនស្ថិតក្នុងគម្រោងរបស់លោក Antonio Conte ឡើយ។ ប៉ុន្តែ បើទោះបីជាក្លិប Atletico បានជាប់ពិន័យព្យរមិនឲ្យទិញចូលកីឡាករក៏ដោយ ប៉ុន្តែការចេញសេចក្តីថ្លែងការណ៍ពីក្លិប Chelsea កាលពីថ្ងៃព្រហស្បតិ៍ បានបញ្ជាក់ថា Costa នឹងត្រូវទៅកាន់ក្លិបរបស់អេស្ប៉ាញមួយនេះវិញក្នុងតម្លៃខ្លួនមួយដែលត្រូវបានគេជឿជាក់មានចំនួន 57លានផោន (ស្មើនឹង 77,4លានដុល្លារអាមេរិក) ក្នុងរយៈពេល3ឆ្នាំ ក្រោយពីបានផ្ទេរទៅកាន់ទីក្រុងឡុងដ៍ក្នុងតម្លៃខ្លួន 32លានផោន។
Chelsea បានឲ្យដឹងថា៖ «ក្លិបកីឡាបាល់ទាត់ Chelsea នៅថ្ងៃនេះសូមធ្វើការប្រកាសពីការព្រមព្រៀងលក្ខខណ្ឌផ្សេងៗជាមួយសនឹងក្លិប Atletico Madrid សម្រាប់ការផ្ទេរ Diego Costa។ ការផ្ទេរនេះរង់ចាំតែការយល់ព្រមទៅលើលក្ខខណ្ឌផ្ទាល់ខ្លួន និងការត្រួតពិនិត្យសុខភាពប៉ុណ្ណោះ»។ សេចក្តីប្រកាសបន្ថែមទៀតពីក្លិប Atletico Madrid បានអះអាងថា Costa ត្រូវបានផ្តល់ការអនុញ្ញាតឲ្យធ្វើដំណើរទៅកាន់ប្រទេសអេស្ប៉ាញដើម្បីត្រួតពិនិត្យសុខភាព និងធ្វើការពិភាក្សាទៅលើលក្ខខណ្ឌផ្ទាល់ខ្លួន»៕
ប្រភពព័ត៌មាន៖ The Guardian
