ពលរដ្ឋខ្មែរ នឹងឈប់ធ្វើចំណាកស្រុកបន្តទៀតហើយ ហើយមួយចំនួនទៀតនឹងត្រឡប់មកធ្វើការនៅក្នុងប្រទេសកម្ពុជាវិញ ខណៈក្រុមហ៊ុន និងសហគ្រាសឯកជនបារាំងជាង300ក្រុមហ៊ុន នឹងចូលមកធ្វើការវិនិយោគនៅកម្ពុជាក្នុងពេលឆាប់ៗនេះ។
ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងគណៈប្រតិភូកម្ពុជា បានធ្វើទស្សនកិច្ចផ្លូវការទៅកាន់ទីក្រុងប៉ារីស ប្រទេសបារាំង នាថ្ងៃទី20 ខែកញ្ញា ឆ្នាំ2017កន្លងទៅនេះ ដោយបានជួបពិភាក្សាជាមួយលោក Jean-Pierre RAFFARIN ប្រធានមូលនិធិ FPI (Fondation Prospective Innovation) ដែលជាអតីតនាយករដ្ឋមន្ត្រីបារាំង និងជាសមាជិកសភាកិត្តិយសនៃប្រទេសបារាំង ដោយលោកបានបញ្ជាក់ថា ឆាប់ៗខាងមុខនេះ សហគ្រាស និងក្រុមហ៊ុនបារាំងជាង 300ស្ថាប័ន នឹងចូលមកវិនិយោគនៅប្រទេសកម្ពុជា ដើម្បីផ្តល់ការងារក្នុងស្រុក និងលើកកម្ពស់សេដ្ឋកិច្ចកម្ពុជាឱ្យកាន់តែប្រសើរឡើង។
នៅចំពោះមុខអ្នកការទូតជាច្រើនរូប ប្រធានសមាគមពាក់ព័ន្ធនឹងវិស័យកាត់ដេរសម្លៀកបំពាក់ ដែលមកពីប្រទេសផ្សេងៗ អ្នកបញ្ជារទិញធំៗ (BUYER) និងតំណាងក្រុមហ៊ុនរៀបចំពិព័រណ៌ MESSE FRANKFURT ឯកឧត្តមរដ្ឋមន្ត្រី បានលើកឡើងថា ការអភិវឌ្ឍយ៉ាងឆាប់រហ័សរបស់កម្ពុជា ដោយរក្សាបាននូវកំណើនសេដ្ឋកិច្ចជាមធ្យម 7% ក្នុងមួយឆ្នាំក្នុងរយៈពេល 10ឆ្នាំកន្លងទៅ ហើយរាជរដ្ឋាភិបាលកម្ពុជា បាននិងកំពុងបន្តអនុវត្តយុទ្ធសាស្ត្រចតុកោណដំណាក់កាលទី3 សំដៅបង្កបរិយាកាសធុរកិច្ចដ៏ល្អប្រសើរ ប្រែក្លាយកម្ពុជាឱ្យទៅជាគោលដៅដ៏ទាក់ទាញមួយសម្រាប់វិនិយោគនិងធ្វើធុរកិច្ច។
ឯកឧត្តមរដ្ឋមន្ត្រីបន្តថា «ទំនាក់ទំនងល្អរវាងកម្ពុជា-បារាំង កន្លងមករហូតមកដល់ពេលនះ ជាពិសេសផ្នែកការទូត សេដ្ឋកិច្ច និងពាណិជ្ជកម្ម ដែលក្នុងនោះឯកឧត្តមរដ្ឋមន្ត្រី បានលើកឡើងអំពីប្រព័ន្ធអនុគ្រោះ “EVERYTHING BUT ARMS (EBA)” ដែលបានអនុញ្ញាតឱ្យកម្ពុជាអាចនាំចេញទំនិញគ្រប់ប្រភេទ (លើកលែងតែអាវុធ) ទៅកាន់សហគមអឺរ៉ុប ដោយមិនជាប់ពន្ធ និងកាតព្វកិច្ចផ្សេងៗឡើយ»។ ឆ្លៀតក្នុងឱកាសនោះដែរ ឯកឧត្តមរដ្ឋមន្ត្រី ក៏បានស្នើដល់ភាគីបារាំង ឱ្យបន្តកិច្ចសហប្រតិបត្តិការល្អជាមួយកម្ពុជា ជាពិសេសបានជំរុញភាគីបារាំង ឱ្យមកធ្វើការវិនិយោគបន្ថែមទៀតនៅកម្ពុជា ទៅលើវិស័យកាត់ដេរ សម្លៀកបំពាក់ វាយនភ័ណ្ឌ ស្បែកជើង ផលិតផលកសិកម្ម និងផលិតផលសក្តានុពលជាច្រើនទៀត។
ជាការឆ្លើយតប លោក Jean-Pierre RAFFARIN បានកោតសរសើរយ៉ាងខ្លាំងដល់ប្រទេសកម្ពុជា ដែលមានការអភិវឌ្ឍរីកចម្រើនយ៉ាងឆាប់រហ័ស គួរឱ្យកត់សម្គាល់មួយនៅក្នុងតំបន់អាស៊ីអាគ្នេយ៍ ហើយថាកម្ពុជាពិតជាមានកម្លាំងពលកម្មគ្រប់គ្រាន់ មានធនធានធម្មជាតិសម្បូរណ៍បែប និងមានទីតាំងអំណោយផលសម្រាប់ធានាដល់ការធ្វើវិនិយោគយូរអង្វែងផងដែរ។ លើសពីនេះទៅទៀត តាមរយៈមូលនីធី FPI (Fondation Prospective Innovation) នៃប្រទេសបារាំង លោក Jean-Pierre RAFFARIN នឹងប្រមែប្រមូលក្រុមហ៊ុន និងសហគ្រាសឯកជនបារាំង ប្រមាណជាង300ស្ថាប័នមកសិក្សាពីលទ្ធភាពវិនិយោគ និងធ្វើការវិនិយោគនៅប្រទេសកម្ពុជាក្នុងពេលឆាប់ៗខាងមុខនេះ។
លោកបានបញ្ជាក់ទៀតថា «ក្រុមហ៊ុននិងសហគ្រាសឯកជនទាំងនោះ នឹងទៅកម្ពុជាដើម្បីបើកក្រុមហ៊ុន និងវិនិយោគលើវិស័យកាត់ដេរ សម្លៀកបំពាក់ និងវាយនភ័ណ្ឌ វិស័យកសិកម្ម និងវិស័យទេសចរណ៍នៅកម្ពុជា»។
ការវិនិយោគដែលនឹងកើតឡើងយ៉ាងពិតប្រាកដខាងមុខនេះ នឹងជួយឱ្យការនាំចេញរបស់កម្ពុជាទៅកាន់សហគមន៍អឺរ៉ុប មានការកើនឡើងបន្ថែមទៀត ជាពិសេសការបញ្ជារទិញផលិតផលសម្លៀកបំពាក់ វាយនភ័ណ្ឌ និងផលិតផលកសិកម្មរបស់កម្ពុជាពីសហគមន៍អឺរ៉ុប៕
