ទីភ្នាក់ងារសារព័ត៌មាន Wall Street Journal ឱ្យដឹងថា ក្រុមហ៊ុន Twitter កំពុងពិចារណាលើសំណើសុំទិញរបស់ម្ចាស់ក្រុមហ៊ុន Tesla ដោយមានការពិភាក្សារវាងភាគីទាំងពីរដែលធ្វើឡើងនៅថ្ងៃទី ២៤ មេសា។
ប្រភព័ត៌មានរបស់កាសែតខាងលើឱ្យដឹងថា Twitter កំពុងពិនិត្យមើលសំណើរបស់មហាសេដ្ឋីអាម៉េរិក ដើមកំណើតអាហ្វ្រិកខាងត្បូង លោក Elon Musk ក្រោយពីមហាសេដ្ឋីរូបនេះបានជួបពិភាក្សាដោយឡែកជាមួយភាគហ៊ុនិកមួយចំនួនរបស់ Twitter កាលពីថ្ងៃទី ២៣ មេសា។
មុននោះ ប៉ុន្មានថ្ងៃ ប្រធានប្រតិបត្តិរបស់ Tesla ឱ្យដឹងថា បានត្រៀមប្រាក់ជិត ៤៦.៥ ពាន់លានដុល្លាររួចហើយ ដើម្បីទិញយក Twitter មកកាន់កាប់ ទន្ទឹមនឹងការរៀបគម្រោងបញ្ចុះបញ្ចូលភាគហ៊ុនិករបស់បណ្ដាញសង្គមនេះ ក្នុងបំណងធ្វើឱ្យមានប្រៀបនៅក្នុងការសម្រេចរបស់ក្រុមហ៊ុន។
Twitter នឹងប្រកាសជាផ្លូវការនៅថ្ងៃទី ២៨ មេសា ឬអាចឆាប់ជាងនេះ ទាក់ទងនឹងបញ្ហាខាងលើ។ លោក Musk ឱ្យដឹងថា នៅតែរក្សាតម្លៃនៃការទិញភាគហ៊ុន ១០០% របស់ Twitter «នៅដំណាក់កាលចុងក្រោយ និងល្អបំផុត» ក្នុងតម្លៃ ៥៤.២ ដុល្លារ/ហ៊ុន។
កាលពីថ្ងៃទី ១០ មេសា នាយកប្រតិបត្តិរបស់ Twitter លោក Parag Agrawal ប្រកាសថា លោក Musk ដែលជាភាគហ៊ុនិកធំបំផុតរបស់បណ្ដាញសង្គមនេះ បានសម្រេចចិត្តមិនចូលរួមក្នុងគណៈគ្រប់គ្រង។ បច្ចុប្បន្ន លោក Musk កាន់កាប់ភាគហ៊ុន ៩.២% របស់ Twitter ដែលមានតម្លៃរហូតដល់ ២.៩ ពាន់លានដុល្លារអាម៉េរិក នេះបើយើងតាមតម្លៃនៃការជួញដូរចុងក្រោយកាលពីថ្ងៃទី ១ មេសា ២០២២។
