នាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈ បានឱ្យដឹងថា គ្រោះថ្នាក់ចរាចរណ៍បានកើតឡើង ៤៧ លើក នៅទូទាំងប្រទេស ក្នុងរយៈពេល ៣ ថ្ងៃ នៃពិធីបុណ្យចូលឆ្នាំប្រពៃណីជាតិខ្មែរ ឆ្នាំខាល ២០២២។
របាយការណ៍របស់នាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈ នៃអគ្គស្នងការដ្ឋាននគរបាលជាតិ បានបញ្ជាក់ថា យ៉ាងហោចណាស់មានមនុស្ស ២៧ នាក់ បានបាត់បង់ជីវិត និង ៨០ នាក់ បានរងរបួសព្រោះគ្រោះថ្នាក់ចរាចរណ៍ នៅក្នុងអំឡុងពិធីបុណ្យចូលឆ្នាំខ្មែរ ចាប់ពីថ្ងៃទី ១៤ ដល់ ១៦ មេសា ២០២២។
មូលហេតុដែលនាំឱ្យកើតមានគ្រោះថ្នាក់ចរាចរណ៍ទាំងឡាយនេះ ត្រូវបាននាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈ លើកឡើងថា បណ្ដាលមកពីការបើកបរហួសល្បឿនកំណត់ ការបើកបរពេលស្រវឹង និងការបើកបរជែងក្នុងស្ថានភាពគ្រោះថ្នាក់។ល។
នៅក្នុងថ្ងៃទីមួយនៃពិធីបុណ្យចូលឆ្នាំ មានគ្រោះថ្នាក់ចរាចរណ៍កើតឡើងចំនួន ៨ ករណី ក្នុងនោះមានអ្នកស្លាប់ ៣ នាក់ និងរងរបួស ១៥ នាក់។ ចំណែកថ្ងៃទីពីរវិញ មានគ្រោះថ្នាក់ចរាចរណ៍ ២៥ ករណី ក្នុងនោះមាន ១៦ នាក់បានស្លាប់ និង ៣៣ នាក់ រងរបួស។ ដោយឡែក នៅក្នុងថ្ងៃទីបី មានគ្រោះថ្នាក់ចរាចរណ៍ ១៤ លើក ក្នុងនោះមាន ៨ នាក់ បានបាត់បង់ជីវិត និង ៣១ នាក់ បានរងរបួស៕
