មហាសេដ្ឋីលំដាប់លេខ ១ របស់ពិភពលោក ទំនងជាគិតថា ត្រឹមជាសមាជិកក្រុមប្រឹក្សាភិបាល និងជាភាគហ៊ុនិកធំជាងគេនៅ Twitter មិនអាចធ្វើអ្វីបានច្រើន ដូច្នេះ លោក Elon Musk ក៏សម្រេចចិត្តមិនចូលរួមក្នុងក្រុមប្រឹក្សាភិបាលរបស់បណ្ដាញសង្គមនេះ។
ការសម្រេចខាងលើនេះ មានន័យថា លោក Musk មិនជាប់ជំពាក់អ្វីទៅនឹងការកំណត់របស់ក្រុមហ៊ុននេះ ដែលកំណត់ថា លោកមានសិទ្ធិកាន់កាប់ភាគហ៊ុនច្រើនបំផុតត្រឹមតែ ១៤.៩% ប៉ុណ្ណោះ នៅក្នុងក្រុមហ៊ុន Twitter។ បច្ចុប្បន្ន អ្នកវិភាគនានានិយាយថា នាយកប្រតិបត្តិរបស់ Tesla អាចនឹងទិញភាគហ៊ុន Twitter បន្ថែមទៀត ហើយចុងក្រោយលោកនឹងសាកល្បងឡើងគ្រប់គ្រងបណ្ដាញសង្គមនេះ។
«ការដែល Musk មិនស្ថិតក្នុងក្រុមប្រឹក្សាភិបាល អាចជួយឱ្យក្រុមហ៊ុនមិនត្រូវដោះស្រាយបញ្ហាដែលទាក់ទងនឹងការពិភាក្សានៅថ្នាក់ក្រុមប្រឹក្សារបស់ក្រុមហ៊ុន ត្រូវបង្ហោះលើបណ្ដាញសង្គម។ ប៉ុន្តែ Twitter ត្រូវទប់ទល់នឹងអ្នកវិនិយោគមួយរូបដែលពិបាកឱ្យគេស្មានត្រូវ កំពុងកាន់កាប់ភាគហ៊ុនជាង ៩% របស់ក្រុមហ៊ុន និងមានប្រភពធនធានគ្រប់គ្រាន់ដើម្បីទិញភាគហ៊ុន ៩១% ទៀត។ ហានិភ័យត្រូវទិញគឺពិតជាប្រការគួរឱ្យព្រួយបារម្ភសម្រាប់ Twitter នាពេលបច្ចុប្បន្ន» លោក Don Bilson អ្នកវិភាគមកពីក្រុមហ៊ុន Gordon Haskett Research Advisor យល់ឃើញដូច្នេះ។
លោក Don Bilson អះអាងថា សាររបស់ក្រុមហ៊ុន Twitter បង្ហាញថា ជា «សញ្ញាអាក្រក់» នៅពេល CEO របស់ Twitter គឺ Parag Agrawal ប្រកាសថា Musk នឹងលែងចូលរួមក្នុងក្រុមប្រឹក្សាភិបាលរបស់បណ្ដាញសង្គមនេះទៀតហើយ។
ចុងក្រោយ Twitter អាចសម្រេចចិត្តទទួលយក «ថ្នាំពុល ១ ដូស» ឬផែនការស្ដីពីសិទ្ធិរបស់ភាគហ៊ុនិក ដើម្បីប្រឆាំងនឹងលទ្ធភាពនៃការទិញយកទាំងស្រុង។ ប៉ុន្តែ លោក Bilson ឱ្យដឹងថា វិធានការបែបនេះនឹងអាចធ្វើឱ្យលោក Musk ខឹង។
ចំណែកអ្នកវិភាគ Dan Ives ក៏មានយោបល់ប្រហាក់ប្រហែលនឹងលោក Bilson ផងដែរ។ «នេះពិតជាស្ថានការណ៍មិនមានអំណោយផលល្អ។ ជំនួសឱ្យការដែល Musk នៅក្នុងក្រុមប្រឹក្សាភិបាល និងអាចនិយាយបានត្រឹមតែ «យល់ព្រម» ឬ «មិនយល់ព្រម» នៅក្នុងកិច្ចពិភាក្សានានា ខ្ញុំគិតថា នៅរយៈពេលខាងមុខ យើងនឹងចាប់ផ្ដើមឃើញគាត់មានការជំទាស់កាន់តែខ្លាំងក្លា» Ives សរសេរបញ្ជាក់ដូច្នេះ។
យោងតាម CNBC ភាគហ៊ុន Twitter បានឃើញការឡើងថ្លៃខ្ពស់រាប់ចាប់ពីការធ្វើ IPO ក្រោយពី Musk ប្រកាសថា កំពុងកាន់កាប់ភាគហ៊ុនជាង ៩%។ ភាគហ៊ុននេះបានកើនឡើង ២% ទៀត បន្ទាប់ពី Musk បន្តនិយាយថា លោកចូលរួមក្នុងក្រុមប្រឹក្សាភិបាល។ ក្រុមអ្នកជំនាញព្យាករថា ភាគហ៊ុន Twitter នឹងបន្តមានការប្រែប្រួល និងពិបាកប៉ាន់ស្មានក្នុងសប្ដាហ៍នេះ។
ក៏ប៉ុន្តែ Gene Munster មកពីក្រុមហ៊ុន Loup Ventures វិញ និយាយថា «វគ្គសំខាន់នៃល្ខោននេះបានបញ្ចប់ហើយ»។ លោក ជឿថា បើសិនជា លោក Musk មានបំណងទិញយក Twitter នោះលោកប្រាកដជាធ្វើតាំងពីដំបូងមកម្ល៉េះ។ ការទិញ Twitter យកមកគ្រប់គ្រងគឺជារឿងដែលលោក Musk មិនចង់ចំណាយពេលធ្វើ។ «ខ្ញុំគិតថា ការទិញនេះមិនមែនជារបស់ដែល Musk ចាប់អារម្មណ៍» អ្នកវិភាគ Gene Munster បញ្ជាក់ដូច្នេះ៕
