យោងតាមស្ថិតិស្ដីពីមហាសេដ្ឋីរបស់ ទស្សនាវដ្ដីអាម៉េរិក Forbes ឆ្នាំនេះ គិតមកដល់បច្ចុប្បន្នមានបុគ្គលចំនួន ២៣៦ នាក់ បានក្លាយជាមហាសេដ្ឋី ខណៈដែលចំនួនមហាសេដ្ឋីនៅទូទាំងសកលលោក បានថយចុះ ៨៧ នាក់ ធៀបនឹងឆ្នាំ ២០២១។
បច្ចុប្បន្ន មានមហាសេដ្ឋីចំនួន ២,៦៦៨ នាក់ ស្ថិតក្នុងបញ្ជីចំណាត់ថ្នាក់របស់ Forbes។ តម្លៃទ្រព្យសរុបរបស់មហាសេដ្ឋីទាំងនេះ ត្រូវបានគណនាឃើញថា មានចំនួន ១២.៧ ទ្រីលាន (១២.៧ លានលាន) ដុល្លារអាម៉េរិក ទាបជាង ៤ សែនលាន (៤00,០០០,000,000) ដុល្លារ ធៀបនឹងឆ្នាំកន្លង។
យោងតាមទស្សនាវដ្ដី Forbes ដដែល គិតចាប់ពីដើមឆ្នាំមកដល់ខែមេសា ២០២២ នៅទូទាំងពិភពលោកមានមហាសេដ្ឋីថ្មីចំនួន ២៣៦ នាក់ ដែលនេះទាបជាងឆ្ងាយធៀបនឹង ៤៩៣ នាក់កាលពីឆ្នាំ ២០២១។ មហាសេដ្ឋីថ្មីក្នុងឆ្នាំ ២០២២ មកពីប្រទេសចំនួន ៣៤ ក្នុងសកលលោក។ ក្នុងនោះ ប្រទេសចិន ឈរលំដាប់លេខ ១ ដោយមានមហាសេដ្ឋីថ្មី ៦២ នាក់ ក្នុងពេលដែល សហរដ្ឋអាម៉េរិក ឈរលំដាប់លេខ ២ ដោយមានមហាសេដ្ឋីថ្មី ៥០ នាក់ ខណៈដែល ប្រទេសឥណ្ឌា ជាប់លេខ ៣ ដោយមាន ២៩ នាក់)។
ឆ្នាំ ២០២២ នេះ ក៏មានមហាសេដ្ឋី ១,០០០ នាក់ ដែលមានទ្រព្យកើនឡើងច្រើនជាងឆ្នាំកន្លង ក្នុងនោះ សហរដ្ឋអាម៉េរិក នៅតែឈរលំដាប់លេខ ១ ដោយមានមហាសេដ្ឋី ៧៣៥ នាក់ ជាមួយនឹងទ្រព្យសរុប ៤.៧ ទ្រីលាន (៤.៧ លានលាន) ដុល្លារអាម៉េរិក។ ប្រទេសចិន ឈរលំដាប់លេខ ២ ដោយមានមហាសេដ្ឋីដែលមានទ្រព្យកើនឡើងធៀបនឹងឆ្នាំកន្លងចំនួន ៦០៧ នាក់ និងទ្រព្យសរុប ២.៣ ទ្រីលាន (២.៣ លានលាន) ដុល្លារអាម៉េរិក។
