ភ្នំពេញ៖ កម្ពុជាត្រូវបានគេមើលឃើញថា ជាប្រទេសមួយស្ថិតនៅក្នុងក្រសែភ្នែកអ្នកវិនិយោគបរទេសដែលមានសក្តានុពលទៅលើការវិនិយោគលើគ្រប់វិស័យ ជាក់ស្តែងនៅក្នុងឆមាសទី1 ដើមឆ្នាំ2017នេះ លំហូរវិនិយោគផ្ទាល់បរទេសក្នុងវិស័យធនាគារមានកំណើនប្រមាណជាជិត90%ឯណោះ។
ក្នុងជំនួបផ្លូវការជាមួយលោក Mathew Fox នាយកប្រតិបត្តិនៃធនាគារអភិវឌ្ឍន៍អាស៊ី(ADB) កាលពីម្សិលមិញនេះ ឯកឧត្តម ជា ចាន់តូ ទេសាភិបាលធនាគារជាតិនៃកម្ពុជាមានប្រសាសន៍ថា ដោយសារកម្ពុជាមានស្ថិរភាពនយោបាយ និងសុខសន្តិភាពពេញលេញដែលជាកត្តាដ៏សំខាន់ក្នុងការជំរុញឱ្យកម្ពុជាសម្រេចបានអត្រាកំណើនសេដ្ឋកិច្ចខ្ពស់នារយៈពេលជាងពីរទសវត្សរ៍ចុងក្រោយនេះ។
នៅឆ្នាំ2017នេះ កម្ពុជារំពឹងថា នឹងសម្រេចបានកំណើនសេដ្ឋកិច្ចរឹងមាំក្នុងអត្រា 7% ជាមួយនឹងស្ថិរភាពម៉ាក្រូសេដ្ឋកិច្ចដោយអត្រាអតិផរណាមានកម្រិតទាបសមស្របត្រឹម 2.3%។ ឯកឧត្តមមានប្រសាសន៍ថា «ក្នុងឆមាសទី1 ឆ្នាំ2017នេះ លំហូរវិនិយោគផ្ទាល់ពីបរទេសក្នុងវិស័យធនាគារមានកំណើនប្រមាណ 89% ខណៈឥណទានមានកំណើនសមស្របប្រមាណ 16%។ បរិយាប័ន្នហិរញ្ញវត្ថុដែលវាស់ដោយអត្រាប្រជាជនពេញវ័យកំពុងប្រើប្រាស់សេវាហិរញ្ញវត្ថុធៀបនឹងប្រជាជនពេញវ័យសរុបបានកើនដល់អត្រាប្រមាណ 55%»។
ក្រោមជំនួយបច្ចេកទេសរបស់ ADB កាលពីខែមិថុនា ឆ្នាំ2017កន្លងទៅរាជរដ្ឋាភិបាលបានសម្ពោធជាផ្លូវការនូវយុទ្ធសាស្ត្រអភិវឌ្ឍន៍វិស័យហិរញ្ញវត្ថុឆ្នាំ2016-2025។ ផ្អែកតាមផែនការសកម្មភាពដែលមានចែងក្នុងយុទ្ធសាស្ត្រនេះ ធនាគារជាតិនៃកម្ពុជាសម្រេចបានការងារជាច្រើនដូចជា ការធ្វើឱ្យប្រសើរឡើងនូវជំនឿទុកចិត្ត និងអន្តរការិយកម្មហិរញ្ញវត្ថុការរក្សាស្ថិរភាពវិស័យហិរញ្ញវត្ថុ ការជំរុញអភិបាលកិច្ចល្អរបស់គ្រឹះស្ថានធនាគារ និងហិរញ្ញវត្ថុ និងការធ្វើឱ្យប្រសើរឡើងនូវប្រសិទ្ធភាព និងមុខងាររបស់ធនាគារជាតិនៃកម្ពុជា។
លទ្ធផលទទួលបានជាផ្លែផ្កានេះ ក៏មានការរួមចំណែកពីធនាគារអភិវឌ្ឍន៍អាស៊ី(ADB)ដែលតែងតែចូលរួមគាំទ្រ និងផ្តល់ជំនួយបច្ចេកទេសមកធនាគារជាតិនៃកម្ពុជា ក្នុងការអភិវឌ្ឍវិស័យហិរញ្ញវត្ថុ និងការកសាងសមត្ថភាពជំនាញរបស់មន្ត្រីបុគ្គលិកតាមរយៈអាហារូបករណ៍កិច្ចប្រជុំ សិក្ខាសាលា វគ្គបណ្តុះបណ្តាលនានាទាំងក្នុងក្របខ័ណ្ឌទ្វេភាគី និងសមាហរណកម្មសេវាហិរញ្ញវត្ថុអាស៊ាន។
ក្នុងឱកាសនោះដែរលោក Mathew Fox នាយកប្រតិបត្តិនៃធនាគារអភិវឌ្ឍន៍អាស៊ី ADB បានកោតសរសើរចំពោះកិច្ចខិតខំប្រឹងប្រែងរបស់ធនាគារជាតិនៃកម្ពុជា ក៏ដូចជារាជរដ្ឋាភិបាលកម្ពុជាក្នុងការអភិវឌ្ឍសេដ្ឋកិច្ចឱ្យមានការរីកចម្រើនជាលំដាប់។ លោកថា «ADB ប្តេជ្ញាបន្តគាំទ្រធនាគារជាតិនៃកម្ពុជា និងរាជរដ្ឋាភិបាលកម្ពុជាដើម្បីរួមចំណែកអភិវឌ្ឍសេដ្ឋកិច្ចប្រកបដោយចីរភាព»៕