ឥណ្ឌា បានឱ្យដឹងថា នឹងជំរុញការនាំចូលធ្យូងកូក ពី រុស្ស៊ី ក្នុងគ្រាដែលលោកខាងលិច បោះបង់ប្រភពផ្គត់ផ្គង់ពី រុស្ស៊ី ដោយសារសង្គ្រាមនៅ អ៊ុយក្រែន។
«យើងកំពុងមាននិន្នាការទៅរកការនាំចូលធ្យូងកូក កាន់តែច្រើនពី ប្រទេសរុស្ស៊ី» លោក Ramchandra Prasad Singh សមាជិករបស់ក្រុមប្រឹក្សាជាតិ បានឱ្យដឹងកាលពីថ្ងៃទី ២៧ មីនា។
យោងតាមលោក Singh ប្រទេសឥណ្ឌា មានគម្រោងបង្កើនបរិមាណនៃការនាំចូលធ្យូងកូក (កូក/Coke គឺជាវត្ថុធាតុពណ៌ប្រផេះ រឹង និងដូចអេប៉ុង មានផ្ទុកកាបូនច្រើន ប៉ុន្តែ មានលាយសមាសធាតុផ្សេងៗតិច ប្រើសម្រាប់ផលិតដែកថែប) ពី រុស្ស៊ី។ លោកបន្ថែមថា ឥណ្ឌា បាននាំចូលធ្យូងកូក ពី រុស្ស៊ី ចំនួន ៤.៥ លានតោន ប៉ុន្តែ មិនបានបញ្ជាក់អំពីពេលវេលាជាក់លាក់។
ទិន្នន័យពីក្រុមហ៊ុន Kpler ឱ្យដឹងថា កប៉ាល់មួយចំនួនដែលដឹកធ្យូងកូក និងធ្យូងថ្ម (សម្រាប់ផលិតអគ្គិសនី) យ៉ាងតិច ១,០៦ លានតោន នឹងមកដល់កំពង់ផែរបស់ ឥណ្ឌា នៅក្នុងខែនេះ។ នេះគឺជាបរិមាណធ្យូងច្រើនបំផុតដែលនាំចូលមក ឥណ្ឌា ពី ប្រទេសរុស្ស៊ី គិតចាប់ពីខែមករា ២០២០។
បច្ចុប្បន្ន ទំនិញជាច្រើនរបស់ រុស្ស៊ី ត្រូវបានបណ្ដាប្រទេសបស្ចិមលោក «លែងរាប់រក» ព្រោះតែការឈ្លានពានរបស់ប្រទេសនេះ ទៅលើ ប្រទេសអ៊ុយក្រែន។ ប៉ុន្តែ ប្រទេសមួយចំនួនដែលស្និទ្ធជាមួយ រុស្ស៊ី ក្នុងនោះមាន ឥណ្ឌា ជាដើម កំពុងទទួលបានផលប្រយោជន៍ច្រើនពីបញ្ហាខាងលើ ដោយពួកគេទិញទំនិញពី រុស្ស៊ី ក្នុងតម្លៃទាបជាងមុន៕
