ភ្នំពេញៈ លោកឧកញ៉ា លី ហួរ អគ្គនាយកក្រុមហ៊ុនលីហួរគ្រុបបានសម្រេចចិត្តបោះទុនវិនិយោគលំនៅដ្ឋានតម្លៃសមរម្យជាលើកដំបូងនៅតាមបណ្តោយផ្លូវជាតិលេខ៦A។
លោកឧកញ៉ា លី ហួរ ដែលជាប្រធានសមាគមអ្នកអភិវឌ្ឍន៍លំនៅដ្ឋានកម្ពុជាផងដែរនោះបានថ្លែងឲ្យដឹងតាមទូរស័ព្ទកាលពីព្រឹកថ្ងៃទី14 កញ្ញានេះថា នេះជាគម្រោងជំហានដំបូងហើយដែលលោកបានវិនិយោគលើលំនៅដ្ឋានតម្លៃសមរម្យដែលមានផ្ទះសរុបប្រមាណ210ល្វែង និងលក់ក្នុងតម្លៃ38,000ដុល្លារអាមេរិកប៉ុណ្ណោះ។ លោកបន្តថា គម្រោងនេះទទួលបានការគាំទ្រខ្លាំង ដោយលក់ក្នុងរយៈពេលខ្លីសោះ ប៉ុន្តែលំនៅដ្ឋានទាំងនេះទទួលបានការបញ្ជាទិញពីអតិថិជនអស់រហូតដល់ជាង60ភាគរយរួចទៅហើយ។
គម្រោងនេះស្ថិតនៅក្នុងតំបន់ព្រែកតាមាក់ ដែលមានចម្ងាយប្រមាណជាង10គីឡូម៉ែត្រពីរាជធានីភ្នំពេញ។
លោកបន្តថា ដោយសារគម្រោងនេះផ្តោតលើប្រជាជនមានជីវភាពមធ្យម និងជាគម្រោងដែលស្ថិតនៅជាប់ផ្លូវជាតិលេខ៦Aផងនោះ ទើបគម្រោងនេះទទួលបានជោគជ័យយ៉ាងលឿន។ សម្រាប់គម្រោងលំនៅដ្ឋានមានតម្លៃសមរម្យបែបនេះ លោកនឹងពង្រីកការវិនិយោគជាច្រើនទៀតនៅពេលខាងមុខ ព្រោះលោកមានដីរួចហើយ និងកំពុងស្ថិតក្នុងដំណាក់កាលចាក់ខ្សាច់បំពេញ។
ទាក់ទងនឹងទីផ្សារបុរីនៅកម្ពុជា លោកឧកញ៉ា លី ហួរ បានថ្លែងថា ទីផ្សារបុរីនៅកម្ពុជានៅតែមានភាពល្អប្រសើរ ហើយការលក់ជោគជ័យ ឬមិនជោគជ័យវាអាស្រ័យលើទីតាំងគម្រោងដែលស្ថិតនៅតំបន់ណា និងផ្តោតលើអតិថិជនប្រភេទណារបស់អ្នកវិនិយោគ ព្រោះយើងមិនអាចវិនិយោគលំនៅដ្ឋានមានតម្លៃខ្ពស់នៅតំបន់ជាយក្រុងបានទេ។ លំនៅដ្ឋានតម្លៃទាបស័ក្តិសមនៅតំបន់ជាយក្រុង ចំណែកតំបន់ពាណិជ្ជកម្មក្នុងក្រុង ជាកន្លែងដែលការវិនិយោគនឹងទទួលបានជោគជ័យ។
លោកឧកញ៉ា នួន រិទ្ធី អគ្គនាយកក្រុមហ៊ុន KFA បានថ្លែងថា ស្របពេលប្រាក់ចំណូលប្រជាពលរដ្ឋកើនឡើង អ្នកវិនិយោគលើវិស័យនេះនៅតែទទួលបានជោគជ័យ ដោយសារជាធម្មតាប្រជាពលរដ្ឋត្រូវការជម្រក ហើយចរន្តនៃការចូលមករស់នៅក្រុងភ្នំពេញកំពុងកើនឡើងពីមួយឆ្នាំទៅមួយឆ្នាំ។លោកបន្តថា ទោះជាយ៉ាងណា បច្ចុប្បន្នអ្នកវិនិយោគលំនៅដ្ឋានបានចាប់ផ្តើមងាកច្រើនមកកាន់ក្រុមប្រជាជនមានជីវភាពមធ្យមដែលមានចំនួនច្រើន និងជាទីផ្សារធំមួយ។
លោកបន្តថា “ការវិនិយោគលើលំនៅដ្ឋានសម្រាប់ប្រជាជនមធ្យមជាការឆ្លើយតបនឹងតម្រូវការទីផ្សារពិតប្រាកដ ប៉ុន្តែមិនមែនមានន័យថា ទីផ្សារលំនៅ ដ្ឋានប្រណីតមិនជោគជ័យនោះទេ”៕