ភ្នំពេញ៖ ប្រាក់រៀលខ្មែរត្រូវបានទីផ្សារអន្តរធនាគារនៅតំបន់ស្វយ័ត Guangxi Zhuang ប្រទេសចិនដាក់ប្រកាសក្នុងអត្រាប្តូរប្រាក់ទ្វេភាគីជាមួយប្រាក់យ័នចិនសម្រាប់ធ្វើការដោះដូរដោយផ្ទាល់រវាងប្រាក់រៀលនឹងប្រាក់យ៉ន់ចិននៅលើទីផ្សារមួយនេះ។
ពិធីសម្ពោធដាក់ឱ្យដំណើរការដោះដូររវាងប្រាក់រៀល និងប្រាក់យ័ននេះ ត្រូវបានប្រារព្ធឡើងក្រោមអធិបតីភាពរបស់ឯកឧត្តម ស៊ុំ សន្និសិទ្ធ ទេសាភិបាលរងនៃធនាគារជាតិនៃកម្ពុជា និងឯកឧត្តម Yin Yong ទេសាភិបាលរងធនាគារកណ្តាលចិន និងឯកឧត្តម Peng Qinghua លេខាគណៈកម្មាធិការបក្សតំបន់ស្វយ័ត Guangxi Zhuang ព្រមទាំងមានការចូលរួមពីថ្នាក់ដឹកនាំនៃអាជ្ញាធររូបិយវត្ថុ និងគ្រឹះស្ថានហិរញ្ញវត្ថុរបស់ចិន និងអាស៊ានជាច្រើនរូបទៀតកាលពីព្រឹកថ្ងៃទី13 ខែកញ្ញា ឆ្នាំ2017 ម្សិលមិញនៅទីក្រុងណានីង ប្រទេសចិនក្នុងឱកាសនៃវេទិកាកំពូលស្តីពីការអភិវឌ្ឍ និងកិច្ចសហប្រតិបត្តិការវិស័យហិរញ្ញវត្ថុអាស៊ាន-ចិនលើកទី9។
ការដាក់ឱ្យប្រាក់រៀល និងប្រាក់យ័នដោះដូរនេះ ជាលទ្ធផលនៃការកើនឡើងនៃទំនាក់ទំនងទាំងសេដ្ឋកិច្ច ពាណិជ្ជកម្ម និងហិរញ្ញវត្ថុរវាងកម្ពុជា និងចិន និងជំនឿទុកចិត្តមកលើប្រាក់រៀលក៏ដូចជាសេដ្ឋកិច្ចរបស់កម្ពុជា ហើយក៏ឆ្លុះបញ្ចាំងផងដែរពីកាឆ្លើយតប នឹងសេចក្តីត្រូវការប្រាក់រៀលរបស់ពាណិជ្ជករចិនដែលអាចនឹងកើនឡើងសម្រាប់ការដោះដូរទ្វេភាគីនាពេលអនាគត។
គួររំឭកថា កន្លងមកប្រទេសចិនក៏បានជំរុញការប្រើប្រាស់រូបិយវត្ថុជាតិក្នុងពាណិជ្ជកម្មទ្វេភាគីជាមួយប្រទេសដទៃផងដែរ ដូចជាជាមួយប្រទេសម៉ាឡេស៊ី និងថៃជាដើម។ នាឱកាសនោះ ឯកឧត្តម ស៊ុំ សន្និសិទ្ធ ក៏បានគូសបញ្ជាក់ពីសារៈសំខាន់នៃទំនាក់ទំនងសេដ្ឋកិច្ច និងហិរញ្ញវត្ថុរវាងកម្ពុជា-ចិន ដោយបច្ចុប្បន្នប្រទេសចិន ជាប្រភពនៃលំហូរវិនិយោគបរទេសចំណាត់ថ្នាក់លេខ1របស់កម្ពុជា ហើយទេសចរចិនក៏ជាប់លេខរៀងលើគេក្នុងចំណោមទេសចរបរទេសដែលមកទស្សនាកម្ពុជាផងដែរស្របពេលដែលពាណិជ្ជកម្មទ្វេភាគីបានកើនឡើងជាងពីរដងក្នុងរយៈពេល5ឆ្នាំចុងក្រោយនេះ។
ឯកឧត្តមបានបញ្ជាក់ពីការគាំទ្ររបស់ធនាគារជាតិនៃកម្ពុជា ចំពោះការបង្កើតឱ្យមានអត្រាប្តូរប្រាក់ទ្វេភាគី (រៀល និងយ័ន) នេះឡើងដោយរំពឹងថា តាមរយៈការប្រើប្រាស់រូបិយវត្ថុជាតិក្នុងសកម្មភាពសេដ្ឋកិច្ច និងពាណិជ្ជកម្មនឹងជួយកាត់បន្ថយហានិភ័យអត្រាប្តូរប្រាក់ លើកកម្ពស់ប្រសិទ្ធភាព សុវត្ថិភាព និងភាពឆាប់រហ័សក្នុងការទូទាត់ ព្រមទាំងបង្កើនលទ្ធភាពឱ្យធនាគារកណ្តាលទាំងពីរចូលរួមកាន់តែសកម្មក្នុងការគាំទ្រការរីកចម្រើនទំនាក់ទំនងសេដ្ឋកិច្ច និងហិរញ្ញវត្ថុដែលទាំងអស់នេះនឹងរួមចំណែកជំរុញការអភិវឌ្ឍសេដ្ឋកិច្ច និងពាណិជ្ជកម្មនៅក្នុងប្រទេសទាំងពីរបន្ថែមទៀតនាពេលអនាគត៕
