ប្រេងបានធ្លាក់ថ្លៃជាបន្តបន្ទាប់ក្នុងការជួញដូរ ៥ លើក ក្នុងចំណោម ៦ លើកចុងក្រោយនេះ ដោយសារទីផ្សារសង្ឃឹមលើភាពប្រសើរឡើងក្នុងកិច្ចចរចាសន្តិភាពរវាង រុស្ស៊ី និង អ៊ុយក្រែន បូករួមនឹងការកើនឡើងខ្ពស់នឹកស្មានមិនដល់នៃប្រេងក្នុងឃ្លាំងអាម៉េរិក។ល។
តម្លៃប្រេង Brent ក្នុងការជួញដូរលើកនេះ មានការប្រែប្រួលប្រហែល ៦ ដុល្លារ (៩៧.៥៥ ដុល្លារ ដល់ ១០៣.៧០ ដុល្លារ) មុនពេលបញ្ចប់ការជួញដូរក្នុងតម្លៃ ៩៨.០២ ដុល្លារ ថយចុះ ១.៨៩ ដុល្លារ/ធុងបារ៉ែល។ តម្លៃប្រេង Texas ខាងលិច របស់ អាម៉េរិក (WTI) ក៏ធ្លាក់ថ្លៃ ១.៤០ ដុល្លារ ប្រហាក់ប្រហែល ១.៥% ហើយបញ្ចប់ការជួញដូរក្នុងតម្លៃ ៩៥.០៤ ដុល្លារ/ធុង។
កត្តាចម្បងៗដែលអូសប្រេងឱ្យធ្លាក់ថ្លៃរួមមាន ក្ដីសង្ឃឹមអំពីកិច្ចព្រមព្រៀងសន្តិភាពរវាង រុស្ស៊ី និង អ៊ុយក្រែន ក៏ដូចជាសញ្ញាវិជ្ជមានខ្លះៗទាក់ទងនឹងការស្ដារកិច្ចព្រមព្រៀងឆ្នាំ ២០១៥ រវាង អាម៉េរិក និង អ៊ីរ៉ង់ ដែលអាចឈានទៅរកការអនុញ្ញាតឱ្យ សាធារណរដ្ឋអ៊ីស្លាម នេះ នាំចេញប្រេង បើសិនយល់ព្រមកាត់បន្ថយមហិច្ឆតាអភិវឌ្ឍកម្មវិធីអាវុធនុយក្លេអែរ។
