តារាឆ្នើម Sadio Mane បានចេញមុខធ្វើការសុំអភ័យទោសភ្លាមៗ ក្រោយពីរូបគេបានធ្វើឲ្យអ្នកចាំទី Ederson របស់ក្លិប Manchester City រងរបួស ក្នុងពេលក្រុម Liverpool បានរងបរាជ័យក្នុងលទ្ធផល 5-០ ក្នុងការប្រកួតក្របខ័ណ្ឌ Premier League នាកីឡដ្ឋាន Etihad កាលពីថ្ងៃសៅរ៍។
ខ្សែបម្រើស្លាបអន្តរជាតិសេណេហ្គាល់រូបនេះបានព្យាយាមរត់ទៅយកបាល់ តាមរយៈការលើកជើងយ៉ាងខ្ពស់ ស្របពេលដែលអ្នកចាំទី Ederson បានព្យាយាមតែតបាល់ចេញ ដែលនាំឲ្យអ្នកចាំទីអន្តរជាតិប្រេស៊ីលរូបនេះរងនូវការធាក់ចំផ្ទៃមុខតែម្តង។ ការប៉ះទង្គិចដោយអចេតនានេះ បានធ្វើឲ្យ Mane រងនូវការពិន័យកាតក្រហមភ្លាមៗ មុននឹងក្រុមរបស់ខ្លួន (Liverpool) បានរងបរាជ័យជាលើកទី1នៅរដូវកាលនេះតែម្តង។ Mane បានសរសេរនៅលើបណ្តាញសង្គម Facebook ថា៖ «ខ្ញុំសង្ឃឹម និងជូនពរឲ្យ Ederson ឆាប់ជាសះស្បើយ។ ខ្ញុំពិតជាសុំទោសដែលបានធ្វើឲ្យរូបគេរងរបួស អំឡុងការប៉ះទង្គិចដោយគ្មានចេតនារបស់យើងនៅលើទីលាន ហើយពិតជាសុំទោសចំពោះរូបគេដែលធ្វើឱ្យមិនអាចលេងការប្រកួតនេះរហូតដល់ចប់បាន»។ Mane បានបន្ថែមទៀតថា៖ «ខ្ញុំសូមជូនពរឲ្យរូបគេឆាប់ជា និងវិលទៅលេងវិញក្នុងពេលឆាប់ៗនេះ»។
Ederson ដែលជាអតីតអ្នកចាំទីរបស់ក្លិប Benfica បានទទួលការត្រួតពិនិត្យបន្ថែមទៀតពីសំណាក់បុគ្គលិកពេទ្យរបស់ក្លិប Man City ប៉ុន្តែ មិនបានរងនូវការប៉ះទង្គិចខួរក្បាលឡើយ និងបានដើរទៅអង្គុយនៅកន្លែងសម្រាប់កីឡាករបម្រុងវិញ នៅមុនពេលបញ្ចប់ការប្រកួតនេះ៕
ប្រភពពី៖ The Sun
