គណនេយ្យ ជាមុខវិជ្ជាសំខាន់មួយសម្រាប់ការរស់នៅ ហើយវាក៏ជាផ្នែកមួយយ៉ាងសំខាន់ផងដែរនៅក្នុងសហគ្រាស និងសង្គមទាំងមូល។ នៅកម្ពុជាក៏ដូចជានៅតាមបណ្តាប្រទេសនានាដែរ មុខវិជ្ជាគណនេយ្យមានតម្រូវការការងារខ្ពស់ តែមុខវិជ្ជានេះទាមទារឱ្យមានចំណេះដឹងពិតប្រាកដ រួមទាំងការបណ្តុះបណ្តាលច្បាស់លាស់ទើបអាចធ្វើការងារបាន។
ដើម្បីបង្ហាញកាន់តែច្បាស់ពីមុខវិជ្ជាគណនេយ្យសម្រាប់សិស្ស-និស្សិតកម្ពុជា គេហទំព័រឡារ៉ែន ពាណិជ្ជ បានធ្វើបទសម្ភាសជាមួយលោក សាន្ត ចន្ទកុម្ភៈ នាយកបណ្តុះបណ្តាលនៃវិទ្យាស្ថានហិរញ្ញវត្ថុ នៃកម្ពុជា (FIC) ដែលមានអត្ថន័យដូចខាងក្រោម។
- មុខវិជ្ជាគណនេយ្យមានសារៈសំខាន់ខ្លាំងប៉ុនណាសម្រាប់ខ្លួនឯង អាជីវកម្ម និងសង្គម?
នៅក្នុងពិភពលោក នៃសកលភាវូបនីយកម្ម សហគ្រិនភាពគឺជាចំណេះដឹងដ៏ចាំបាច់បំផុតសម្រាប់បង្កើតអាជីវកម្មប្រកបដោយចីរភាព។ ចំណេះដឹង ផ្នែកគណនេយ្យគឺ មានសារៈសំខាន់បំផុតសម្រាប់ខ្លួនឯង អាជីវកម្ម និងសង្គម។
ខ្ញុំអាចលើកឧទាហរណ៍មួយថា បើអ្នកណាម្នាក់ចង់បើកអាជីវកម្មលក់គ្រឿងសង្ហារិមការិយាល័យ។ ក្រៅពីលក់ផលិតផលឱ្យដាច់ហើយ គាត់ក៏ត្រូវយល់ដឹងពីរបៀបគ្រប់គ្រងលុយកាក់ប្រកបដោយប្រសិទ្ធភាព ត្រូវដឹងពីចំណូលចំណាយ ការគ្រប់គ្រងសន្និធិ (stock) របាយការណ៍ទ្រព្យសកម្ម និងទ្រព្យអកម្មផ្សេងទៀតជាដើម។ ចំណេះដឹងទាំងអស់នេះ ជាផ្នែកមួយនៃការសិក្សាមុខវិជ្ជាគណនេយ្យ។
សម្រាប់ខ្លួនឯងផ្ទាល់ ចំណេះដឹងគណនេយ្យអាចជួយឱ្យយើងគ្រប់គ្រងហិរញ្ញវត្ថុគ្រួសារប្រកបដោយប្រសិទ្ធភាព។ ហើយភ្ជាប់ជាមួយរឿងនេះផងដែរ យើងក៏ឃើញថា សង្គមមួយរីកចម្រើនគឺនៅពេលដែលប្រជាជនគ្រប់រូបយល់ដឹងពីវិធីចាយលុយ និងធនធានដទៃទៀតប្រកបដោយប្រសិទ្ធភាពផងដែរ។
- តើមនុស្សប្រភេទណាទើបសមជាអ្នករៀនផ្នែកគណនេយ្យ?
នៅប្រទេសជឿនលឿនដូចជា សិង្ហបុរីជាដើម ចំណេះដឹងផ្នែកគណនេយ្យគឺជាបំណិនជីវិត។ គេបញ្ចូលកម្មវិធីគណនេយ្យតាំងពីថ្នាក់ទី10 ឬកម្រិតវិទ្យាល័យមកម្ល៉េះ។ ហេតុនេះសិស្សដែលសិក្សានៅវិទ្យាល័យ និងគ្រប់ប្រភេទនៃមនុស្សទាំងអស់គួរសិក្សាយល់ដឹងពីមុខវិជ្ជានេះ។
- តើការងារគណនេយ្យគេធ្វើអ្វីខ្លះនៅក្នុងវិស័យការងារ?
ការងារគណនេយ្យមានលក្ខណៈទូលំទូលាយណាស់នៅក្នុងសហគ្រាសនីមួយ។ វាអាស្រ័យទៅលើទំហំសហគ្រាស និងតំណែងរបស់បុគ្គលិកម្នាក់។
តំណែងសម្រាប់ការងារគណនេយ្យមានដូចជា ស្មៀនគណនេយ្យ ជំនួយការគណនេយ្យ ប្រធានគណនេយ្យ អ្នកគ្រប់គ្រងហិរញ្ញវត្ថុ អ្នកគ្រប់គ្រងហិរញ្ញវត្ថុជាន់ខ្ពស់ សវនករជំនាញ និងសវនករជំនាញផ្ទៃក្នុងជាដើម។
ស្មៀនគណនេយ្យ ជាតំណែងដំបូងដែលអ្នកសិក្សាគណនេយ្យគួរចាប់ផ្តើមធ្វើ។ តំណែងនេះទទួលបន្ទុកលើផ្នែកបញ្ជី និងកត់ត្រាប្រតិបត្តិការអាជីវកម្ម ចំណូលចំណាយជាដើម។ ហើយប្រធានគណនេយ្យទទួលបន្ទុក និងទទួលខុសត្រូវលើភាពត្រឹមត្រូវនៃការកត់ត្រារបាយការណ៍អាជីវកម្ម របាយការណ៍ហិរញ្ញវត្ថុ។ ចំណែកឯ អ្នកគ្រប់គ្រងហិរញ្ញវត្ថុជាន់ខ្ពស់ ជាតំណែងកំពូលមួយនៅក្នុងក្រុមហ៊ុន ទទួលបន្ទុកគ្រប់គ្រងនាយកដ្ឋានហិរញ្ញវត្ថុ និងគណនេយ្យ រួមទាំងរៀបចំគម្រោងថវិកាប្រចាំឆ្នាំ គម្រោងលំហូរសាច់ប្រាក់ និងវិភាគរបាយការណ៍ហិរញ្ញវត្ថុជាដើម។
និយាយជារួមការងារគណនេយ្យសម្បូរណាស់នៅពេលដែលបច្ចុប្បន្នអាជីវកម្មកំពុងរីកដុះដាលកាន់តែច្រើនឡើង។
- តើការងារគណនេយ្យមានភាពលំបាកអ្វីខ្លះ?
ខ្ញុំជឿថាការសិក្សាជំនាញ អ្វីក៏ដោយក៏មានភាពលំបាករបស់វាដែរ ប៉ុន្តែប្រសិនបើអ្នកដាក់ចិត្តដាក់កាយដើម្បីរៀនមុខវិជ្ជានោះ អ្នកនឹងសប្បាយរីករាយនៅពេលអ្នកមានការអភិវឌ្ឍជំនាញនោះ។ ចំពោះមុខវិជ្ជាគណនេយ្យ យើងធ្វើការងារច្រើនជាមួយនឹងលេខនព្វន្ត។ ដូច្នេះវាទាមទារយើងឱ្យមានសុក្រឹតភាពជាមួយលេខ និងភាពលម្អិតនៃប្រតិបត្តិការនីមួយ។
មុខវិជ្ជានេះ ថែមទាំងទាមទារឱ្យមានភាពអត់ធ្មត់ច្រើនដោយសារយើងត្រូវអនុវត្តលំហាត់ដែលមានលក្ខណៈជាសេណារីយោ។ ប្រសិនបើយើងមិនព្យាយាមអនុវត្តលំហាត់ឱ្យបានច្រើននោះទេ យើងមិនអាចយល់ដឹងអំពីការអនុវត្តតាមស្តង់ដារគណនេយ្យបានត្រឹមត្រូវនោះទេ។
- ដើម្បីទទួលបានចំណេះដឹងគណនេយ្យល្អពិតប្រាកដ ហើយធានាថាមានការងារត្រឹមត្រូវធ្វើ តើសិស្សនិស្សិតគួរជ្រើសរើសគ្រឹះស្ថានសិក្សាបែបណា?
គ្រឹះស្ថានទាំងអស់ ទាំងរដ្ឋ និងឯកជនដែលបង្រៀនមុខវិជ្ជានេះ តែងតែចង់ឱ្យសិស្សមានគុណភាព។ ខ្ញុំមិនអាចធ្វើការវាយតម្លៃថា វិទ្យាស្ថានណា ឬសាលាណាដែលសិស្សគួរតែជ្រើសរើសនោះទេ តែសម្រាប់មតិខ្លួនខ្ញុំផ្ទាល់ វាចេញពីសិស្សខ្លួនឯងច្រើនជាងគេ។
សិស្ស-និស្សិតគួរតែព្យាយាមស្រាវជ្រាវឱ្យបានច្រើនតាមតែអាចធ្វើទៅបាន។ សិស្សត្រូវខ្នះខ្នែងរកកន្លែងហាត់ការឱ្យបានល្អដើម្បីបំប្លែងចំណេះដឹងឱ្យទៅជាចំណេះធ្វើ៕
