ក្រុមហ៊ុន Reliance Industries ប្រកាសថា នឹងចំណាយ ៦ ទ្រីលាន (៦,០០០,០០០,០០០,០០០) រ៉ូពី សម្រាប់គម្រោងផលិតថាមពលអគ្គិសនីកកើតឡើងវិញ នៅភាគខាងលិចនៃ ប្រទេសឥណ្ឌា។
មហាសេដ្ឋីដែលមានទ្រព្យច្រើនជាងគេបង្អស់នៅក្នុង ទ្វីបអាស៊ី លោក Mukesh Ambani កំពុងវិនិយោគយ៉ាងសម្បើមទៅក្នុងវិស័យថាមពលបៃតង។ កាលពីថ្ងៃទី ១៣ មករា ក្រុមហ៊ុនរបស់លោក គឺ Reliance Industries បានប្រកាសថា នឹងបោះទុនវិនិយោគ ៦ លានលាន (៦ ទ្រីលាន) រ៉ូពី (ប្រហែល ៨០.៦ ពាន់លានដុល្លារអាម៉េរិក) សម្រាប់បណ្ដាគម្រោងផលិតថាមពលកកើតឡើងវិញ នៅក្នុងរដ្ឋ Gujarat ភាគខាងលិចប្រទេសឥណ្ឌា។ Reliance រំពឹងថា គម្រោងទាំងនេះនឹងបង្កើតការងារថ្មីចំនួន ១ លានកន្លែងបន្ថែមទៀត។
ក្នុងចំណោមខ្ទង់វិនិយោគខាងលើ មានប្រហែល ៦៧.៧ ពាន់លានដុល្លារ នឹងត្រូវបានប្រើប្រាស់ដើម្បីសាងសង់រោងចក្រផលិតអគ្គិសនីថ្មី និងប្រព័ន្ធអ៊ីដ្រូសែន។ ក្រុមហ៊ុន Reliance មានគម្រោងវិនិយោគសកម្មបំផុតក្នុងអំឡុងពេលពី ១០ ទៅ ១៥ ឆ្នាំ និងចាប់ផ្ដើមស្វែងរកដីសម្រាប់រោងចក្រដែលអាចផលិតអគ្គិសនី ១០០ gigawatt។
ក្រុមហ៊ុននេះក៏មានផែនការសាងសង់រោងចក្រថ្មីសម្រាប់ផលិតផ្ទាំងសូឡា បច្ចេកវិទ្យាថ្ម និងប្រភពថាមពលកកើតឡើងវិញដទៃទៀតផងដែរ។
គម្រោងវិនិយោគដែលនឹងបង្កើតការងារថ្មីចំនួន ១ លានកន្លែង របស់ Reliance នឹងជួយដល់កំណើនសេដ្ឋកិច្ចផ្ទាល់ និងប្រយោលនៅក្នុងរដ្ឋដែលជាស្រុកកំណើតរបស់លោក Modi។
Reliance គឺជាក្រុមហ៊ុនមួយដែលមានមូលធនទីផ្សារ និងកេរ្ដិ៍ឈ្មោះល្បីបំផុតនៅ ឥណ្ឌា។ ក្រុមហ៊ុននេះ បានប្រឹងប្រែងតាំងពីយូរមកហើយ នៅក្នុងការកាត់បន្ថយការពឹងផ្អែកទៅលើអណ្ដូងប្រេង។ ថ្មីៗនេះ Reliance បាន និងកំពុងចាប់ផ្ដើមប្ដូរទិសដៅវិនិយោគ នៅពេលលោក Ambani ស្វែងរកវិធីដើម្បីរុញច្រាន Reliance ឱ្យក្លាយជាក្រុមហ៊ុនបច្ចេកវិទ្យាសកល។
នៅក្នុងសេចក្ដីប្រកាសថ្មីបំផុត Reliance ឱ្យដឹងថា ពួកគេនឹងប្រើប្រាស់ខ្ទង់វិនិយោគដែលនៅសល់ ដើម្បីវិនិយោគទៅលើគម្រោងដែលមានស្រាប់ និងគម្រោងថ្មី ក្នុងរង្វង់ពី ៣ ទៅ ៥ ឆ្នាំទៀត។ ក្នុងអំឡុងពេលនោះ ក្រុមហ៊ុនក៏នឹងចំណាយ ១,០០០ លានដុល្លារ ដើម្បីបន្ទាន់សម័យប្រព័ន្ធទូរស័ព្ទចល័តឡើងទៅជំនាន់ទី ៥ ( ៥G) និងចំណាយប្រមាណ ៤០៦ លានដុល្លារ សម្រាប់បណ្ដាញលក់រាយ៕
