បើតាមលិខិតសម្រេចរបស់ក្រសួងវប្បធម៌ និងវិចិត្រសិល្បៈ បានឱ្យដឹងថា បទចម្រៀងចំនួន 41 បទរបស់កវីល្បីឈ្មោះ គង់ ប៊ុនឈឿន ដែលជាមរតកសាសន៍ ត្រូវបានប្រគល់សិទ្ធិគ្រប់គ្រងឱ្យទៅភរិយារបស់លោក គឺលោកស្រី គាត គីមលន ដែលមានទីកំណើតនៅឃុំស្វាយប៉ោ ស្រុកសង្កែ ខេត្តបាត់ដំបង ប្រទេសកម្ពុជា ហើយសព្វថ្ងៃនេះ លោកស្រីរស់នៅប្រទេសន័រវេយ៍ ( NorWay)។
គោលបំណងក្នុងការប្រគល់មរតកសាសន៍នេះឱ្យទៅភរិយារបស់លោកគឺ ៖
1.ដើម្បីថែរក្សាកេរដំណែលស្នាដៃរបស់ស្វាមី។
2.ដើម្បីថែរក្សាកេរដំណែលរបស់កវីនិពន្ធមានឈ្មោះល្បីល្បាញនៅក្នុងប្រទេសកម្ពុជា ហើយល្បីរហូតទៅដល់ប្រទេសនូវ៉ាសេឡង់។
និង ៣.ក្នុងគោលបំណងថែរក្សា និងគោរពដល់កម្មសិទ្ធបញ្ញារបស់កវីនិពន្ធ។
គួរបញ្ជាក់ផងដែរថា សេចក្ដីសម្រេចតាមនេះ បានចុះហត្ថលេខាសម្រេចដោយលោកជំទាវ ភឿង សក្ខណា ដែលជារដ្ឋមន្ត្រីក្រសួងវប្បធម៌ និងវិចិត្រសិល្បៈ ដូច្នោះហើយករណីដែលល្មើសចំពោះកម្មសិទ្ធិបញ្ញានៃបទចម្រៀងកវី គង់ ប៊ុនឈឿន នេះជនល្មើសនឹងត្រូវទទួលខុសត្រូវចំពោះមុខច្បាប់ផងដែរ៕
