ភ្នំពេញៈ មន្ត្រីជាន់ខ្ពស់ក្រសួងរ៉ែ និងថាមពលបានថ្លែងឲ្យដឹងថា កម្ពុជានឹងទទួលបានរ៉ែមាសនៅឆ្នាំ2018 បន្ទាប់ពីក្រុមហ៊ុន1ក្នុងចំណោម2ដែលទទួលបានអាជ្ញាប័ណ្ណពីក្រសួងបានស្រាវជ្រាវរកឃើញរ៉ែមាសនៅកម្ពុជា។
អគ្គនាយកនៃអគ្គនាយកដ្ឋានធនធានរ៉ែនៃក្រសួងរ៉ែ និងថាមពល លោក យស់ មុន្នីរ៉ាត់ បានថ្លែងលើកឡើងនៅក្នុងសិក្ខាសាលាកាលពីម្សិលមិញថា នៅក្នុងការស្វែងរុករករ៉ែលោហៈនេះ ចាប់ពីឆ្នាំ2013មកមានក្រុមហ៊ុនបរទេសជាច្រើនបានមកសុំអាជ្ញាប័ណ្ណដើម្បីធ្វើអាជីវកម្មរុករករ៉ែនេះ ប៉ុន្តែដោយសារការស្វែងរុករកមិនបានជួបប្រទះនូវប្រភពរ៉ែនោះ មានក្រុមហ៊ុនមួយចំនួនបានបញ្ចប់ការស្វែងរុករកជាបណ្តើរៗដែលគិតរហូតមកដល់ឆមាសទី1ឆ្នាំនេះ នៅមានក្រុមហ៊ុនចំនួន63ប៉ុណ្ណោះដែលនៅតែស្វែងរុករករ៉ែ ក្នុងនោះក្រុមហ៊ុនចំនួន4ដែលក្រសួងគ្រោងនឹងដកហូតអាជ្ញាប័ណ្ណលែងឲ្យធ្វើអាជីវកម្មនៅកម្ពុជា។
លោកបន្តថា “ធនធានរ៉ែនៅកម្ពុជាជាផ្នែកមួយនៃការអភិវឌ្ឍសេដ្ឋកិច្ច និងសង្គម និងជាវត្ថុធាតុដើមមួយយ៉ាងសំខាន់សម្រាប់ផ្គត់ផ្គង់ឧស្សាហកម្មប្រើប្រាស់វត្ថុធាតុដើមរ៉ែដើម្បីផលិតជាផលិតផលផ្សេងៗសម្រាប់បំពេញសេចក្តីត្រូវការនៅក្នុងប្រទេស និងការនាំចេញទៅក្រៅប្រទេស។
លោក យស់ មុន្នីរ៉ាត់ បានបន្តថា បច្ចុប្បន្នមានក្រុមហ៊ុនចំនួនពីរ ក្នុងនោះក្រុមហ៊ុននៅខេត្តរតនគីរីបានស្វែងរុករកឃើញរ៉ែមាសខ្នាតមធ្យមមួយហើយ បច្ចុប្បន្នក្រុមហ៊ុននេះកំពុងរៀបចំហេដ្ឋារចនាសម្ព័ន្ធដើម្បីធ្វើអាជីវកម្មដែលយ៉ាងយូរបំផុតនៅពាក់កណ្តាលឆ្នាំ2018យើងនឹងទទូលបានកំណប់ដុំមាសនេះហើយ។ រីឯក្រុមហ៊ុនមួយទៀតដែលជាក្រុមហ៊ុនរបស់ប្រទេសអូស្ត្រាលីក៏បានស្វែងរុករករ៉ែមាសឃើញផងដែរ គឺនៅក្នុងខេត្តមណ្ឌលគីរី និងបច្ចុប្បន្នកំពុងដាក់ពាក្យសុំធ្វើអាជីវកម្ម។
រដ្ឋលេខាធិការក្រសួងរ៉ែ និងថាមពលលោក ឌិត ទីណា បានថ្លែងឲ្យដឹងផងដែរថា កម្ពុជាជាប្រទេសមួយពិតជាមានរ៉ែមែន ប៉ុន្តែប្រភេទរ៉ែទាំងនោះរាជរដ្ឋាភិបាលកម្ពុជាមិនអាចមានលទ្ធភាពវិនិយោគដោយខ្លួនឯងបានឡើយ ដោយសារការស្វែងរុករករ៉ែគឺត្រូវការមានជំនាញច្បាស់លាស់ ជាពិសេសមានឧបករណ៍គ្រប់គ្រាន់ទើបយើងអាចដំណើរការទៅបាន។
សូមរំឭកថា សារពើពន្ធប្រមូលបានពីវិស័យរ៉ែមានចំនួនប្រមាណ ១៦លានដុល្លារអាមេរិក កើនឡើងជាច្រើនដងបើប្រៀបធៀបទៅនឹងឆ្នាំមុន៕
