(សហរដ្ឋអាម៉េរិក)-យន្តហោះប្រភេទបាឡុង H2 Clipper អាចជាដំណោះស្រាយបៃតងសម្រាប់ជំនួសយន្តហោះ និងកប៉ាល់ដឹកទំនិញធម្មតា ដោយសារវាអាចផ្ទុកទម្ងន់ធ្ងន់ និងរង្វង់ប្រតិបត្តិការឡើងដល់ជាង ៩,៦៥០ គីឡូម៉ែត្រ។
H2 Clipper ដែលជាក្រុមហ៊ុនធុរកិច្ចថ្មី (startup) នៅក្នុងរដ្ឋ California សហរដ្ឋអាម៉េរិក «ប្រែក្លាយ» បាឡុងហោះដែលផ្ទុក អ៊ីដ្រូសែន ជាមួយនឹងតួនាទីថ្មីគឺ មធ្យោបាយដឹកជញ្ជូនទំនិញធុនធ្ងន់។ នេះបើតាម Interesting Engineering ចុះផ្សាយកាលពីថ្ងៃទី ១៥ ធ្នូ ២០២១។
ក្រុមហ៊ុននេះ អះអាងថា យន្តហោះបាឡុងរបស់ពួកគេអាចដឹកទំនិញធ្ងន់ជាងពី ៨ ទៅ ១០ ដង ធៀបនឹងបណ្ដាយន្តហោះដឹកទំនិញល្អបំផុតនាបច្ចុប្បន្ន ដោយតម្លៃស្មើនឹង ១/៤ ប៉ុណ្ណោះ។ H2 Clipper អាចផ្ទុកទម្ងន់បានប្រហែល ១៥០,០០០ គីឡូក្រាម ដោយបរិវេណសម្រាប់ផ្ទុកទំនិញទំហំ ៧,៥០០ ម៉ែត្រគូប។
H2 Clipper ហោះហើរក្នុងល្បឿន ២៨០ គីឡូម៉ែត្រ/ម៉ោង លឿនជាងកប៉ាល់ដឹកទំនិញធម្មតាជិត ១០ ដង ប៉ុន្តែ យឺតជាងធៀបនឹងយន្តហោះដឹកទំនិញ។ ចំណុចពិសេសរបស់យន្តហោះបាឡុង H2 Clipper គឺមិនបញ្ចេញឧស្ម័នកាបូន។
យន្តហោះបាឡុងនេះនឹងដំណើរការដោយឧស្ម័នអ៊ីដ្រូសែន តាមរយៈប្រព័ន្ធអាគុយជាមួយនឹងប្រព័ន្ធរុញច្រានដែលដើរដោយថាមពលអគ្គិសនីសុវត្ថិភាព។ ដោយអាចហោះហើរក្នុងរង្វង់ជាង ៩,៦៥០ គីឡូម៉ែត្រ H2 Clipper អាចភ្ជាប់ពីកន្លែងមួយ ទៅកន្លែងមួយនៅលើពិភពលោក ដោយត្រូវការទីតាំងចតតែមួយគត់ដើម្បីបញ្ចូលថាមពល។
ចំពោះថ្លៃដឹកជញ្ជូនវិញ H2 Clipper ឱ្យដឹងថា ក្នុង ១ តោន នឹងត្រូវគិតថ្លៃពី ០.១៧៧ ដល់ ០.២៤៧ ដុល្លារ/ចម្ងាយផ្លូវ ១ ម៉ាយ (ប្រហែល ១.៦ គីឡូម៉ែត្រ) ជាមួយនឹងរយៈចម្ងាយសរុបពី ១,៦០០ ដល់ ៩,៦៥០ គីឡូម៉ែត្រ។ តម្លៃនេះថ្លៃជាង បើធៀបនឹងការដឹកជញ្ជូនដោយកប៉ាល់។ ប៉ុន្តែ វិស័យដឹកជញ្ជូនផ្លូវទឹកទំនងជានឹងត្រូវបានយកពន្ធលើកាបូនខ្ពស់ជាងបច្ចុប្បន្ន នាពេលខាងមុខ ដោយសារតែបណ្ដាប្រទេសកំពុងឆ្ពោះទៅរកគោលដៅកាត់បន្ថយការបំភាយឧស្ម័នពុល៕