ចូរស្រមៃថា ថ្ងៃមួយ មហាសេដ្ឋី Elon Musk មិនសប្បាយចិត្ត ហើយឡើង Twitter ប្រកាសថា «Starlink ឈប់ផ្គត់ផ្គង់អ៊ីនធើណិត» ពេលនោះ តើពិភពលោកនឹងទៅជាយ៉ាងណា?
សារព័ត៌មាន Financial Times ចុះផ្សាយថា មេដឹកនាំទីភ្នាក់ងារអវកាសអឺរ៉ុប (ESA) បានជំរុញឱ្យក្រុមមេដឹកនាំបណ្ដាប្រទេសក្នុងតំបន់ បញ្ឈប់ការផ្ដល់ភាពងាយស្រួលដល់មហិច្ឆតាគ្រប់គ្រងសេដ្ឋកិច្ចនៅទីអវកាសថ្មីរបស់ មហាសេដ្ឋី Elon Musk។ ទន្ទឹមនឹងនេះ មេដឹកនាំរបស់ ESA ក៏បានព្រមានថា កង្វះសកម្មភាពសហការគឺមានន័យថា បណ្ដោយឱ្យមហាសេដ្ឋីដែលមានទ្រព្យច្រើនជាងគេក្នុងពិភពលោក រូបនេះ «កំណត់លក្ខខណ្ឌ» ដោយខ្លួនឯង នៅក្នុងទីអវកាស។
ថ្លែងថា ការត្រៀមខ្លួនជាស្រេចរបស់ អឺរ៉ុប ក្នុងការជួយពង្រីកយ៉ាងលឿននូវសេវាកម្មអ៊ីនធើណិតពីផ្កាយរណប Starlink របស់ Elon Musk មានទំនោរទៅរកការរាំងខ្ទប់បណ្ដាក្រុមហ៊ុនក្នុងតំបន់ រកឃើញសក្ដានុពលរបស់ពាណិជ្ជកម្មអវកាស។
ប្រទេសអាល្លឺម៉ង់ កាលពីពេលថ្មីៗនេះ បានដាក់សំណើទៅកាន់សហភាពទូរគមនាគមន៍អន្តរជាតិ ដែលជាស្ថាប័នចាត់ចែងការប្រើប្រាស់ប្រេកង់អត់ខ្សែសម្រាប់បញ្ជូនទិន្នន័យ ដើម្បីផ្ដល់វិសាលគមដល់ផ្កាយរណបប្រមាណ ៤០,០០០ គ្រឿង របស់ក្រុមហ៊ុន Starlink។ លោក Musk ទទួលបានការយល់ព្រមសម្រាប់ការប្រើប្រាស់ផ្កាយរណបជាង ៣០,០០០ គ្រឿង តាមរយៈស្ថាប័នគ្រប់គ្រងរបស់ សហរដ្ឋអាម៉េរិក។
ឆ្នាំនេះ លោក Musk ឱ្យដឹងថា ក្រុមហ៊ុនផលិតរ៉ុក្កែតឯកជនរបស់លោក បានត្រៀមទុនរហូតដល់ ៣០ ពាន់លានដុល្លារ ដើម្បីពង្រីក Starlink។
«មានមនុស្សម្នាក់ កាន់កាប់ចំនួនជាងពាក់កណ្ដាលនៃផ្កាយរណបសរុបដែលកំពុងដំណើរការនៅលើពិភពលោក…ជាក់ស្ដែង គាត់កំពុងតែដាក់ចេញនូវគោលការណ៍ច្បាប់។ ពិភពលោកដែលនៅសល់ពីនេះ រួមទាំង អឺរ៉ុប ផងដែរ…មិនបានប្រតិកម្មឱ្យទាន់ពេល»។
ការប្រញាប់ទាញយកសក្ដានុពលរបស់ពាណិជ្ជកម្មអវកាស បានធ្វើឱ្យមានការព្រួយបារម្ភអំពីការដែលមិនមានប្រព័ន្ធគ្រប់គ្រងចរាចរណ៍ក្នុងទីអវកាសជាសកលសម្រាប់គន្លងគោចរកម្ពាស់ទាប ដែលជាតំបន់មួយមានចម្ងាយ ២,០០០ គីឡូម៉ែត្រ ពី ផែនដី ជាទីដែលសេវាកម្មពាណិជ្ជកម្មថ្មីនានា ត្រូវបានគេកំណត់ជាគោលដៅ។
Franz Fayot ដែលជារដ្ឋមន្ត្រីសេដ្ឋកិច្ចរបស់ ប្រទេសលុចសំបួ (Luxembourg) ក៏មានការព្រួយបារម្ភដូចទៅនឹងមេដឹកនាំនៃទីភ្នាក់ងារអវកាសអឺរ៉ុប ផងដែរ។
ការដែលលោក Musk ផលិតផ្កាយរណបដោយខ្លួនឯង និងអាចបាញ់បង្ហោះដោយរ៉ុក្កែតរបស់ SpaceX គឺមានន័យថា គាត់អាចផ្លាស់ទីបានលឿនជាងគូប្រជែងនានា ដើម្បីកាន់កាប់ផ្ទៃរាបដ៏ធំធេងនៅទីអវកាស។
ភាគីខាងក្រុមហ៊ុន Starlink របស់មហាសេដ្ឋី Elon Musk មិនទាន់មានប្រតិកម្មអ្វីចំពោះបញ្ហាដែលបានលើកឡើងខាងលើនេះនៅឡើយ៕