រដ្ឋាភិបាលឥណ្ឌា ជិតដាក់សេចក្ដីព្រាងច្បាប់ថ្មី ឡើងទៅសភា ក្នុងបំណងទប់ស្កាត់រូបិយវត្ថុឌីជីថលឯកជនស្ទើរតែទាំងអស់ មុនពេលធនាគារជាតិបញ្ចេញប្រាក់ឌីជីថលផ្ទាល់ខ្លួន។
រដ្ឋាភិបាលឥណ្ឌា កាលពីថ្ងៃទី 23 វិច្ឆិកា បានឱ្យដឹងថា សេចក្ដីព្រាងច្បាប់ «ប្រាក់ឌីជីថល និងការកំណត់អំពីសេចក្ដីព្រាងច្បាប់ស្ដីពីប្រាក់ឌីជីថល» នឹងអនុញ្ញាតឱ្យប្រើប្រាស់ប្រាក់ឌីជីថល តែមួយចំនួនតូចប៉ុណ្ណោះ។ សេចក្ដីព្រាងច្បាប់នេះនឹងត្រូវបានដាក់ឡើងទៅកាន់សភាជាតិដើម្បីពិនិត្យ អនុម័ត នៅក្នុងកិច្ចប្រជុំនារដូវត្រជាក់ ដែលចាប់ផ្ដើមពីចុងខែវិច្ឆិកា 2021។
តាមរយៈសេចក្ដីព្រាងច្បាប់នេះ ឥណ្ឌា ក៏កំពុងតែមានគម្រោងដាក់ឱ្យប្រើប្រាស់រូបិយវត្ថុឌីជីថល ដែលបោះផ្សាយដោយធនាគារជាតិ (RBI) ផងដែរ។ កន្លងមក RBI បានសម្ដែងការព្រួយបារម្ភខ្លាំងអំពីប្រាក់ឌីជីថលឯកជន ហើយគ្រោងនឹងបញ្ចេញរូបិយវត្ថុឌីជីថលដោយឡែករបស់ខ្លួននៅធ្នូ 2021។
Bitcoin ជារូបិយវត្ថុឌីជីថល មានតម្លៃខ្ពស់ជាងគេក្នុងពិភពលោក កំពុងត្រូវបានជួញដូរក្នុងរង្វង់ 60,000 ដុល្លារ/Bitcoin។ ប្រាក់ឌីជីថលឯកជននេះ បានឡើងថ្លៃទ្វេដង រាប់ចាប់ពីដើមឆ្នាំ 2021 និងកំពុងទាក់ទាញអ្នកវិនិយោគយ៉ាងខ្លាំងក្លា។
ប្រទេសឥណ្ឌា បច្ចុប្បន្នមានអ្នកវិនិយោគលើប្រាក់ឌីជីថល ប្រមាណពី 15 ទៅ 20 លាននាក់ ជាមួយនឹងខ្ទង់ប្រាក់សរុបប្រហែល 400 ពាន់លានរូពី (5.39 ពាន់លានដុល្លារអាម៉េរិក)។
ថ្មីៗនេះ នាយករដ្ឋមន្ត្រី Narendra Modi បានបើកកិច្ចប្រជុំមួយដែលពិភាក្សាអំពីអនាគតរបស់ប្រាក់ឌីជីថល ក្នុងគ្រាដែលមានការព្រួយបារម្ភថា ទីផ្សារហិរញ្ញវត្ថុឌីជីថលដែលមិនត្រូវបានគ្រប់គ្រង អាចបង្កលក្ខណៈងាយស្រួលដល់សកម្មភាពលាងលុយ និងការគាំទ្រអំពើភេរវកម្ម៕
