យោងតាម ProPublica មហាសេដ្ឋីសរុបចំនួន 18 នាក់ និងអ្នកមានលំដាប់កំពូលៗជាង 200 នាក់ ទទួលបានខ្ទង់ប្រាក់ជំនួយក្នុងវិបត្តិហិរញ្ញវត្ថុដែលបង្កឡើងដោយជំងឺរាតត្បាត COVID-19 ពីរដ្ឋាភិបាលអាម៉េរិក។
ProPublica ដែលជាអង្គការសារព័ត៌មានឯករាជ្យ និងមិនស្វែងរកកម្រៃ មានជំនាញខាងស៊ើបអង្កេត បានឱ្យដឹងថា ក្រុមមហាសេដ្ឋី បានទទួលខ្ទង់ប្រាក់ជំនួយដំបូង ដែលនេះគឺយោងទៅតាមឯកសារបែកធ្លាយពីការិយាល័យសេវាចំណូលផ្ទៃក្នុង (Internal Revenue Service/ IRS)។
ក្នុងចំណោមមហាសេដ្ឋីដែលត្រូវបានចោទថា បានទទួលប្រាក់ជំនួយខាងលើ ក៏មានមហាសេដ្ឋី George Soros ដែលបច្ចុប្បន្នមានទ្រព្យចំនួន 8.6 ពាន់លានដុល្លារ។ បន្ទាប់មកទៀតគឺ ស្ថាបនិករបស់ Renco Group លោក Ira Rennert ដែលមានទ្រព្យប្រមាណ 3.7 ពាន់លានដុល្លារ។ ចំណែក មហាសេដ្ឋី Terrence Pegula ដែលមានទ្រព្យ 5.7 ពាន់លានដុល្លារ ក៏មានឈ្មោះនៅក្នុងបញ្ជីនេះ។
គ្រួសាររបស់មហាសេដ្ឋី George Soros ក្រោយមក បានប្រកាសថា បានសងប្រាក់ទាំងនេះត្រលប់ទៅវិញ ខណៈដែលមហាសេដ្ឋី Rennert បានបដិសេធការអធិប្បាយចំពោះបញ្ហានេះ។
Timothy Headington ជាអ្នកវិនិយោគលើអណ្ដូងប្រេង អ្នកអភិវឌ្ឍអចលនទ្រព្យ និងជាផលិតករភាពយន្តល្បីៗដូចជា «Argo» និង «World War Z» ជាដើម ដែលមានទ្រព្យប្រមាណ 1.4 ពាន់លានដុល្លារ ក៏ត្រូវបានគេរកឃើញក្នុងបញ្ជីនេះផងដែរ។
Robert Dart អ្នកស្នងមរតករបស់គ្រួសារត្រកូល Dart ដែលជាម្ចាស់កម្មសិទ្ធិរបស់ Dart Container ក៏ទទួលបានកញ្ចប់ថវិកាជំនួយ បើទោះលោកលែងជាពលរដ្ឋអាម៉េរិក និងប្រកាសពន្ធពីអាសយដ្ឋានមួយនៅប្រជុំកោះ Cayman។ Dart ក្រោយមកក៏បានប្រគល់ប្រាក់នេះត្រលប់មករដ្ឋាភិបាលវិញ។
នៅមានបុគ្គលអ្នកមានជាច្រើនផ្សេងទៀតដែលមានឈ្មោះនៅក្នុងបញ្ជីខាងលើ ក្នុងនោះមានទាំងអតីតនាយកប្រតិបត្តិរបស់ Lehman Brothers លោក Richard Fuld ឬ លោក Erik Prince ស្ថាបនិករបស់ក្រុមហ៊ុន Blackwater ដែលជាក្រុមហ៊ុនយោធាឯកជន និងជាអ្នកម៉ៅការរបស់រដ្ឋាភិបាល។
យោងតាមច្បាប់ផ្ដល់ជំនួយ សង្គ្រោះ និងសន្តិសុខសេដ្ឋកិច្ចសម្រាប់វិបត្តិ Coronavirus (CARES) ក្រុមគោលដៅដែលត្រូវទទួលបានប្រាក់ជំនួយដោយសារ COVID-19 គឺជាគូស្វាមី ភរិយា ដែលប្រកាសពន្ធរួម ហើយមានចំណូលសរុបក្រោម 150,000 ដុល្លារ/ឆ្នាំ និងពលរដ្ឋនៅលីវដែលមានចំណូលក្រោម 75,000 ដុល្លារ/ឆ្នាំ នៅចុងឆ្នាំ 2019។
ProPublica ឱ្យដឹងថា ក្រុមមហាសេដ្ឋី និងកំពូលអ្នកមានរាប់រយនាក់ បានទទួលប្រាក់ជំនួយ ព្រោះតែពួកគេមានលក្ខខណ្ឌគ្រប់គ្រាន់ ដោយសារតែរដ្ឋាភិបាលកំណត់ទៅលើតែប្រាក់ចំណូលដែលត្រូវបង់ពន្ធ។ សរុប មនុស្សប្រមាណ 270 នាក់ដែលបានបង់ពន្ធក្នុងនាមជាអ្នកមាន មានប្រាក់ចំណូលសរុប 5.7 ពាន់លានដុល្លារ នេះបើតាមតារាងប្រកាសពន្ធមុននោះរបស់ពួកគេ។ ប៉ុន្តែ ខ្ទង់ពន្ធនានាដែលត្រូវបានកាត់បន្ថយរបស់ពួកគេធំរហូតដល់ថ្នាក់ក្លាយជាចំណូលអវិជ្ជមាន (Negative Income) ក្នុងឆ្នាំ 2019។
ការដែលក្រុមមហាសេដ្ឋី ទទួលបានប្រាក់ជំនួយ បានបង្ហាញអំពីកំហុសឆ្គងនៅក្នុងគោលនយោបាយពន្ធដារចំពោះក្រុមកំពូលអ្នកមាន។ បញ្ហានេះបាននាំឱ្យពួកគេត្រូវបានការពារច្រើនជាងក្រុមពលរដ្ឋដែលរស់ដោយសារប្រាក់ខែ៕
