ការអនុម័តលើសេចក្តីព្រាងច្បាប់ស្តីពីវិសោធនកម្មរដ្ឋធម្មនុញ្ញកំណត់សញ្ជាតិខ្មែរតែមួយសម្រាប់ប្រធានរដ្ឋសភា ប្រធានព្រឹទ្ធសភា នាយករដ្ឋមន្ត្រី និងប្រធានក្រុមប្រឹក្សាធម្មនុញ្ញ នេះ ត្រូវបានរដ្ឋសភាអនុម័តនាថ្ងៃនេះ ដោយសំឡេងគាំទ្រ 111/111 សំឡេង នៅក្នុងកិច្ចប្រជុំពេញអង្គ ដែលបានធ្វើឡើងក្រោមអធិបតីភាព សម្តេច ហេង សំរិន ប្រធានរដ្ឋសភា និងមានការចូលរួមពីសមាជិក111 រូបរបស់រដ្ឋសភា នៅព្រឹកថ្ងៃទី 25 ខែតុលា ឆ្នាំ 2021។
មូលហេតុនាំឱ្យមានសេចក្តីព្រាងច្បាប់ដែលមានបំណងកំណត់សញ្ជាតិខ្មែរតែមួយសម្រាប់ មេដឹកនាំស្ថាប័នកំពូលៗរបស់រដ្ឋនេះ ត្រូវបាន ប្រមុខរដ្ឋាភិបាលកម្ពុជា សម្ដេច ហ៊ុន សែន ថ្លែងថា គឺដើម្បីបញ្ជាក់ថា សម្តេចមានសញ្ជាតិតែមួយ និង ដើម្បីបញ្ចៀសការជ្រៀតជ្រែករបស់បរទេសលើកិច្ចការផ្ទៃក្នុងរបស់ កម្ពុជា ក៏ដូចជាការបង្ហាញនូវភក្តីភាពសម្រាប់ជាតិរបស់មេដឹកនាំនៃស្ថាប័នកំពូល។
រដ្ឋសភា ព្រឹទ្ធសភា រាជរដ្ឋាភិបាល និងក្រុមប្រឹក្សាធម្មនុញ្ញ គឺជាស្ថាប័នកំពូលរបស់ជាតិដែលមានចែងក្នុងរដ្ឋធម្មនុញ្ញនៃ ព្រះរាជាណាចក្រកម្ពុជា និងមានការទទួលខុសត្រូវខ្ពស់ក្នុងការសម្រេចលើកិច្ចការសំខាន់ៗ របស់ប្រទេសជាតិ។
នៅក្នុងកិច្ចប្រជុំនេះដែរ រដ្ឋសភា ក៏បានបោះឆ្នោតផ្តល់សេចក្តីទុកចិត្តលើការបំពេញបន្ថែមសមាសភាពសមាជិក នៃរាជរដ្ឋាភិបាលដល់ ឯកឧត្តម ប៉ា សុជាតិវង្ស ជាទេសរដ្ឋមន្ត្រីទទួលបន្ទុកបេសកកម្មពិសេស។ រដ្ឋសភា ក៏បានពិភាក្សា អនុម័តសេចក្តីព្រាងច្បាប់ស្តីពី ការអនុម័តយល់ព្រមលើកិច្ចព្រមព្រៀងបន្ថែមទៅលើកិច្ចព្រមព្រៀងរវាងរាជរដ្ឋាភិបាលកម្ពុជា ជាមួយនឹងអង្គការសហប្រជាជាតិ ទាក់ទងទៅនឹងការកាត់សេចក្តីនៅក្រោមច្បាប់កម្ពុជា ចំពោះឧក្រិដ្ឋកម្មដែលប្រព្រឹត្តឡើងនៅក្នុងរយៈកាល នៃរបបកម្ពុជាប្រជាធិបតេយ្យ ស្តីពីការរៀបចំក្នុងពេលអន្តរកាល និងការបញ្ចប់ការងាររបស់អង្គជំនុំជម្រះវិសាមញ្ញ។ ក្រៅពីនេះ រដ្ឋសភា ក៏បានពិនិត្យ និងអនុម័តសេចក្តីព្រាងច្បាប់ស្តីពី ភាពជាដៃគូរវាងរដ្ឋ និងឯកជនផងដែរ៕
